تحرم علي الضحكه وانتي بالخفاء تبكين

البارت:29

احسابي في الانستقرام"(wiir_14 ) "

قراءة ممتعة حبايبي 💛💛

البارت:29
انصدموا من تواجده في المجلس هالوقت ، والمصيبه الكبرى عليهم لو عرف بالي صار بيقوم قيامتهم ومابيرحم احد منهم بيصب غضبه عليهم
تقدم جهاد بإبتسامه مصطنعه يمسك يده: تعال معي حبيبي ابغي اكلمك
شاهين بهدوء ابتسم رغم توتره وخوفه : نورت المجلس ، بس تعال معنا نشوف العشاء وش صار عليه ومنها ودي اقولك على شي
مرر انظاره على جهاد وشاهين بإستغراب من تصرفاتهم وكلامهم ، وبذات كلمة " حبيبي " الي قالها جهاد لأن مايقولها الا ووراره شيء بس ما اهتم ، ورجع انظارة على المتواجدين في المجلس ، لكن الي استغربه ملامح العيال وجده وعمانه الي واضح عليها التوتر والخوف ، هز راسه ب"زين" لجهاد وشاهين ، لف بيطلع مع جهاد وشاهين ، لكن استوقفه كلام احد الضيوف ل عمه سيف : يابو فياض ، يعني حددتو ملكت بنتك بعد شهر ؟
سيف بصدمه من السؤال الي توجه له ، بوجود هياف ، رفع انظاره ل هياف الي مازال معطيهم ظهره ، واردف بهدوء يحاول انه مايناظر هياف ابد ، وانه مايهتم لنظرات هياف له اول مالتفت لهم : مابعد حددنا ، ناخذ برأي البنت اول ، والله يكتب الي فيه الخير
لف هياف بصدمه وذهول على شاهين وجهاد ، يحاول يستوعب الكلام الي قالوه ، لكن نظرات جهاد له تأكد له الكلام ، وانه صحيح ماهو كلام عابر وبس
شاهين يحاول يتدارك الموضوع قبل يتهور هياف بحضور الرجال ، لأنه ماراح يهتم لا بضيوف ولا بغيره ، مسك يده يحاول يسحبه معه ويحاول انه يطلع من المجلس : تعال هياف ابغيك
رفع هياف يده يستوقف شاهين وهو يمرر انظاره على الرجال الي سأل سيف ، وهو رافع حاجبه الأيمن : وش جالس تقول يامصلح ، من هي ملكته الي تتكلم عنها
مصلح بابتسامة وحسن نيه : الشموخ و..
قاطعة الجد سليمان وهو يأشر لجهاد وشاهين : جهاد شاهين أخذوا هياف وتفقدو أحوال العشاء إذا خلص ولا
استغربوا الرجال مقاطعة الجد سليمان لمصلح ، لكن ماهتموا له وانظارهم على هياف وجهاد وشاهين الي يحاولون انهم يطلعوه من المجلس
جهاد وشاهين فهموا على جدهم ، وسحبوا هياف غصب عنه ، الي كان يحاول انه يتفلت منهم ، وطلعوه من المجلس متوجهين للملحق ، دخلوه غصب عنه وهو كان يحاول يتفلت منهم لكن هم اثنين وهو واحد ، وببنية اجسادهم قدروا عليه
دفه شاهين على الكنب بعصبيه: اهجد ياهياف اهجد لاتفضحنا في الضيوف
هياف وهو يوقف ويمسك شاهين بياقة ثوبه وهمس بعصبيه ويشد على ياقة شاهين بيديه بقوة يحاول يتدارك غضبه بهاللحظه : قول لي ذلحين الشموخ من الي بيملك عليها؟
شاهين وهو ينفض يدين هياف منه : بالنهايه ياهياف مالك دخل في حياة البنت ، اتركها وشوف حياتك
جهاد وهو يناظر جواله: هياف بفهمك كل شي بس موب ذلحين ، خلنا نرجع للمجلس قبل يطلعون علينا كلام
هياف ضحك بقهر وغبنه: اي كلام الي مهتم فيه هاه قولي اي كلام ، اخر مرة اسألكم اثنينكم ، الشموخ من الي حاط عينه عليها ؟
