البارت: 9
بالمركز عند هياف وجهاد كانو جالسين يسولفون والدوام على نهايته
وقف جهاد وهو يمرر انظاره على هياف الي جالس والواضح انه في عالم ثاني: هيه ولد
ناظر فيها هياف : وش عندك ؟
جهاد وهو يوقف : وش رايك نروح نتمشى نغير جو ؟
هياف وقف وهو ياخذ جواله : يالله مشينا ، احتاج اوسع صدري ضايق
طلعوا من المركز متوجهين لأحد حدائق الكوفي جلسوا على احد الكراسي وهم يشربون قهوة عربيه
جهاد وهو يناظر في هياف الي متغير : وش بلاك؟ حالك متغير ، وش مضيق صدرك؟
هياف وهو يخلل ايده في شعره الي يوصل لتحت رقبته : اه ياجهاد ، تعبان من هالقلب ياخوك
جهاد بتزفيره وأساء : وش بلاه هالقلب ياهياف ، ليكون طحت في طريق الحب ؟
هياف وهو يرفع راسه للسماء ويغمض عيونه : طحت ، طحت ياخوك ولا حد سمى علي
جهاد شتت انظاره بحزن : طريقه صعب ، ليتك استخرت قبل تمشي صوبه
هياف فتح عيونه وناظر بالفراغ : والله اني حالف ماتبع طريق الحب ، لكن غصب عن خشمي قلبي دلني عليه ، وليته مادلني
جهاد ناظر فيه : ومنهي الي رمت سهم حبها في قلبك ؟
هياف ابتسم بسخريه على قلبه : الشموخ ، هي الي رمتني بسهم حبها
جهاد رفع راسه يناظر بهياف الي نزل راسه وهو يفتح بكت دخانه وشعل له سيجاره : اطلبها من ابوها اذا تحبها صدق
هياف وهو ينفث الدخان : ومن قالك اني ماطلبتها ، طلبتها ثلاث مرات ورفضتني
جهاد عقد حواجبه: وليه ترفضك ؟
هياف ابتسم بسخريه: تقول انها مالها هوى فيني ، قلبها مايهواني ولأني بصوبه حتى
جهاد هز راسه بإساء على حال هياف : الله يعوض قلبك ياخوك
سكت هياف وهو ينفث الدخان من فمه وهو ناوي يخطبها من عمه وتكون بينهم ولا احد يدري غيرهم الاثنين
-----------------------
نرجع لبيت الجد سليمان كانو بالمجلس يسولفون دخلت عليهم الجده خديجة: سلام عليكم
ردو كلهم : وعليكم السلام ورحمة الله وبركاته
سليمان بابتسامة: ارحبي يالغاليه تعالي مكانك جنبي
ابتسمت الجده خديجة وجلست جنبه
بدر يمثل الحزن : ايه ياخواني ، احنا لنا الله وخديجة دائماً بالاحضان ، ترى انا اخر العنقود حطوني بالاحضان احتاج حنان ، بس من وين يجي
شاهين بضحك : راحت عليك يابدر ماعاد لك مكان
برق بطقطقه: ايه ، ماعاد لك مكان ، جدتي راحت دبه انحفي ياجده يمكن يجي ل بدر مكان بينكم
الجده خديجة شهقت: انا دبه يالصامولي ؟
العيال ماتو ضحك على تعابير وجه الجده و برق
الجارح بدفاع: برق لحد هنا وبس ، والله انك قمر ياجده ماعليك منهم
الجده خديجة وهي تبتسم: ايه هذا الكلام الزين ، اسمع عندي لك بشاره
الجارح عقد حواجبه: بشارة ؟ ولي انا ؟ وشهي؟
الجده خديجة بابتسامة: الهنوف وافقت عليك وتوها عطتني موافقتها
الجارح بذهول وفرح : احلفي ؟ قولي والله ؟
الجده خديجة بابتسامة: والله ومبروك ياولدي منك المال ومنها العيال الله يوفقكم ويسعدكم يارب
الجارح بابتسامة وفرح : الله يبارك فيك
