روايه انا و هي

(الحلقه السابعه ) ..( حالى تايه ومتلخبط ) ❤

رجاءا اللى متابع الروايه يدعمنا بلايك وكومنت
#رواية_انا_وهى_الجزء_التالت
(الحلقه السابعه ) ..( حالى تايه ومتلخبط ) ❤
............
(في الحلقه السابقه )
عماد : هههههههههههههه بس وحياة امى انت فيك حاجه . وده اللى قالهولى حمو
احمد : ( بيكح وبيسيب الشيشه ) مين ياخويا ؟
عماد : احمد ! اتصل عليا من شويه وقالى صاحبك ماله ؟
احمد : وقولتله ايه ؟
عماد : معرفش قعدت انا وهو نهزر شويه وقولتله مافيش حاجه كان كويس معايا لغاية ما مشى . بس وحياة امك لو فيه حاجه قول
احمد : لا اله الا الله .. يابنى والله مافيه حاجه ... بقولك ايه انا مروح بقا
عماد : ماشى ياعم . براااحتك .. وع الهادى يا زبادى ههههههههههههههههه
..................... ( السابعه ) ❤
احمد : طيب ياخويا
عماد : المهم ماقولتليش ليه انك رايح المنصوره . دى مراتى وجعتلى دماغى بتقولى انا بتصل على نوران مرات احمد بتطمن عليها تقولى انها ف المنصوره مع احمد .. فتحتلى انت فتوحه اد كده هههههههههه
احمد : مانت اللى معفن مابتاخدهمش تخرجهم ليه يالا
عماد : ياعم بخرجهم كل اسبوعين كده باخدهم المراجيح هههههههههه
احمد : طب اتنيل .. بقولك ايه ما تيجى اغلبك عشرتين طاوله
عماد : ههههههههههههههه فكرتنى بأحمد وهو بيكلمنى النهارده . كان بيكلمنى وعمالين ناخد وندى ف الكلام ومره واحده قام شاتم مصطفى هههههههههههههه قاله يابن الحراميه انت بتقرص ف الزهر . وانا هاتك يا ضحك مقدرتش امسك نفسي
احمد : ههههههههههههه الواد مصطفى طول عمره مالوش حل ف قرص الزهر . يقولك هجيبلك دوش اهو يقوم جايبه ..
عماد : ههههههههههه هات الطاوله يا كريم والنبى . فيه ناس هتتقطع هنا
احمد : اتكلم على قدك يا حبيبى
..............
( ف البيت )
نوران : اتأخرت كده ليه يا واد انت
احمد : ( بيبصلها وسرحان ) مافيش يا حبيبتى قعدت مع عماد شويه
نوران : ماجوعتش ؟
احمد : هههههههههه ايه ده انتو ماسيبتوليش شويه كفته ولا ايه
نوران : هههههههههههههه بزمتك انا اقدر اعملها يعنى ؟ ولا اقدر اصلا أكل من غيرك . دانت نصى التانى
احمد : ( بيبصلها ومسهم ) ربنا ما يحرمنى منك يا نونه
نوران : يخليك ليا يا قلب نونه ... بقولك ايه
احمد : هههههههههه عارف انا البصه دى . مالك يابت
نوران : ههههههههههههه بس يا جزمه انت على طول دماغك كده متركبه بقلة ادب
احمد : هههههههههه انا بردو ؟ طيب قولى عاوزه ايه
نوران : اقعد بس الاول
احمد : اهو
نوران : خدنى ف حضنك بقا
احمد : اهو تعالى
نوران : ( بتبوسه من خده ) قولى بقا . ايه ملخبط حالك
مش انت . مش حاساك انت
حاساك تايه كده ومتلخبط او مشتت او فيه حاجه شاغلاك
بتحاول تدارى كل ده بانك تضحك معانا
ولو قدرت تضحك ع الدنيا كلها حتى اخواتك استحاله هتقدر تضحك عليا عشان انا منك وانت منى
احمد : يا بابا مافيش حاجه . ممكن شويه ارق او ارهاق او مشغول بالى بالمحل بتاعى اللى هفتحه ... مش أكتر .. لكن صدقينى مافيش حاجه
نوران : يا احمد وغلاوتى عندى قولى لو فيه حاجه شاغلاك .
