تحرم علي الضحكه وانتي بالخفاء تبكين

البارت:16

البارت: 16

عند نجوم دخلت عليها امها وهي تشوفها بكامل كشختها وجالسه على السرير واضح انها متوتره قربت منها وهي تجلس على طرف السرير : مبروك يابنتي مبروك
نجوم وهي تفرك يدينها : الله يبارك فيك
ام الجارح بابتسامه: ترى شاهين بيدخل يلبسك الخاتم ويشوفك
نجوم بتوتر وخوف : يمه ماله داعي يدخل
ام الجارح بإستغراب: ليه وش فيها لن دخل
نجوم وهي تشتت انظارها: خايفه منه
ام الجارح بابتسامه: افا تخافين من شاهين ، هذا لن حطيتيه على الجرح يشفى مايخوف ، شاهين اطيب قلب ، صدقيني يحبك لو مايحبك ماكان اخذك شريكة حياته ، ادري ماراح تفهمين كلامي بس اذا عشتي معاه وعاشرتيه وقتها راح تتذكري كلامي ذا
نجوم وهي تهز راسها ب "اي" : متى راح يدخل ؟
ام الجارح وهي تناظر لساعة يدها : بعد ربه ساعة كذا ، اذا صرفوا العشاء راح يدخل عليك ، انا نازله ذلحين لضيوف شوي واجيك قبل يجي شاهين