رائد بطقطقه: اركد ياولد اشوي وتطير ماخبرناك خفيف أثقل ياولد أثقل اهم شيء الثقل
الجارح بنرفزه: ياشيخ اذلف عني قال ايش قال أثقل
الجد سليمان بابتسامة: مبروك ياولدي
الجارح بابتسامة: الله يبارك فيك
خالد وهو شرب فنجال قهوه: ومتى ناوي تملك ؟
الجارح بإستعجال : بعد صلاة العشاء الساعه 9 عشان يمدي العيال يتجمعون
ذيب بضحك : ياولد وش مستعجل له اركد واثقل لا تصير خفيف الرجال يكون ثقيل
سلطان وهو يضحك : مبروك ياولد مبروك ، دق على المملك وخله يجي
بدر وهو يزفر: الله يعين بنتاخي من ولدك ياسلطان
سلطان ضحك وهو فاهم قصد بدر واردف الجارح وقال : ليه وش فيني ؟
بدر ناظر فيه ومد يده يصب له شاهي: مهبول و انا عمك ، نقول خلك ثقيل واعقل ، تصير خفيف لو يشوفك رئيس شغلك مايصدق ان هذا الجارح الي يمدح فيه عند سلطان
الجارح وهو يوقف ويأخذ جواله : ايه ، بكرة لاتزوجت اذكرك لا تقول الا وانت مجرب
طلع وهو يتصل على فياض لجل يقوله يجي يحضر ملكته ثواني ووصله صوت فياض: هلا بالجارح
الجارح والابتسامة على ثغره : هلا فياض ، وينك ؟
فياض وهو ينفث الدخان الي سبب له ربو : بالمزرعة أمرني ، بغيت شي؟
الجارح بإستغراب من نبرت صوته : فياض ، وش فيه صوتك؟
فياض ببرود: سلامتك تو صحيت من النوم
الجارح وهو يشتت انظاره: متى بتجي ؟
فياض بهدوء: مدري ، على حسب شغلي ، عندي مناوبه اليوم
الجارح نفس الهدوء : زين ، بغيت اقولك ان ملكتي الليله على الهنوف
فياض ببرود : مبروك
الجارح بهدوء: الله يبارك فيك ، ماودك تحضرها معنا
فياض بنفس الهدوء: المعذره ياولد العم ، مقدر عندي مناوبه ، وبالنسبة لي مهمه المناوبه ذي ، ولا اقدر احضر السموحه
الجارح بتفهم : عذرك معك ، المملك وصل لازم اسكر تأمر على شيء
فياض ببرود : سلامتك
الجارح بهدوء: مع السلامة
---------------------
نرجع لمستودع الصقر كانت جالسه بجنب النار وهي تحركها وتفكر فيه ، له يومين وهو لاحس ولاخبر ، قال لها نتلاقى مرة ثانيه ولا له وجود ، خافت ليكون صابه شي ، وسرعان ماطردت الأفكار من راسها : وش بلاك ياليالي ، اصحي على نفسك ، لا تفكرين فيه ، هو مجرد عابر سبيل راح بدربه ، الله يستر عليه
كان يراقبها من بعيد هو وفارس ويشوفها جالسه وسرحانه والواضح انها تفكر
زفر بخفيف: مدري شلون ابوها تركها بينهم ، كيف مايخاف عليها ؟
فارس جلس بجنبه وخلل ايده بشعره: الي مايخاف الله شلون بيخاف على بنته ، هي ماقالت لك متى يرجع الصقر؟
فياض بسخريه: قصدك ابوها سالم المنصوري على قولتها ، ماتدري أرضه من سماه وين
ضحك فارس غصب عنه من سخريت فياض على ليالي: ودي اعرف شلون قدرت تكذب الكذبه ذي ، ومن وين تعرف سالم المنصوري؟
فياض ابتسم بسخريه : كذبت عشانها تعرف ان أعداء الصقر كثير ، وهي خايفه عليه ، وسالم المنصوري من أشهر المحامين ، ومعروف بين الناس والمحاكم وكلً يشهد له ، وهي استغلت الفرصه وانسبت نفسها له