احمد : ( بيبوس راسها ) مافيش حاجه يا روحى . خليكى ف حضنى بس انا محتاج حضنك ضرورى
نوران : انت دايما ف حضنى وقلبى
تعرف يا احمد
تعرف انى اكتشفت انك النفس اللى بتنفسه
والله العظيم حاسه بمراره لمجرد انى حاسه بس انك مخنوق او مشتت او مش على طبيعتك
شغلى الشاغل انى اشيل عنك اى تعب
اشيله انا مش مشكله لكن انت لا
انت مش حبيب ولا زوج وبس
انت أكتر من كده بالنسبالى
احمد : ( بيبوس ايديها ) وانتى كده وأكتر بالنسبالى وانتى عارفه
نوران : عارفه يا حبيبى ... تيجى أعملك مساج
احمد : انتى نسيتى انك ..... يعنى لسا كم يوم ههههههههههههههههه المساج بيقلب بقلة ادب ف الاخر
نوران : هههههههههههههههه ااااااااااه طب والله كنت ناسيه . ايوه والنبى فكرنى كل شويه كده لاحسن لما بشوفك بنسى نفسي
احمد : لا عييييييب نلم نفسنا بقا شويه عشان ايه .. عشان . عشان احنا لازم نلمها فعلا ههههههههههههه
نوران : طب خلاص خلاص ماتزقش ياعم . استنى هقوم احط الاكل ف الميكرويف اسخنه عشان برد
احمد : ماتجيبيه كده وخلاص واعملى شاى
نوران : هشششش بقا انا هظبطك . غير انت هدومك على ما اخلص
احمد : اشطات
نوران : مهلبيات
..............
( تانى يوم ف معمل تحاليل مشهور ف المنصوره )
احمد : لو سمحت حضرتك كنت عاوز اتأكد من التقرير اللى ف الكشف ده مظبوط ومطابق لصوره الاشعه ولا لا ...
دكتور : طيب حضرتك ادفع الرسوم وهات وصل على ما اتأكد لحضرتك
احمد : حاضر يا دكتور ...
...........
( بعد 30 دقيقه )
دكتور : للاسف يا استاذ احمد التحاليل مظبوطه والتقرير النهائي مظبوط جدا ومطابق لصوره الاشعه اللى مرفقه مع التقرير .. يعنى صاحب الحاله دى فعلا عنده نفس اللى ف التقرير . كانسر ووصل لمرحله متدهوره جدا
احمد : طيب يا فندم انا عاوز حضرتك ف استشاره صغيره كده
دكتور : اه تمام اتفضل
احمد : هو ايه اعراض الكانسر ده . يعنى لما ييجى لحد ازاى اكتشفه وازاى احس بيه وازاى يبان على الواحد
دكتور : بص ! هو الكانسر ده للأسف مرض مش سهل احنا بنقول عليه مرض خبيث لانه فعلا خبيث . بييجى كده مره واحده وبينتشر بصوره مرعبه ف سرعه مذهله
اعراضه معروفه . زى مثلا وقوع الشعر او انك تطلع دم من بؤك
احمد : طيب من ضمن اعراضه الدوخه وانك ممكن تبقى ماشى وتقع لوحدك كده
دكتور : اه طبعا من ضمن اعراضه .. هو بياكل ف الجسم ومناعته وبيفقد الواحد كتير من قدرته
احمد : هل ممكن حاله باللى تقريرها قصاد حضرتك دى تبقى طبيعيه وتكون بتضحك وبتهزر وكأنها مافيهاش حاجه ؟
دكتور : ممكن ! ده على حسب نفسيتها هى وشخصيتها . وممكن محدش معرفها او قايلها وبالتالى مش شاغله نفسها بالتعب او المرض . لان 60 % من احساس الواحد بالمرض بيبقى وهم ... انك واهم نفسك انك مريض .. فهمتنى ؟
احمد : ايه ؟ اه حضرتك تمام فهمت . متشكر جدا
دكتور : العفو ده شغلى ومتأسف لصاحب الحاله دى . متأسف لحضرتك جدا
احمد : أعمار يا دكتور الحمد لله .. الحمد لله ( بيخرج مهموم وزعلان جداااااا )
...................
( بيروح لمعمل تانى يتأكد وبيتقاله نفس الكلام )
................
