عشق الرعد

عشق الرعد الجزء الرابع

الفصل السادس عشر

أدارت تسنيم الساعة ترى ما الوقت، حسنًا لقد خرجت أبكر من المعاد المتفق عليه لذلك قررت الذهاب للكافتيريا، وصلت هناك واحضرت شيء كادت تجلس لكن نفس الفتاة أشارت لها

اتجهت تلقي السلام وجلست معهم، اردفت سماوات : فينك يا بنتي معتش حد بيشوفك

ردت تسنيم بهدوء : بكسل انزل الصراحة وبعدين داخلين على رمضان ورمضان في قصرنا حاجة تانية

ضحك الجميع واردفت الفتاة صاحبة الخدود : ورمضان في شلتنا برضو حاجة تانية، شكلك كنتِ بتعيطي أصل عينك شبه عيني لما بعيط

رد أحدهم وهو يجذب مؤخرة عنقها : يعني أنتِ بتبصي في المرايا لما بتعيطي؟ هتتلبسي يا مجنونة

مسكت يده وهي تصرخ : صخر ايدك صعبة

مررت سماوات يدها على جبهتها : جو العشق المفقوع بدأ اهو، المهم في حاجة ولا ايه! قولي ومتقلقيش سرك في بير

ردت تسنيم بمرح : كده في بير

أكدت سماوات قائلة : طبعًا في بير يا بنتي، أصل احنا صحاب ومفيش حد بره نقوله

جذب أحد الشباب كرسيه ثم وقف وهو يستند عليه قائلاً : ورايا شغل، صخر ابقى خد اختك وصلها بقى

نظرت له تلك المقصودة بحدة سرعان ما تجاهلته وهي تنظر أمامها، فاردف : أنا من يوم ما اتلميت عليكم وأنا مقصر في شغلي وكل حاجة، متلويش بوزك يا ستي

ردت بحدة : اقعد

عاد يجلس بهدوء سرعان ما ضحكت سماوات وهي تقول : مش جوز الست بس هو بيحبها، تعالى اتجوزك اسمع مني، أنا احلى منها

عادت الفتاة تقول : خديه يا حبيبتي حلال عليكي

ما هذا! حقًا ما هذا! رن هاتف تسنيم ردت بكلمات بسيطة ثم ألقت الهاتف بغضب مكبوت، سألتها سماوات : خير، دا بوز من راجل نكدي معروفة

تسنيم بخفوت : أنا اللي نكديه، انا زهقت

بدأت سماوات تتحدث معها واقنعتها أن تتحدث، بالفعل بدأت تسنيم تخبرها مشكلتها والغضب يرتسم على ملامحها، تحدثت : أنا بس عايزاه يقول أنا محبتش نور، أنا اتجوزتها عشان اهلي مش اكتر، كل حياتي معاها كان واجب، أنا عايزاه يريحني بالكلام

مرر الشاب يده على ذقنه واردف : أنتِ مرات حد من ولاد رعد باشا الشافعي صح؟

أكدت برأسها فأكمل : طب ما دي سهلة ومعروفة، يعني أنا اسمع عن العيلة دي التدين الشديد، وطبيعي واحد متدين هيكلمك إزاي عن حياته مع مراته

تسنيم بعدم فهم : وضح عشان مش مستوعبة

رد محمود بهدوء : يا بنت الناس دا واحد كان متجوز واحدة وبينهم بيت وعيله وبيتقفل عليهم باب، حرام شرعًا يقولك ايه اللي كان بينهم