تحرم علي الضحكه وانتي بالخفاء تبكين

البارت: 7

البارت :7

نرجع لمكان ثاني عند فياض تخبى وراء الصخرة الكبيرة عشان ماتشوفه
كانت تتمشى وهاذي من عادتها اذا انتصف الليل راحت تتمشى وتكشف عن نفسها ووجهها لأنها ماتقدر تكشف عند الرجال موب محرمين لها
شافها تتوجه لمكانه وقفت عند صخره وجلست عليها وعطت فياض الي كان يراقبها بهدوء ظهرها نزلت العمامه عن راسها وفلت شعرها الطويل الي يوصل خصرها وجلست تتمايل به كان يراقبها و انذهل منها وهي تعبي السلاح من الرصاص ، كانت حاسه ان فيه احد يراقبها ، لكن اخذت حذرها ، وكانت بتصعد التله لكن يد فياض كانت اسرع وهي تسحبها لجهته ، حط يده على فمها عشان ماتصرخ ، وظهرها ملاصق صدره وحط السلاح عند راسها عشان يخوفها منه ، حاولت تفلت نفسها لكن فياض أقوى منها
فياض بهمس : اشششش ، وش تسوين بأخر اليل لوحدك بهالمكان
لفت راسها لجهته وظهرها ملاصق لصدرة وهي تناظره بخوف
اخذ سلاحها من خصرها وهو يحطه بخصره عشان ما تغدر فيه وتصوبه
فياض بهمس : بشيل يدي من على فمك ، واياني واياك تطلعين صوت ، لأني بكل دم بارد بفضي المسدس براسك سامعتني؟
هزت راسها "ايه" بخوف من نظراته ، لها هاذي اول مرة تخاف فيها من نظرات احد
نزل يده من على فمها وعيونه في عيونها والمسدس مازال في رأسها
فياض بهمس وحدة : مين انتي ؟ وش تسوين بالمكان ذا ؟ وليه لبسك ملابس رجال ؟
ناظرت فيه وتصنعت القوة قدامه : وايش دخلك فيني؟ مالك شغل ، شوف دربك وخلني اكمل طريقي
فياض رفع حواجبه وحط المسدس بجنب راسها : جاوبي على سؤالي لفرغه براسك
ناظرت فيه وخافت منه لان ملامحه واضح انه معصب : ليالي ، اسمي ليالي ، انت وش اسمك ؟
ناظر فيها وقرب منها : ليالي اسمك اها ، وش تسوين بالمكان ذا ؟ وليه ملابسك كذا ؟
خافت ليالي انه يكون واحد من أعداء ابوها
ليالي بنظرات ناعسه : انت من تكون ، وش تسوي هنا ؟
فياض وعيونه بعيونها وبكذب : انا عابر سبيل جيت أزور صديق لي مريض بالحي الموجود خلف التله ذيك
وقلت اتمشى اشوي أفضفض عن نفسي ولمحت ظلك هنا
ليالي عقدت حواجبها بإستغراب: وعابر السبيل ، ماله اسم يعني ؟
فياض شتت انظارة عنها وبتنهيده : خليني غريب عنك يابنيه ، افضل لك ولي ، لأنك لو عرفتي من اكون ماوقفتي وقفتك ذي قدامي
ليالي بإستغراب وسخريه: وليه ؟ من تكون ؟
فياض سئلها عشان يضيع موضوع معرفتها له ويحقق معاها بخصوص تواجدها وليه ساكنه مع المجرمين رجال الصقر : ماقلتي لي ، وش تسوين آخر الليل بالمكان ذا ، ماتخافين على نفسك ؟ ماعندك اهل يخافون عليك يسئلون عنك ، وينه ابوك عنك مافقدك ماحس بغيبتك ؟
ليالي بحزن شتت انظارها عنه: متعوده على الوحده ماعندي اهل ولا خوات ولا اخوان ولا احد ما اعرف احد غير ابوي ساكنه مع ابوي لحاله وابوي صار له اسبوع ونص مادري وين أرضه من سماه
فياض بإستغراب: ليه وينها امك ؟ وشلون ابوك يتركك وانتي وحيده ؟
ليالي نزلت راسها بحزن : امي ما اعرفها كل ماسئلت ابوي عنها يقولي راحت وتركتنا واذا سئلته عن أهلنا يضيع الموضوع كنه مايبغيني اعرف عنهم شيء كنه يخبيني عنهم وعشان كذا انا أحمل سلاح معي دائما عشان احمي نفسي
وقفت ليالي ولبست عمامتها وتلثمت: انا لازم اروح عطني سلاحي
ناظر فيها بجمود وهو يوقف : ابوك وش اسمه ؟
تلعثمت ليالي ماتدري وش تقوله قالت له وبكذب : سالم المنصوري هذا اسمه
