تحرم علي الضحكه وانتي بالخفاء تبكين

البارت:22

حسابي انستقرام : "(wiir_14 )"

البارت:22
طلع من البيت ، وشاف برق عند سيارته ، ولف شاف الشموخ جايه من سيارة ابوها ، والواضح انها تاخذ لها غرض منها ، ناظر فيها لثواني، وشد على عقاله الي بيده ، وصد عنها و ركب سيارته ودخل جهاد بجنبه: وش بلاك ياولد روق وروقنا معك ، وعمتك ذي قد ماتقدر تجاهلها ، وتجنب طريقها ، هي اصلاً كلنا على بعضنا ماتطيق شوفتنا ،
شغل هياف السياره ومشى متوجهين لكوفي : انا ماقاهرني الا هي وبنتها ، عسى الله يبت حيلهن اي والله
كتم جهاد ضحكته والتفت لجهة الشباك : الله لايجعلني عدو لك اي والله
هياف وهو يضرب الدركسون بيده ويشتت انظاره: والله لو بيدي لذبحها، ولو اني من الشموخ خنقتها بشال الي على رقبتها ، عساها لشلل اي والله "يقصد عمته فوزيه"
جهاد بتزفيره يناظر فيه : يابن الحلال هد أعصابك وروق الله يرضى عليك ، وهد السرعة ترى ماني بعايف نفسي ، تموتني بعز شبابي
هياف لف عليه وضحك منه ، هو وين و جهاد وتفكيره وين : الله يخلف عليك بس
جهاد بإبتسامه: اي ياشيخ من اول اضحك ، والله من يوم ركبت معك ماغير اتشهد ، واقراء الأذكار
لف هياف عليه وضحك: جهزت كفنك ولا باقي ، ترى بزيدها لو ماتسكت
جهاد بضحكه: سكتنا حيل الله اقوى
ضحك هياف وأشعل له سيجارة: بعد مانطلع من الكوفي بنروح لفياض ترى قبل العائلة تجيه ،
جهاد ناظر فيه وعقد حواجبه: انت جاي ومخليه لحاله ؟
هياف وهو ينفث الدخان: لا ، خليت فارس عنده مناوب عني ، أصر علي الا ارجع للبيت ارتاح وانام ، لكن مامن راحه
جهاد وهو يناظر جواله: أصيل فارس والله ، غريبه؟
هياف ناظر فيه ورجع يناظر الطريق: وش الغريب ؟
عقد حواجبه جهاد : رائد متصل فيني ٦مرات ، الله يستر ، ليكون فيه شي
هياف وهو يمد يده يقصر على صوت المسجل: دق عليه شوف وينه ؟
دق جهاد عليه وثواني ووصله صوت رائد: هلا جهاد
جهاد وهو يناظر ب هياف الي يأشرله يحطه سبيكر : هلا والله ، متصل علي؟
رائد وهو يناظر في فياض : ايه ، اتصل في الجميع محد يرد علي وحسبت فيكم شي ، ورجعت اتصلت فيك لكن مامنك رد ،
جهاد بضحكه: حسيبك الله ياشيخ ، وقفت قلبي حسبتك فيك شي انت ، ماقلت لي وش بغيت ؟
رائد بضحكه: والله لو اقولك الخبر الي بيفرحك لتجيني ركض ؟
عقد جهاد حواجبه بإستغراب: ليه وينك انت ؟
رائد بتنهيده: بالمستشفى ، فياض صحى قبل شوي
ضحك جهاد ورفع حواجبه بذهول : احلف ؟؟
رائد وهو يشد على يد فياض: والله ، وازيدك من الشعر بيت ، جالس قدامه بعد
جهاد ناظر بهياف الي ملامح تعبر بالفرح والسرور : جاييك ذلحين
رائد بإستغراب من الأصوات الي عنده : وينك انت ؟
جهاد بضحكه: والله انا مع هياف كنا متوجهين للكوفي ، لكن ذلحين تغيرت الخطه جايينك
عقد رائد حواجبه: هذا موب على ساس رايح للبيت بيرتاح وينام ، وراه يمتر الشوارع ؟
هياف بضحكه: ماحصلت لي راحه ، حصلت كفوف ابوي مستقبلتني من عند الباب والله
رائد بضحك : ليه وش انت مسوي ؟
جهاد بضحكه: حصلت مشاكل بغيابك
رائد بضحكه: اووف ، شكل فاتني الكثير
هياف بطقطقه: لا ياحبيبي ولا يهمك مابيفوتك شيء بإذن الله ، بحصد الكفوف الي زرعها ابوي بوجهي على وجهك ، انتظرني مسافة الطريق
رائد بضحكه : انتظرك ياحبيبي ، جيبوا لي قهوة معاكم وانتم جايين ،
جهاد بطقطقه: يالله بس عطيتك وجه بزيادة
رائد بضحكه: يلا ذلحين بسكر الدكتور يناديني ، مع السلامة
هياف وجهاد: مع السلامة
و انزلوا متوجهين للكوفي لجل ياخذون منها قهوة