تحرم علي الضحكه وانتي بالخفاء تبكين

البارت :5

البارت 5

لفت الهنوف وهي تسمع صوت عمها بدر
بدر بسخريه: اي صادق راحت الضيقه
جاء برق لجهتهم: الله يعطيني ثقتك ياشيخ
أمير ونظاره على الجارح الي جاء : ياهلا بولد العم تعال ياجعلني ماخلا منك موب مثل الرخمه هذا و يأشر على برق
الجارح وهو يجلس مقابل للهنوف: افا ليه وش مسوي
بدر وهو يجلس جنب الهنوف : ماعليك منهم مهابيل
الا ماقلت لي وش صار على شغلك
الجارح وهو يزفر: ابد طال عمرك الصقر ورجاله ذبحو اثنين من العسكر وبكرة بنصلي عليهم
الهنوف شهقت وحطت يدها على قلبها : ماتو ؟
الجارح وهو يناظر فيها ويغمض عيونه من شهقتها : اي ماتو شهداء ان شاء الله
بدر ناظر الهنوف وهو يشوف الدموع تجمعت بمحاجرها: ليه البكي ياعمي ؟
الهنوف بصوت باكي : اكره الموت ما احبه
الجارح عض على شفته من شاف دموعها : الموت حق يابنت عمي وكلنا بنموت
جات الشموخ وهي تلهث لانها دورت الهنوف ومالقتها: انتي هينا و انا ادور عليك يالهنوف آسف بالنيابه عن الكلام الي قالوه لك
بدر وهو يعقد حواجبه: وش الكلام الي قالوه لها يالشموخ
الهنوف وهي تنزل راسها: كلام حريم موب لازم تعرف
بدر وهو يناظر بالشموخ: وش الكلام الي قالوه؟
الشموخ بدت تقوله كل كلام عماتها من يوم ماجت الهنوف إلى اللحظه ذي
بدر وقف بعصبيه: انا اعلمهم ذلحين ماعاش من يتكلم عليك
الهنوف وهي تمسك أيد عمها بدر : لا ياعمي دخيلك فكنا من المشاكل خل الليله هاذي تعدي على خير انا مايهمني كلامهم ولا نظرتها فيني كيف المهم انت وجدي وجده و اعمامي غير ماعلي منه
بدر جلس وهو مقهور من تصرفاتهم : بشوف وش تالي هالليلة
الشموخ وهي تجلس جنب الهنوف: لا يضيق خلقك ياهنوف
الهنوف بابتسامه: ولا يهمك

<<《مكان جديد علينا》>>

كان يدخن وهو شارد الذهن جاه اتصال من احد العسكر

شتت إنظارة وهو ينفث الدخان من فمه : أمر طال عمرك
العميد محمد : وينك فيه ؟
فياض وعيونه على البنت : اراقب مستودعهم؟
العميد محمد : وش لاحظت عليهم
فياض وهو ينفث الدخان : معهم بنت عن مئة رجال تلبس ملابس رجال ومعها سلاح وتدرب على الرمي
العميد محمد بإستغراب : بنت ؟ ومن تكون ؟
فياض وهو يوقف على الصخرة : ايه بنت مادري من تكون لكن الواضح أن لها سلطه عليهم
العميد محمد: انتبه احد يكشفك وراقب المستودع واعرف لي البنت من تكون وليه معاهم
فياض بتزفيره وهو يخلل ايده بشعره : ابشر طال عمرك تأمر على شي ؟
العميد محمد: سلامتك
فياض بجمود : مع السلامة

ناظر البنت وكانت بدون غطاء ولابسه ملابس رجال وشعرها يوصل لين خصرها لونه بني أعجب بقوتها ومهارتها في التدريب على السلاح لكن الي مستغرب منه وش تسوي بنت بين رجال ؟
هز راسه يطرد الأفكار الي اجتاحت تفكيره عن هالبنت وهو ناوي عليها شي ورجع مكانه يراقبهم من بعيد

نرجع مزرعة الجد سليمان
تعشو الضيوف وتسامروا لين الساعة عشره ورجعو لبيوتهم
في المجلس عند الجد وعياله واحفاده
الجد سليمان بتساؤول : وين فياض ياسيف ليه ماتعشى معانا ولا حضر العزيمه ؟
سيف بتزفيرها: مدري وين اختفى قال عندي شغل وراجع ولحد الان مارجع
الجد سليمان بإستغراب: ليه وش هو شغله ؟
ذيب وهو يصب له شاهي : اليوم عنده مناوبه في الاستخبارات وماقدر يحضر معانا وانت تعرف طبيعت شغله متعب كثير له
الجد سليمان: الله يعينه
جهاد وهو يدخل : اخ يالتعب كرفت اليوم كرف ماهوب صاحي
برق وهو يتكي: ترانا معاك لا تنكر
جهاد وهو يخزه وقال بمزح : ايه معاي صادق ليتك ساكت بس وين معاي وانت بس جالس وتتأمر
برق وسع عيونه بذهول وهو يفز جالس : يالكذاب والله عارفين منهو الي يتأمر يهب في وجهك
تعالت ضحكات العيال على تعابير برق وهو منصدم
برق وهو يوقف : بروح للحديقه عند أمير من يجي معي
الجارح وهو ينفث الدخان : شوي ونلحقك