----------------------------

عند الريجيل العيال طلعوا للمطبخ الي خارج القاعة فيه طباخين يطبخون العشاء دخلوا المطبخ وبدوا يصرفون العشاء لرجال والحريم صرفوه وطلعوا شايلين الصنايا حقت العشاء متوجهين لقاعة الرجال وبدوا يرتبون السفرة ويحطون الصينيه عليها
شاهين وخالد وسلطان والجد سليمان وسيف جالسين يرحبون بالضيوف للعشاء
جاء أمير وقف قدام شاهين وهمس له : جده تقول يدخل يلبس نجوم الدبله ، الحريم راحوا يتعشون
شاهين بابتسامه: قل لها دقائق وجاي
أمير وهو يطلع متوجه لقاعة الحريم دخل الغرفه الي نجوم فيها : هلا والله بزوجة اخوي
جاء وجلس بجنبها ويناظر فيها : ارفقي بقلب اخوي ترى مايتحمل كل هالزين ألي عليك ، تراه خفيف يضيع علومه بسرعه اذا شافك بالشكل ذا
ام الجارح بضحكه : لو سمعك ذبحك صدقني
أمير بضحكه: ياخالتي تراه مغير يهايط مايقدر يسوي شي ترى
ام الجارح بضحكه: متأكد من كلامك ؟
أمير وهو يلعب بسبحته : متأكد متأكد ماعليك
ام الجارح وهي تضحك: اجل التفت وراك اذا انت متأكد
أمير التفت وهو مبتسم وتلاشت ابتسامته وهو يشوف شاهين وقف وهو مصدوم من وجوده ناظر فيه ورجع انظاره ل ام الجارح وهو يبلع ريقه : ش شاهين انت متى جيت
شاهين وهو يدخل الغرفه ويعدل شماغه: جيت يوم اني اهايط ولا اقدر اسويلك شي
أمير ابتسم بتوتر: انا متى قلت كذا ماقلت شي
شاهين ناظر فيه ورجع يناظر بنجوم الي معطيته ظهرها : انا قلت انت الي قلته ماقلت ، وذلحين انقلع من قدامي لكفر فيك
أمير من الخوف طلع يركض من الغرفه متوجه لمجلس الرجال
طلعت ام الجارح حتى تجيب الشبكه والخواتم لهم ، وتخليهم ياخذون راحتهم يتعرفون على بعض
نجوم يوم سمعت صوته تصنمت مكانها ماقدرت ترفع راسها او تلتفت صوب جهته من الخوف وتوتر الي اجتاحها ، قرب منها وجلس بجنبها وهو متوتر لأول مرة ينحط بذا الموقف ، التفت عليها وهو مصدوم من شكلها طلعت احلا من كل خيال كان يتخيل فيه شكلها ، شكلها بذي اللحظه صعب عليه يتحمله صعب كثير لأنه مايعرف يتعامل مع الجنس اللطيف وهو يشوف انها استحلت قلبه وفكرة بذي اللحظه ، مد يده ومسك يدها حس ببرودة يدها وهمس : نجوم
نجوم منزله راسها ومن التوتر والخوف شدت على يده
ابتسم شاهين: ليه يدك باردة ؟
نجوم مازالت منزله راسها وبدت الدموع تتجمع بمحاجرها لأول مرة تكون بالقرب منه بهالشكل
مد يده لذقنها ورفع راسها وناظر بعيونها : طالعي فيني
نجوم رفعت عيونها وناظر فيه ونزلت دموعها اول ماحطت عينها بعينه
شاهين بإستغراب منها: وش فيك ليه هالدموع؟
نجوم وهي تهز راسها وترفع اكتافها بمعنى "مدري"
شاهين وهو يحس برجفة يدها في يده: خايفه مني؟
نجوم وهي تشتت انظارها بعيد وتحاول تفك يدينها من يديه ، لأنها تحس انه يشد على قلبها مو يديها ، رفعت نظرها له ، وهي ترجف من قربه لها ، تخاف منه ، تسمع عنه انه عصبي وشديد وصارم ، ولهسبب تخاف منه
تعلقت عيونه بعيونها : خايفه مني ؟
نجوم وهي تنزل دموعها من نبرة صوته الحنونه ، تدري انه لطيف مع الأنثى لكن هي خوفها يتغلب عليها
هزت راسها ب"ايه" وهي تبكي ضمها لصدره يحاول يهديها : لا تخافين ، انا احن قلب عليك ، واقسى قلب على من يبكيك ويأذيك ، لاتبكين وانا حي يانجوم ، خافي من هالدنيا كلها يانجوم الا انا لاتخافين مني ، الي مثلي ينخاف عليه ، ماينخاف منه
نجوم شدت من ضمتها عليه وهي تحاول ماتبين له شي لكن صعب عليها رفعت راسها وناظرت فيه باس جبينها ومسح دموعها : شوفي شكلك خربتي عيونك بالدموع
وأشر على عيونها وهو مبتسم ولفها للمرايه وراها
ضحكت من بين دموعها على شكلها ، وناظرت بانعكاسه بالمرايه: كله منك خربت عيوني
شاهين انصدم : انا وش دخلني ، ولا خوفك مني يالخوافه
نجوم وهي تعدل عيونها : انت سبب كل هالخوف وتقول لي خوافه
دخلت عليهم ام الجارح والجدة خديجة و ام فياض وشروق ولينا وفوزية وعبير وفاطمة
الجده خديجة: هاتي الشبكة يا ام الجارح
جابت ام الجارح الشبكة ومدت الخاتم لشاهين أخذها منها وهو يلبس نجوم الخاتم ومدت ام الجارح الخاتم لنجوم أخذته منها وهي تلبس شاهين الخاتم
ام فياض بابتسامة: يلا لبسها العقد ذلحين
اخذ منها عقد الألماس ولبسه نجوم وابتسم : ما أحلى من العقد الا لباسه يام فياض
فاطمه وهي تضم نجوم : مبروك يابنتي مبروك وعلى قولت شاهين ما أحلى من العقد الا لباسه
لينا وهي تضم شاهين : مبروك ياعيون اختك مبروك
شروق وهي تميل شفايفها بمزح : والله لو كان زواجي مافرحتو كذا
الجده خديجة وهي تخزها : خليه يطق بابك بالأول
شاهين بطقطقه: منهو ذا الي امه داعيه عليه بياخذك
شروق وهي تناظر ام الجارح: اكيد انتي داعيه على نجوم يوم اخذت ذا ، وهي تأشر على شاهين
عبير وهي تناظر بشاهين: كنك طولت على الرجال ولا حلت لك الجلسه معها
شاهين باستعباط: والله ماودي اروح وانا اشوف قمراي بينكم جالس
نجوم ابتسمت بحياء وهي تنزل راسها من كلامه
لينا وهي تجلس جنب نجوم : بدينا بالغزل من ذلحين
فوزيه وهي تشوف اتصالات خالد عليها : ابوك من ساعة يتصل يدورك اطلع خلاص لبستها الشبكه تفضل من غير مطرود
شاهين ابتسم وهو يطلع متوجه لقسم الرجال