فارس وهو معجب في شخصيتها : والله البنت ذي موب سهله انتبه منها ، تعجبني الجرائه الي فيها ، جريئه مره
فياض وهو يتكي على فارس : لا تخاف ، اخذ كل احتياطاتي منها
----------------------------
نرجع لبيت الجد سليمان سكر من جواله وهو يناظر المملك يوم دخل وخلفه جهاد وهياف الي تو دخلو البيت توجه لجهتهم وسلم على المملك ورحب فيه ودخله المجلس ضيفوه وقامو بواجب وملك الجارح على الهنوف وتمت ملكتهم بخير وسلامة
سلطان بفرح : مبروك ياولد مبروك
الجارح بفرح : الله يبارك فيك يابوي
الجد سليمان: هاذي الهنوف يالجارح حطها بعيونك
الجارح بابتسامه: لا تخاف عليها ياجدي بعيوني وقلبي
هياف بابتسامه: مبروك يالجارح منك المال ومنها العيال
الجارح بسرور : الله يبارك فيك عقبالك اشوفك مملك
تغيرت ملامح هياف وهو يشتت انظاره : الله كريم ياخوك الله كريم
جهاد وهو يربت على كتف هياف : ربك كريم ياهياف لاتقطع الأمل خل املك بالله كبير
هز راسه هياف وهو يوقف وكانت انظار عمه سيف عليه وهو حاس بتغير هياف لكن مابيده حيله ولا يقدر يجبر بنته على شي ماتريده ولا الود وده يزوجهم لكن يحترم رغبت بنته وهذا حياتها وهي تقرر من يكون شريك حياتها
شاهين بابتسامه: مبروك يالجارح ولاتنسى الثقل خلك ثقيل
الجارح بابتسامه وسخريه: الله يبارك فيك ، وخل الثقل ل اهله
بدر وهو يدخل : مبروك ياعريس
الجارح بابتسامه: الله يبارك فيك ، عقبالك
-------------------------------
نرجع لهياف ركب سيارته وجلس فيها يناظر شباك غرفتها زفر لثواني فتح كبت الدخان وطلع سيجارة اشعلها وبدأ يتنفسها كأنه يبرد لهيب قلبه فيه شافها طلعت من باب البيت هي ونجد وشروق يجلسون في الحديقه يحبها ويموت فيها يعشقها وقلبه مانبض غير بأسمها لكن هي ماتحس فيه ماترحم حاله وحال قلبه
زفر وهو يطري على باله بيت شعر :
"( اشهد ان الحب من نوع البلاوي
كاتبه ربي على العاشق عقوبه )"
نزل من سيارته وهو يمر من عندهم وعيونه عليها وده تكون بقربه وبحضنه وفي بيته لكن هذا مصيرهم البعد ولو انه على البعد مجبور
شافته ينزل من سيارته وهو يلبس فروته ويعدل شماغه ويمر من عندهم وعيونها في عيونه تشوف الحب والشوق واللهفه في عيونه شافته يدخل بيت الشعر ويحط السيجاره بفمه ويشعلها وينفث الدخان تخاف عليه من الدخان انه يضره لان عنده ربو ، وماخافت على قلبه الي منشلع فيها ، كان ودها تروح له ، وتقوله كافي تعذب نفسك ياهياف ، وتاخذها من فمه وترميها ولا يضر نفسه ، ويهلكها بالتدخين ، لكن بأي حق تمنعه مالها حق ابداً
لا تنسون التصويت حبايبي 🤍🥲
أنت تقرأ
تحرم علي الضحكه وانتي بالخفاء تبكين
Mystery / Thrillerرواية سعودية تتحدث عن: استخباراتي يراقب عصابة المجرمين وهي مع مجرمين قتلوا ابوها وخطفوها وهي صغيرة وكبرت معاهم وتربت معاهم من وهي صغيرة وتلتقي معاه بالصدفة ، اما هو كان يراقبهم من بعيد لبعيد يشوفها و هي تدرب على السلاح والمبارزة وتلبس ملابس رجال ي...