نرجع للهنوف كانت جالسه مع أمير ويلعبون شطرنج هي وتالا ونجد جات لينا وهي تخز الهنوف
لينا بنظرات استصغار: وش تسوين مع اخوي عجبتك الجلسه معاه تراه رجال إذا انتي ناسيه ومره ثانيه تغطي عنه ترى موب محرم لك
نجد بإستغراب: وش فيك ترى عادي وأمير لسى صغير
تالا بعدم اهتمام : اقول خلينا نكمل لعب هاذي ماعندها شي غير المحارش
لينا بغضب : انا الي ادور المحارش؟ عشان ابغيها تتغطى عن اخوي لان ماعندها من يربيها على الحشمه والستر
الهنوف وهي توقف وعصبيه: احترمي نفسك وانا متربيه احسن منك مليون مرة ولا تدخلين فيني سامعه ياقليلة العقل
لينا بسخريه : هه وش اتوقع من وحده امها راميتها علينا اكيد انها بنت شوارع ولا مافيه ام ترمي بنتها اكيد انك مانتي بنت

الهنوف بصدمه من كلامها الي جالسه تطعن في شرفها وانها بنت شوارع وانها بنت صايعه ولا تعرف الحلال والحشمه والستر وانها موب عذراء وتشكك في شرفها وأن احد لمسها من قبل وامها تبرت منها صحت من تفكيرها من الكف الي جاء لينا

انصدمو من اليد الي عطت لينا كف اختل فيه توازنها من قوته
بدر بعصبيه: بسسس لحد هنا وبسس فاهمه سكت عنك احترام ل اخوي خالد لكن انتي الي ماعرفو يربونك الهنوف اشرف من كلامك يا قليلة العقل فاهممه

لينا مصدومه من الكف الي احرق خدها ناظرت في الهنوف : هذا الي تبغينه يابنت عائشة قولي هذا الي تبغينه تفرقين بينا صدقت عمتي فوزيه يوم قالت انك حيه من تحت تبن
بدر بعصبيه : لينا انقلعي من قدام وجهي لا اكفر فيك
راحت لينا وهي تتوعد في الهنوف
بدر ناظر للهنوف بعصبيه: وانتي ليش ساكته لهم ليش ماتدافعين عن نفسك وشرفك ؟ شفتي لن شفتك ساكته لهم لعنت خيرك سامعه ولا لا ؟
الهنوف وهي تنزل راسها: انا واثقه من نفسي والواثق لا يُبرر
بدر صفق يدينه بعصبيه وطلع لمجلس الرجال
أمير ناظر الهنوف بحزن: انا اسف بالنيابه عن لينا مسحيها بوجهي هالمرة
الهنوف بإبسامه: ولا يهمك عادي
نجد بنرفزه من لينا: انا مدري كيف متحملينها غثيثه هالبنت
تالا وهي تجلس تكمل لعب : ماعليكم منها هي بس تدور الي تهاوشه ومالقت في الوجه غير الهنوف و أمير
نجد بتأفف: صدق انها غثيثه مدري وش شايفه نفسها عليه
الهنوف وهي تلعب : ماعليه بنات اتركوكم منها خلونا نكمل
جاء برق وجلس معاهم وعيونه على نجد: وش تسوون ؟
تالا ناظرت فيه بعصبيه : وش تشوف مثلاً جالسين نرقص ؟
برق وسع عيونه فيها : اوف وش فيك معصبه ؟
أمير ناظر بسخريه : ابد ياطويل العمر جات لينا وسوت دراما هي و بدر وراحوا
برق رفع حواجبه بذهول : ليه وش صاير ؟
تالا قالت ل برق كل شي بالحرف الواحد وعن كلام لينا للهنوف وطعنها في شرفها و اتهامها بتربيتها وعن ظرب بدر لها وعصبيته على الهنوف
برق ناظر للهنوف وهي منزله راسها وتلعب بكاسة الشاهي : تصدقين يالهنوف
الهنوف رفعت راسها وناظر فيه بمعنى " وش "
كمل برق : انتي على نياتك وقلبك طيب بس الي بيعيش بينا لازم يقوي قلبه وشيل الطيبه منه لان اغلب الأشخاص المتواجدين بينا شيطان على هيئة انسان وانتي لا تسمحين لحد يتمرد عليك وقفي كل شخص عند حده نصيحتي لك يابنت العم
نجد اردفت وهي تناظر الهنوف: ونصيحتي لك لا تثقين في احد
الهنوف شتت اظارها وهي تشوف الجارح وجهاد مقبلين لهم
الجارح وهو يجلس وانظاره على الهنوف : سلام
ناظرو فيه ماعاد الهنوف : وعليكم السلام
الجارح ناظر في الهنوف وتذكر شكلها في الملحق وعض شفته يوم حطت عيونها في عيونه
جراح بينه وبين نفسه :
"(عيونك تكحلها وربي يوم سواها مكحلها
ماتدري وش تسوي فيني نظراتك وعيونك )"