احباء تحت المطر ☔️

11

لو كنت ادري بمشاعرها ما قلت لها يا عناد ولا علمتها بس توقعت حبي لها من طرف واحد ما توقعت اختك تفكر فيني بيومها تذكر لما كانت صغيره وقالت بتزوجك وقلت مازح راح اخطبك بعمر 24 بس انا وقتها كنت صادق فيها واخذتها بجديه بس ما توقعت ان جود راح تربط نفسها فيني من يومها وتشوفني على هالاساس والله لو ادري ما جرحتها ياعناد ما كنت ناوي اكسر قلب اختك بس جاوبتها على سؤالها وقتها وما توقعت جوابي بيكرهها فيني
انت تدري ياعناد وعارف سبب زواجي وعمرها ما كانت غايتي وانت ادرا الناس بحبي لاختك بس قلت دام حبي من طرف واحد بتحمله لوحدي واكتمه بقلبي ما دريت ان فيه ناس منقهره من الي سويته ومحتاجه لتبرير مني
ويوم طلبتها منك لاني وعدت نفسي اتقدم لها بعمر 24 حتى لو كان وقتها مزح بنظر الكل بس سويتها بس انرفضت وتو ادري عن السبب
واما اتهامي لها لانها دعت علي من الحرقه الي بوسط قلبها دعوه مستحيل انسى منها حرف ''روح الله لا يوفقك ويكسر قلبك نفس ما كسرت قلبي وعذبته ''
توقعتها تنتقم مني وبتكسر قلبي ببنتي ما شفت قدامي وانا اتكلم بس طلع بالنهايه هي الي انقذتها ورجعتها لي
عناد تنهد من الي يسمعه والي لاول مره يدري فيه وعن حب اخته لسيّاف كان يشوفها حزينه وتبكي وكم مره يسألها وما تعطيه اجابه صريحه توه يعرف انها كانت تتألم بسبب شي واحد كانت تعاني من خيبتها وكسر قلبها لوحدها وهو ما يدري
عناد نطق بهدوء؛وانت مازلت تبيها؟
سـيّـاف؛اكذب لو قلت لا بس حتى لو ابيها فيه اشياء تمنعني عنها
عناد؛ غير رفضها وش الي يمنعك؟
سيّاف؛الي اقوى من رفضها ياخوك بنتي حور
عناد؛ وش فيها؟
سيّاف ؛رافضه فكرة اني اتزوج من الاساس خايفه اني من اتزوج الهى عنها واخليها
عناد ؛ راح اسوي المستحيل عشان اجمعك بجود كنت رافض لاني ما كنت اعرف بمشاعر جود لكن الحين لا انا بنفسي برجعها لك
سيّاف ؛ وش بتسوي؟
عناد؛ خلها علي ومن ناحية حور لا تشيل هم هي طفله ومصيرها تتقبل فكرة زواجك بس الاول نغير الفكره الي حاطتها براسها عن الزواج وهالشي ما نقدر نسويه الا بموافقة جود
سيّاف؛ لا تعطيني آمل ياخوك وتحبطني
عناد ؛قلت عندي لا تشيل هم
قام ؛ ارتاح انت الحين ولي زياره ثانيه لك
مشى بيطلع بس رن جواله طلعه من جيبه وشاف اسم المتصل التفت على سياف وغمز؛شكل ربي يحبك
سياف ناظره بعدم فهم
عناد فتح المكالمه؛ هلا جود
جود؛وينك؟ امي تقول ما رجعت للبيت من امس!
عناد؛ بالمستشفى
جود شهقت بخوف؛ شفيك!
عناد؛ لا تخافين ما فيني شي جاي ازور سيّاف
جود من سمعت اسم سياف وقلبها يفز بخوف عليه نطقت بسرعه وهي ماهي مدركه لنفسها ؛ شفيه سياف؟
عناد تكلم هو بخير صاير له شي ؟
عناد وهو كاتم ضحكته عليها بعد الجوال عنه وغمز لسيّاف؛ جسينا النبض شكل وضعنا اسهل مما نتصور
سياف ناظره بهدوء
جود ؛ عناد وينك تكلم سياف فيهه شي!!
عناد رجع الجوال لسمعه؛ متعرض لطعنه بالسكين
جود الي مو واعيه على حالها ولهاللحظه خوفها متملك منها ؛ وينه اي مستشفى؟!
عناد الي عاجبه الوضع ومسهل عليه اشياء كثير ؛ مستشفى ''Yeditepe Üniversitesi Hastanesi''
جود قفلت منه على طول وعناد ضحك وهو يناظر بسياف ؛ابصم لك بالعشره كلها ربع ساعه وهي محضره عندك
سيّاف؛ ليه علمتها؟
عناد حط يديه بجيب بنطوله وبهدوء؛ كثر الله خيرها اختصرت علي وقلت استغل الوضع من الحين
سياف؛ والله ينخاف منك يا عناد
عناد؛ هي بتجي تشوفك اكيد بس الباقي عليك لازم تعلمها بالحقيقه وتكسب قلبها من جديد
سيّاف تنهد ؛ الله كريم
عناد؛ المهم سمعت ان الشرطه بتجي تاخذ اقوالك حاول انك ما تفتح محضر وتطول السالفه وهي قصيره
سيّاف؛ لا تشيل هم حتى لو ما قلت لي بسوي هالشي مالي خلق لهالمواضيع
عناد؛ حلو اجل انا ماشي شكلي ما بلحق عليهم اذا صار شي والا شي لا تجيب لهم طاري عني
سيّاف؛كتفك؟
عناد ناظر يده؛ لا تشغل بالك اصابه طفيفه ما تحتاج
طلع من عنده وبعد طلعته بكم دقيقه وصل الضابط عماد دخل عليه وتحمد له بالسلامه وبدا يسأله وسياف يجاوبه بكل هدوء '
'
يتمشى بساحة المستشفى وهو شاد قبضة يده بغيض من فرط ضيقته وقهره بهاللحظه واردف بضيق؛ وش كنت تنتظر منها يعني ! يا غيث
علمني لا جد علمني وش كنت تنتظر وانت عارف ان قلبها ملك لغيرك!