شاهين تكتف بهدوء وخوف على ان هياف يسوي شي : حتى ولو عرفت من هو الي بيملك عليها وش بتسوي ، غير انك تفضح نفسك وتفضحها وتطلع عليكم كلام مايرضيك ولا يرضيها ، مثل ماقال جهاد بنفهمك كل شي بس بوقته
هياف وهو يشد على يده بقوة وانظارة على شاهين الهادي ، وهمس بصوت خفيف: قلت لك منهو ؟
جهاد بتزفيره وهو عارف عناد هياف واصرارة الي بيضيعه ويضيعها معاه : يوسف ولد خالتها ، عرفت ذلحين ولا باقي
لف انظاره هياف على جهاد بصدمه وذهول وعيونه واضح انها تشتعل غضب : وش ؟
شاهين تقدم من هياف: مثل ماسمعت ، يوسف هو الي بيملك عليها ، وذلحين دامك عرفت ، اهجد خل الليلة تعدي على خير
دفه هياف بقوة حتى صدم بجهاد ، وتقدم للباب والغضب مكتسي وجهه : اي خير الي تقوله ، والله لهد حيله الي خلاه يفكر فيها والله
جهاد وشاهين تقدمو منه بسرعة ومسكوه قبل لايطلع ويتهور ، مسكه شاهين مع ياقة ثوبه ودفه داخل الملحق: مجنون انت ولا علامك ، بتفضحنا في الرجال
تقدم هياف منه بعصبيه وحاول انه يبعده عن الباب : والي قالك اني صاحي من ، ابعد ياشاهين عني احسن لك دام النفس عليك طيبه
جهاد مسكه من ذراعه ورجعه داخل : هياف اهدا وحاول انك تفهم ، الغضب والجنون ماهي من اطباعك
قفل شاهين باب الملحق وسحب المفتاح وحطه بجيبه ، واردف بعدها: طلعه من الملحق منت بطالع وبنجلس معك بعد ارتحت ذلحين
لف هياف انظاره على جهاد ومحاجرة تحترق من الغضب ، وقد مايقدر يحاول يهدي رجفت يديه عنهم: جهاد انت عارف حال قلبي ياجهاد ، لا تخليها تروح مني ، لاتحرق قلبي بالنار ياجهاد
جهاد وهو مافي يده حيله ولا قوة : هياف الشموخ ماتدري عن شيء نهائي ، وعمي سيف ماتكلم ولا قال شيء ، الي حدد موعد جدي ، وهو قال لهم بعد شهر ، اذا وافقت الشموخ حياهم الله ، وأن ماوافقت الله يسهل دربهم مالهم عندنا نصيب
شاهين بتنهيده وانظاره على هياف: وذلحين اهجد ، واهدا ، واكيد الشموخ بترفضه
لف هياف انظاره على الباب وتقدم من شاهين: عطني المفتاح ياشاهين
شاهين وهو يعقد حواجبه : ليه مهبول انا اعطيك اياه ، وين بتروح ، عشان تفضحنا في الرجال ؟
هياف وهو يخبي يديه في جيب ثوبه لان رجفته صارت واضحه اكثر من قبل : لا لا ، بروح ل الشموخ اتكلم معها
شاهين بعصبيه: وشو ؟ تروح ل الشموخ؟ ، انهبلت الظاهر ماعاد فيك عقل ، اهجد وخل الليلة تعدي على خير ياهياف
تقدم جهاد بخطواته ل هياف ، يحاول يهديه : هياف وانا اخوك وش الي جالس تقوله ، بصفتك وش تروح لها ؟
هياف وهو ينزل عقاله وشماغة ويرميها على الكنبه وبغضب : بصفة قلبي وحبه لها
شاهين ناظر فيه : اوكي تحبها ماختلفنا ، بس البنت ماتحبك ليه ماتفهم ؟!
جهاد لف انظاره على شاهين بصدمه من كلامه ، أشر له انه يسكت ، لأن هياف الواضح عليه انه مايتصرف بعقله ، إنما بمشاعر قلبه وعواطفه ، ومشاعرة تغلبت و طغت على عقله بهاللحظة
تقدم هياف بغضب وهو يأشر على صدر شاهين جهته اليسرى بالتحديد " قلبه " : وش تسوي بهذا لا حب شخص وهو مادرى عنك قولي وش تسوي ابه ؟!