وسع عيونه فيها بذهول يعرف انها تكذب عليه : اها بس على حد علمي سالم المنصوري ماتزوج لحد الآن كيف طلعتي بنته
ليالي بخوف انه يكشفها: انا لازم امشي طولت مع السلامة
فياض بنظرات ناريه لها : ليالي ، وش رايك نتلاقى مره ثانيه
ليالي وهي معطيته ظهرها: انا كل ليله اجي للمكان ذا ، تقدر تلاقيني فيه ، يا هه الغريب نسلم عليك
مشت وهي تاخذ طريق غير عن طريق المستودع حتى ما يكشفها
فياض ناظر فيها بتعجب وابتسامه كيف غيرت مسار طريقها
ضحك بداخله على ذكائه ، انه مايكشفها وهو عارفها انها بنت الصقر ، تكذب عليه لأنها تعرف ان أعداء ابوها كثيرين ، لكن مادرت ان فياض استخباري ، ويدري عن كل شي ، لكن كذب عليها عشان ماتكشفه
-------------------------
نرجع للمزرعة في بيت الشعر كانوا يتقهوون ويسولفون
الجارح وهو يشرب فنجاله ويجلس بجنب جده : جدي ابغي اطلب منك طلب و اتمنى ماتردني خايب
الجد سليمان بإستغراب: وش طلبك و ان شاء الله نقدر عليه يالجارح
الجارح بإبتسامه: اطلب يد الهنوف بنت عمي على سنة الله ورسوله زوجه لي ياجدي ، البنت وحيده ولا لها احد غيرنا ، وانت ولي أمرها ياجدي وطلبتها منك و اتمنى ماتردني
انصدمو كلهم من طلب الجارح ، وانه يخطب الهنوف
كلهم في حالت ذهول وصدمه ، حتى الجد سليمان
الجارح وهو يناظرهم ورجع انظاره لجده : هاه ياجدي وش قلت ؟
الجد سليمان بإبتسامه : والله هاذي الساعة المباركة ياولد لكن انت تعرف ان لازم اشاورها وهي عاد بكيفه بتاخذك ياهلا ومسهلا و اذا ما خذتك مالك نصيب فيها ياولد
الجارح بإبتسامه: حقها ياجدي تستشيرها و ان شاءالله ربي يكتب الي فيه الخير
الجد سليمان: ان شاءالله
قام الجد متوجه للبيت حتى يقول للهنوف
برق وهو يخز الجارح: طلعت حاط عينك عليها
ذيب وهو يصب فنجال قهوة: ايه و انا اقول وش بلاه من يوم جت الهنوف اثاريه طاح ومحد سمى عليه
الجارح بنرفزه: اقول اعقب انت وياه
برق وهو يشرب شاهي : ايه بنعقب ماعليه والله ونعم التربيه يالجارح تعرف تتكلم انت وجهك
بدر مصدوم لحد الان: انت صادق بطلبك ؟
الجارح بإستغراب: ايه ، علامي وش ناقصني
شاهين وهو يتكي: ناقصك عقل والله
الجارح بسخريه: تكفى عطني من عقلك الكامل
هياف قام من عندهم ودخل للبيت متوجه للمطبخ يسوي له شاهي بالليمون
--------------------
كانت موجوده بالمطبخ تسوي لها عصير برتقال عشان الزكام الي صابها من البرد وتعبت حيل
دخل المطبخ وهو يشوفها معطيه الباب ظهرها وتسوي عصير
هياف وهو يتنحنح: احم احم
لفت لجهت الصوت وانصدمت بوجوده طاح الكوب من يدها وانكسر شهقت بخوف وهي تشوف الزجاج مالي الأرض وهي واقفه
ركض لناحيتها وهو يمسك يدها ويرجعها للخلف عن الزجاج عشان مايجرحها ناظر فيها وشاف الدموع بمحاجرها: ماصار شيء يانظر عيني
ناظرت في الزجاج ورجعت انظارها عليه : ماكنت اقصد اني اطيحه وينكسر
هياف ناظر فيها : كله فدا راسك يابعد راسي
احس بليان في يده الي ماسكه يدها نزل نظره وشاف الدم
شهقت بصوت مسموع ونزلت دموعها من منظر الدم لان عندها فوبيا من الدم
هياف وهو ياخذ الإسعافات: تعالي اجلسي اعقم لك جرحك لا تخافين يانظر عيني
جلست الشموخ وجلس على ركبه يعقم لها الجرح مسكت ذراعه بدون شعور منها يوم حط لها المعقم رفع راسه وشافها مغمضه عيونه ودموعها تنزل عقم الجرح ولف عليه شاش وقف ويدها لازالت ماسكه ذراعه : خلصنا يالشموخ عقمته لك
