مـأوى الـزهـور

حلقة (3)

مــأوى الــزهــور 🥀
حلقـة (3) بقــلــم يــاســة

اشعر بالضياع داخــل روحــي
وكـانني في الفصل الأخير من الدنيـا
متعبـه الى أبعد الدرجـات
ومرهقه بكـثرة من الخيبات
تجربتي الاولى في هذه الحياة كانت تجربة قاسية
ولـكن هنـاك نداء يخرج من إعماق روحـي لينادي
  ( تـهـون شـمـا طـفـح مـيـزانـهـا تـهـون)

......................................

إمتنان :- وصـال مشنوقه بـالبنكة ونفسها مگطوع وما باقي بيها أي روح شلون صعدت شلون شنقت نفسها شلون ماتت وكُل هذا صار وأني ما حسيت

وگعت بـالگاع على ركبي ما اگدر اسيطر على نفسي المنظر اللي شفته دخلني بصدمة مستحيل اطلع منها بيوم من الايام ما صار غير كم ساعة من اجت وگعدت يمي و شكت حالها شلون هيج تموت بهاي الطريقة لا لا لا بعدهي صغيرة  بعده العمر گدامها مشافت شيء بحياتها ما عاشت أيام حلوة

البنات منهارات على الاخير الكُل يعيط الكُل يبچي الكُل مرعوب كُل إحنا صغار مو مال نشوف هيج منظر ولا نستاهل نعيش هيج رعب شنو ذنبنا نشوف هيج حدث مرعب وإحنا بهذا العمر

دخلن الموظفات كلهن مصدومات وياهن ست زكـية تباوع برعب بقت واگفه بمكانها حتى ما ترمش ما مستوعبه اللي جاي تشوفه مروا الدقايق علينا اذا اكول رعب شيء قليل هذا الوصف وراها  طلعونا إحنا البنات برى القاعـة و قسمونا بين الغرف الباقية بهاي الاثناء المـأوى انملئ بالشرطة والجيش طوقوا المكان وصوتهم يوصل عندنا شلون يسألون ويحققون ويا سـت زكـية وباقي الموظفين ساعة تجر ساعة وإحنا نبچي ومتوزعين بين الغرف لحد ما اخذوا وصـال شلون نزلوها شلون طلعوها ما اعرف ولا شفتهم كُل اللي سمعته اخذوها وقسم من الجنود انسحبوا من المكان وقسم بقوا بداخل المـأوى وبـالشارع متوزعيـن

صار الظهر وإحنا بعدنا نبچي خوف ورعب لا اكل ولا شرب حالتنا تبچي العدو سمعت صوت أذان الظهر وراها صوت سما تبچي قوي گاعدة بمكاني واباوع الها ما اگدر اگوم واشوفها ولا اگدر اتحرك من مكاني بچت بچت لحد ما تعبت يلا اجت حنان

حنان :- ليش تبچين كافي سكتي يلا حبيبتي لا تخافين كافي

سمـا :- جوعانة

باوعت الها ميته قهر شنو ذنبها هاي الطفلة ليش هيج يصير بيها ليش تعيش هذا الشعور وهذا الموقف رجعت حنان باستها وتگول لها

حنان :- يا سودة عليه حقج ما ماكله شيء وصار الظهر نسيت ونستني المصيبة هاي

غطت وجهها بحجابها وگامت تبچي هي تبچي وإحنا نبچي وياها شويـة ومسحت وجهها وگامت من مكانها وتگول

حنان :- راح اسوي اكل واجي لا تبچين بعد كافي سكتي

راحت اسوي الاكل وسما سكتت وايدها على بطنها الظاهر بطنها توجعها من الجوع بعدني اباوع الها وجان يجيني صوت مَرح وهي تعيط بكُل صوتها وتگول