( وائل بيتكلم ف التليفون مع واحد اسمه عبد الله )
عبد الله : الو ! ازيك يا وائل بيه
وائل : ايوه يا عبد الله . ايه الاخبار
عبد الله : دخل معملين يا كبير وخارج من عندهم وشه مهموم ومكسور كسره ما يعلم بيها الا ربنا
وائل : كده السمكه بلعت الطعم ... بقولك ايه . هو فين دلوقتى ؟
عبد الله : ع المشايه . ماشى تايه كده بالورق معاه وساكت
وائل : طيب انا نص ساعه هكون ف المنصوره انا واميره اختى . عينك عليه لغاية ما اجيلك
عبد الله : عيونى يا كبير
وائل : بقولك ! لو جد جديد ابقى ابعتلى ع الواتس ماتتصلش بيا عشان اميره ماتعرفش حاجه
عبد الله : فاهم يا ريس .. مستني معاليك
....................
وائل : ميرو ! بسرعه قدامك دقيقتين تلبسي فيهم احلى طقم .
اميره : ليه يعنى ؟
وائل : البسي بس ومالكيش دعوه محضضرلك مفاجأه وف المنصوره مش هنا
اميره : والنبى يا وائل سيبنى دلوقتى
وائل : ههههههههههههههه يلا يابنت الهبله اخلصى . ده احمد هناك ومستنيك
اميره : احمد مين ؟
وائل : بسرعه بس وهفهمك ف الطريق
................
( ف العربيه اميره ووائل وشايفين احمد قاعد ع الكورنيش وشه للنيل )
وائل : اميره ! زى ما اتفقت معاك . هو محتاجلك دلوقتى . مراته تعبانه جدا وعندها مرض وحش . محتاج كلمه حنينه من حد صدقينى هو دلوقتى ضعيف ولو قدرتى تكسبيه ف اللحظه دى مش هينساك وهتفضلى معلقه ف دماغه على طول ومش بعيد يطلب يتجوزك
اميره : نوران ؟ نوران تعبانه ؟ انت بتتكلم بجد ؟
وائل : اه والله وهو لسا متأكد من الكلام ده من شويه
اميره : وانت عرفت منين ؟
وائل : واحد معرفه شغال ف معمل تحاليل من اللى راحوله كان بيدردش معاه وعرف انه من البلد عندنا ولما خد وادى معاه ف الكلام عرف ان الحاله مراته . وكلمنى يعنى من باب انى ابقى عارف
اميره : تصدق زعلتنى ... البت دى ماتستاهلش كده . حرام عليك وجعت قلبى
وائل : احنا قولنا ايه بقي . قربى منه دلوقتى يمكن يفكر فيك . انا يهمنى دلوقتى اكتر من اى وقت انك تقربى منه وييجى يطلب ايدك .. انزلى يلا
اميره : حاضر . وانت هتروح فين
وائل : انا هلف شويه هروح المعرض والمخزن وهبقى اروح .. انتى خليكى مع احمد وروحى معاه
اميره : خلاص اوكى
وائل : اه بس بقولك ... اوعى ثم اوعى تعرفيه حاجه او انك تعرفى حاجه عن موضوع مراته ده . اوعى
اميره : لا لا ماتقلقش ودى محتاجه كلام دى ... سلام بقي
...........