شاهين مسك كتوف هياف وشد عليه : انزعه من مكانه ولا يرف لي طرف ، الحب يكون بطرفين ، ماهو بطرف واحد ، والبنت شيلها من راسك وقلبك ، لأنها لو تحبك مارفضتك اكثر من مرة ياهياف
جلس هياف على ركبه بقلة حيله ، انهد حيله ، وصارت رجفته توضح عليه ، وطغى ألم قلبه عليه والم مشاعره بهاللحظه ، وضرب بيده الأرض بغضب وعصبيه: احبها ياشاهين احبها احبهاااااا ، وش اسوي بقلبي قول ، وش تبي مني اسوي ؟ اذبح نفسي ولا اذبحها ولا اذبح يوسف ، وش اسوي ؟
جلس شاهين على ركبه قدام هياف وهو يمد يده يضربه على صدره : اقطع القلب من معاليقه ولا تترك حبها يسيطر على عقلك مع قلبك ، لا تترك حب فاشل يهدمك ، وانت تستاهل الي احسن منها ،
مد جهاد يده وشد على كتفه بخفيف: شاهين معه حق ياهياف ، لا تضعف عشان حب فاشل وتهدم حياتك
ضرب هياف يده على الأرض بغضب وعصبيه: الله يلعن قلبي ويلعن حبها ياجهاد ، الله يلعنه ، قولي وش حيلة العاشق ياجهاد وش حيلته ؟
شاهين وهو يناظره ويحاول يهديه ويتدارك الوضع قبل لايتطور : اسمع نصحيتي لك ، انا اخوك وتهمني مصلحتك ، قوم معي ذلحين بنرجع للمجلس عند الرجال ، وحاول قد ماتقدر ماتبين مشاعرك وتأثرك لحد ، وحاول تبين لهم وبالأخص الشموخ ، ان الموضوع مايهمك ، لاتكسر غرورك وكبريائك عشان بنت ياهياف
ضحك هياف بقهر ووجع : ايت كبرياء تتكلم عنه ، الحب مافيه مكابر وكبرياء ياشاهين
جهاد بهدوء وهو يشد على يده: صدقني ياهياف ، كلام شاهين منطقي وعين العقل ، ومعه حق في كل كلمة ، كابر لو انه على حساب نفسك ، بس لا تضعف
هياف نزل راسه وشد شعره وبهمس: اتركوني لحالي
هز شاهين راسه ب"زين " وهمس لجهاد: انا بطلع وانت خلك معه ، لا تتركه
تقدم شاهين للباب وافتحه وطلع متوجه للمجلس عند الرجال وتركهم خلفه
جلس جهاد بجنب هياف وتكى بظهره على الكنب الي خلفه ، وانظاره على هياف الي ماتحرك لو شبر وعلى نفس وضعيته ، لكن الواضح انه مو منتبه لوجوده لأن نظراته لآخر مدى ، والواضح انه يفكر بالشموخ
لف هياف على جهاد بهدوء وهو يبتسم بحسره: والله ياجهاد ما بقى " ليه " فالأرض ما شالها صدري ، ليه قلبي ماحب الا هي ، ليه هي تصد عني وعن قلبي ، ليه يصير في قلبي كذا ، ليه مو قادر ابعدها عني وعن تفكيري ، ليه قلبي مُخلص لها رغم تقصيرها ، ليه جيت المحبه ، و انا الي كنت احلف ماتبع دروبه ولا أقرب منه
تنهد جهاد وهو ينزل راسه: والله ماودي اشوفك بهالحاله ، لكن أنساها ياهياف ، وربي بيرزقك الي احسن منها
ضحك هياف بحسره: لو جربت ماكان ذا كلامك ياجهاد
هز جهاد راسه ب"ايه" وزفر بخفيف: ماجربت ، لكن شفت ، والشوف يكفي عن التجربه
غمض هياف عيونه بألم في قلبه وهو يكتم الآه بقلبه لاتطلع : النار تحرق من وطاها ياجهاد ، ولاهو بيدي عشان انساها
وقف جهاد بهدوء: قوم أرواح للمجلس ، ومثل ماقالك شاهين ، لاتبين مشاعرك وتأثرك لحد
هز هياف راسه ب"زين" ، ومد يده لجهاد عشان يقومه ، ولبس شماغه وعقاله وطلعوا من الملحق متوجهين للمجلس ،