عشق الرعد

عشق الرعد الجزء الأول

الفصل التاسع عشر

تجمع عائلة الشرقاوي كلها في استغراب تام أن أحمد فعل وصية رغم صُغر سنه، جلس عاصم في استعداد أنه سوف يصبح الحنون على أبناء عمه لو لم يكتب عمه له شيء، زفر يوسف بحدة وهو يجد النظرات حول زوجته يرفضوا وجودها بينهم

هدير بضيق : هي دي ايه دخلها فينا عشان تقعد معانا

زهرة بحدة : اخرسي يا بت مرات اخوكي

هدير بانفعال : مفيش حد مرات أخويا غير زينة، اهو دا اللي ناقص الجربوعة دي تبقى مننا

ضغطت سيلا على أناملها بينما سحب يوسف يدها ووقف قائلاً : يلا قومي

زهرة : أنت رايح فين يا يوسف ؟ اقعد متمشيش

يوسف بحدة : لما تبقي تربي بنتك أبقى اقعد، أنا مراتي مش جربوعة قوم يلا

سيلا وهي تضغط على يده : يا يوسف خلاص

هدير بضحك : دا حتى هي شايفه نفسها كده وبتقولك اقعد

اقتربت سيلا تنحني لها هامسة : لا مش عشان شايفة نفسي كدة بس أنا مقتنعة إن الغيرة والحقد بيعملوا أكتر من كدة

فغر فاه هدير بينما اتجهت سيلا تجلس بجانب يوسف وتبتسم بخبث، تحدث يوسف باستغراب : قولتلها ايه ؟

سيلا : ملكش دعوة

يوسف : سيلا

سيلا بإبتسامة : يا عيونها

ضحك بخفة وهو يحاوط عنقها ثم قبل جبينها، دخل المحامي مع رعد الذي يتحدث معه، جلس رعد بجانب عشق التي تتجاهل النظر له

المحامي : مساء الخير، ازيك يا أستاذ يوسف

يوسف بإبتسامة : بخير الحمد لله، اتفضل

جلس المحامي وفتح الأوراق ثم اخرج ظرف يفتحه، بدأ يقرأ ما كتبه أحمد بخط يده
" بدون مقدمات، الوقت اللي هتكونوا بتقرأوا فيه الرسالة دي أنا مش هكون موجود، عشق عارف إنك أكتر واحدة هتزعلي عليا بس يا حبيبتي الحياة مش بتقف على حد، أنتِ في حياتك غيرك وأنا واثق ومتأكد إن اختارت ليكي الشخص الصح تكملي حياتك معاه، ازعلي وعيطي بس متزوديش الأمر عن حده، متزعليش على غالي عشان ميجيش أغلى "

عشق بمرار : دا على أساس في أغلى

أكمل المحامي " عمار عارف إن مخدتش حقك مني كامل بس معلش بإذن الله تتعوض لما ترجعلي أو لما أموت، أختك ومامتك أمانة في رقبتك، وأتمنى تعرف إن بحبك اوي برغم كل حاجة "

شبح إبتسامة ظهر على فمه وهو يقول " الكلب اللي عايز يورث "

رد يوسف تلقائي : دا أنا

المحامي بتأكيد : أيوة حضرتك، الكلب اللي عايز يورث

يوسف بضيق : في ايه هو حضرتك حبيتها