ضحك بسخريه على نفسه وهو يضرب بقبضة يمينه على جزئه الايسر وتحديداً قلبه المكسور ؛ ليه اخترتها ليه ما نبضت الا لها ليه حكمت على روحي بالشقى والضيم!
ليه يا قلبي تحكم علي بالموت بكل مره اشوفها ليه!
مسح دمعته الي نزلت من فرط حزنه واستفاق؛ لازم انهي عشان اعيش لازم
سحب جواله من جيبه واتصل عليه ونطق بدون مقدمات اول ما فتح المكالمه؛ عناد اذا للحين باقي بالمستشفى ابي اشوفك ضروري
سكت شوي يسمع رده وكمل بهدوء؛ انا بساحة المستشفى انتظرك لا تطول
قفل منه بعد ما اتفق معه ناظر حوله بشتات وطاحت عيونه على نفس العياده الخارجيه الي من شافها فيها تأكد من تاثيرها عليه وفزة قلبه لها لأول مره وشعوره بحبه لها ينمو بداخله وعمق تاثيرها عليه من يلمحها ، هنا تعرف على مشاعره الي يحملها بداخله لها بعد التقائه فيها لرابع مره واردف بغصه ؛ هنا بنيت الاحلام معها وهنا اودعها '
'
تسريع الاحداث ~
طلع عماد من عند سيّاف على وقفته قدام المصعد الا انفتح وطلعت جود شافها وعقد حواجبه بإستغراب؛ جُود؟
جُود؛ عماد!وش جايبك هنا؟
عماد؛ جاي اخذ اقوال مريض هنا ، الا انتي وش الي جايبك؟
جُود حطت سبابتها تحت دقنها ومسحت عليه بتوتر ؛ جايه ازور قريبتي تعبانه
عماد بتصديق؛ اها ما تشوف شر
جُود زفرت بإرتياح لانه صدق كذبتها؛ ما يجيك سلم على ليليان
عماد وهو يدخل المصعد؛ يوصل
مشت بخطوات هاديه وهي تنتظره يقفل المصعد وينزل زفرت براحه وهي تشوفه نزل واتجهت على طول بخطوات سريعه للغرفه الي فيها سياف
وقفت قدام الباب وهي تغمض عيونها بقوه وتاخذ نفس بداخلها وزفرته
ضربت بقبضتها على الباب بخفه ومن سمعت صوته وهي تدخل عليه
سيّاف انصدم اول ما شافها داخله عليه همس بداخله؛والله وطلع معك حق يا عناد
تقدمت لناحيته بهدوء وهي تهمس؛الحمدلله على سلامتك
سيّاف؛ الله يسلمك ياجود
جُود طاحت عينها على مكان جرحه وهمست بخفوت؛فيني يارب
سيّاف؛ جُود
جُود رفعت نظرها له؛ نعم
سيّاف؛ ليه جيتي؟
جُود الي ما تدري كيف جت والا شلون ساقتها خطاويها له استفاقت على سؤاله وتوها تستوعب فعلتها استدارت
بتطلع بس وقفها صوته وهو يردف بنبرة ندم؛ اسف
جُود لفت عليه وبضيقه كاتمتها؛ على اي منهم الاسف؟
على ظلمك لي والا على تركك لي والا على تاثيرك على قلبي والا على دموعي الي نزلت كل ليله بسبتك،والي على جرحك الي خلاني افقد الثقه بشي اسمه حب؟ على اي منهم تعتذر وتتأسف؟
سيّاف الي تقطع قلبه من كلامها اردف بضيق ؛ عليهم كلهم يا جود وبالاخض على جرح قلبك الي سببته بدون قصد
جُود ضحكت بسخريه؛ ماني مسامحتك على الي عانيته
بسبتك ولا راح اسامحك يا سياف لا تعتذر لانه ما يفيد عذرك ولا راح يعوضني عن كل شي كسرته فيني
لفت بتمشي بس مسك يدها وسحبها له وجلسها مقابله
شهقت بربكه وارتعش جسمها من مسكته لها وبدت تتسارع دقات قلبها من قربه
اردف وهو يناظر بعيونها برجاء؛عطيني فرصه اعوضك عن الي سويته فيك!
جُود الي مو قادره تنطق ابتلعت ريقها بتوتر من حست بأنفاسهم الي تختلط ببعضها وبلعثمه؛ س سيّاف اتركني
..