( ع الكورنيش )
اميره : احححم ! ايه اللى جابك هنا ومقعدك هنا
احمد : اميييييييره ؟ انتى كويسه ؟
اميره : ههههههههههههه قولى انت ايه اللى جابك هنا انت بتراقبنى ولا ايه يا واد انت
احمد : براقبك ليه ؟
اميره : اصلى من الصبح ف المنصوره هنا مع زمايلى وكنا بنلف شويه كده وكنا مروحين بس ببص بالصدفه كده لقيتك سيبتهم ونزلت ايه ده انت مال عينك كنت بتعيط ولا ايه ؟
احمد : لا لا ابدا ده شويه عفره دخلت ف عينى ودمعت غصب عنى
احكيلى انتى اخبارك ايه واخبار صحتك
اميره : بخير والله يا حمودى كويسه طول منا شايفاك
احمد : ( بيبصلها وساكت )
اميره : اول مره اقولك يا حمودى وماتشتمنيش وتقولى حمودك مين
احمد : ( بيبص ع البحر )
اميره : انت يا واد بكلمك
احمد : ايوه يا اميره سامعك
اميره : طب ايه هتسيبنى واقفه كده . اتاخر شويه
احمد : تعالى اقعدى ريحى جسمك
اميره : انا كويسه يا بابا بومب
احمد : ( بيبصلها وساكت ) ياستى ربنا يجعلك كويسه على طول
اميره : طب انا جعانه
الروايه ملك ل بيدج هو وهى وصفحة الادمن الشخصيه فقط
احمد : هههههههههههه اعوذ بالله . انتى بتاكلى اكل بلد بحالها ومابيبانش عليك بتودى الاكل ده فين نفسي افهم
اميره : انا كده جسمى طول عمرى كده باكل ومابتخنش . مش زي ناس
احمد : ناس مين ان شاء الله انا حلو وزى الفل اهو . عضلات يابنتى عضلات
اميره : هههههههههههههههه اه ماهو ده اللى مجننى . طول عمرك مز ياض انت
احمد : اومال لو شوفتى اصحابي بقي حاجه كده وهم هههههههههههههههه عيال حلوه بغباء
اميره : اصحاب مين قصدك عماد يعنى بلا خيبه يا عم
احمد : هههههههههههههههه لا حمو . كنت حاكيلك عنه زمان وعندك صاصا ومالك وشلة عيال ضايعه كده بس جدعان
اميره : ااااااااااااااااااااااااااه حمو . والنبى نفسي اشوف حمو بتاعك ده اللى كنت مزهقنا بيه ...
احمد : بلاااااااااش لو شوفتيه هتحبيه
اميره : ههههههههههههههههه لا انا بحبك انت
احمد : احححم ( صعبانه عليه ف كل كلمه بتقولها وساكت ) لا لا لو شوفتيه هتحبيه دنا ذات نفسي بقوله انى لو كنت بنت كنت اتجوزته هههههههههههههه
اميره : اكيد مش دمه خفيف زيك
احمد : هههههههههههههههههههههههه لا دنا متعلم خفة الدم منه
اميره : ولا عيونه حلوه زيك
احمد : ههههههههههههههههههههههه لا عيونه احلى
اميره : خلاص عرفنى عليه واتجوزه هههههههههههههههههههههه هو مرتبط ؟
احمد : ايه ؟
اميره : بقولك هو مرتبط يا عم
احمد : مين ؟
اميره : حمو ده مرتبط طالما عمال تشكر فيه ههههههههههههههه
احمد : لا مش مرتبط . لسا مش عاجباه واحده دايما يقول انا لسا مالقيتش اللى تدخل دماغى
اميره : وحياتك لو شافنى لاجننهولك يابنى انت ماتعرفش قيمتى ههههههههههههههه. المهم قوم بقا نتغدى ولا مش عاوز تعزمنى
احمد : ايه ؟
اميره : نفسي ادخل معاك مطعم كده حاطه ايدى ف ايدك وتشد الكرسي وتقولى اتفضلى يا ميرو وتقولى تشربي ايه وتاكلى ايه . ايه ياعم كتير عليا ؟
احمد : صعبانه عليه جدااااااااااااا وعينه بتتحرك ف الدموع بس بيلحق نفسه ) لا والله نفسي . طب قومى يلا هندخل نتغدى سوا . اللى انتى عاوزاه هعملهولك ياستى
اميره : ايه الرضا ده كله . قلبى هيقف
احمد : بقولك ايه بلاش لعب باعصابي مال قلبك
اميره : حلو ! حلو جدا ههههههههههههههههه يلا ياسيدى . صحيح ايه الورق اللى ف ايدك ده
احمد : ايه ؟ لا مافيش ده ورق كده تبع حد اعرفه واوصلهوله
اميره : ماشى ! يلا بينا ولا ايه
احمد : يلا
..........
( بيمشو ع الكورنيش وبتمسك ايده )
احمد : اححم شيلى ايدك يا ميرو كده ماينفعش
اميره : عشان خاطرى . يا اخى نفسي اجرب الاحساس ده مره واحده قبل ما اموت حرام عليك
احمد : يا اميره بس بقي
اميره : عشان خاطرى والنبى والنبى
...........
( بالصدفه هدير مع اخوها ف المنصوره وراكبه جنبه العربيه ولمحت اميره وهى ماسكه ايد احمد )
...............