رفعت راسها له وناظرت بعيونه وانتبهت انها متمسكه فيه تركت يده وقفت : مشكور
جات بتروح ومسك ذراعها ورجعها قدامه: بسئلك سؤال وجاوبيني عليه ، ليه كل مره اخطبك ترفضين ، وش الي ناقصني ؟
نزلت راسها من نظراته : انا توني صغيره على الزواج ، ويشهد الله علي انك مثل اخوي ، لا أكثر ولا أقل ، وانت الف بنت تتمناك ، لكن قلبي ماله هوى فيك
ناظر فيها وهمس بعصبيه: اجل لك هوى في من ؟
كانت بتتكلم وقطع كلامها دخول شروق عليهم
شروق بابتسامة خبث: اووه ، عصافير الحب في المطبخ كأن مكانكم غلط ؟
الشموخ وسعت عيونها في شروق وهي تتوعدها
هياف وهو معصب: فارقي عن وجهي لخلي عصافير جهنم تاخذك وتوريك وين مكانك الصح فارقي
كشرت شروق وهي تناظر في يد الشموخ شهقت من شافت الضماده: الشموخ وش فيها يدك ، ليش مضمدتها وليش الزجاج على الأرض كذا ، وش صار لك؟
الشموخ وهي تشتت انظارها عن هياف : طاح مني الكوب وانجرحت يدي لا تخافين بسيطه
طلعت الشموخ من المطبخ وراحت لغرفتها ركض وهي تبكي ماتدري ليش كل ماخطبها هياف ترفض فيه شي يمنعها من الزواج سواءً هياف ولا غيره لكن هي ما تحس بمشاعر تجاه هياف لا حب ولا إعجاب كل الي تعرفه انها ضايعه بالتفكير تخاف منه بس حنيته عليها في المطبخ طمئنتها شوي وهدى خوفها منه لكن قلبها ما ماله في هواه عشان تتزوجه هي تعرف انه يحبها ويحبها بشكل ماتتخيله لكن هي ماتكن له حب لكن فيه شي يجذبها له لكن وش ماتدري
--------------------
عند الجد سليمان دخل على الهنوف في غرفتها شافها على جوالها دخل وجلس على سريرها بجنبها
الهنوف بإستغراب: هلا جدي بغيت شي؟
الجد سليمان بابتسامة: جيت اشاورك في موضوع يابنتي واتمنى ماترديني
الهنوف عقدت حواجبها : موضوع؟ وش موضوعه ؟
الجد سليمان وهو يمسح على شعرها: الجارح طلبك للزواج على سنة الله ورسوله وانا من عندي أعطيته لكن الشور شورك بالأول والأخير وصدقيني منتي بلاقيه مثل الجارح
الهنوف وسعت عيونها في ذهول : ككيف ؟ طلبني انا ؟
الجد سليمان بابتسامة: اي يابنتي وصدقيني الجارح بيصونك ويحفظك اتمنى ماترديني خايب يابنتي
الهنوف بخوف: بس انا توني صغيره ياجدي وبدري على الزواج
الجد سليمان بابتسامة: مابه صغيره يابنتي والصغيره تكبر و انا يوم تزوجت جدتك كان عمرها 16 سنه وانتي ذلحين عمرك 21 سنه وهاذا افضل سن لزواج استخيري وانا جدك وعطيني رايك إذا رجعنا لرياض
الهنوف نزلت راسها: بستخير وارد لك خبر وأن شاء الله بالي يسر خاطرك
الجد سليمان وهو يوقف : يالله يابنتي حنا بنمشي لرياض بعد الظهر رتبي اغراضك وجهزي نفسك عشان ما نتأخر
----------------------
مكان ثاني في حي يوجد فيه مستودع الصقر ورجاله كان يراقبهم من بعيد ورن جواله ورد عليه
فياض بجمود : سمّ
فارس بتزفيره: وينك فيه انت؟
فياض وهو يشوف ليالي تدرب : اراقب مستودع الصقر
فارس بحده : لي ساعه ادور عليك ، ارسلي موقعك العميد محمد ارسلني اراقب بالنيابه عنك
فياض بهدوء: زين ، دقائق وارسله لك
فارس : انتظرك
سكر منه وهو يرسل موقعه لفارس عشان يراقب بالنيابه عنه ويروح يرتاح لأن اهُلكت طاقته بالمراقبه والسهر والتعب والإرهاق ارهق نفسه بالتفكير في" ليالي "وش بيكون مصيرها مع الصقر ورجاله والي مستغرب منه شلون الصقر يترك بنته بين رجال وهي كل العيون عليها لأنها بنت شلون يثق فيهم وليش يدربها على السلاح والقتال وش هدف الصقر من ذا كله

لا تنسون التصويت حبايبي