مـأوى الـزهـور

حلقـه (63)

مـــأوى الـــزهور🥀
بقــلــم يــاســة الحلقة (63)

عندي جروح بس حسيت
جرحــك يختــلـف كلــه
فرزتك من أصابع أيد الهم بالشبة قله
يسألوني واگولهم راح لكن ما أخذ ضله
صورك يدرن شگد صار عايش بيهن أتمله
من اسألهن اشوفك وين يتنادسن شنگله
أنعاك بنفس مخنوك من يشاهد أحسله

...........................................

مـرح :- ريگته و طلع بالطرمة يلعب بالبايسكل و اني بقيت انظف بالغرفه الجوى شوية و صحت عليه يجي يم زين ما رد عليه طلعت اشوفه ليش ما يرد لگيت باب الشارع مفتوح رحت عليه كل ضني طلع يلعب بالباب بس ما لگيته بس البايسكل بالباب
و هو ماكو

إمتنان :- بس سمعت كلامها و گعت بالگاع اريد اتحرك ما اگـدر اريد انطق ماكو عيوني صارت على قاسم وهو اجى گعد على ركبه يمي بالگاع ويگول

-- بس على كيفج هسه ادوره انطيني مجال

-- وين تدوره قاسم احچي شنو الضامه عني احچي قاسم رد ابني وين

ما جاوبني گام سريع گمت وراه لزمته من ايده متوسلته

-- الله يخليك لا تلعب وياي هيج لعبه كل شي شفت منك و كل شي تحملت بس ابني لا ما اتحمل اموت والله اموت رجعليه ولا تعذبني وتعذبه

-- لج مو عندددي مووو عندي اخذووا اهذووووا

حچى هيج و دفر باب الشارع و طلع من البيت كله طلعت وراه مثل المخبله جريت ايده قوي و اگول

-- منو اخذه منووووو ابني وووين ابني ويين

-- دخلي جوى هسه اجيبه واجي

-- وين ادخللل قاسسسم وين

-- الله ياخذ قاسم الله ياخذ قاسم ادخلي اگووووولج

حچى هيج و سحبني من ايدي ورجعني للبيت دخلني للطرمه و صاح على مرح تجي عليه و سد الباب وراه قوي گعدت بالگاع
وبقيت اعيط كل صوت ولا الثاني و مرح گاعدة مقابيلي و ميته بچي

إمتنان :- بس فهميني ما شفتي منو اخذه بس احچي ما شفتي وين اخذووا

مـرح :- لا والله ما شفت جنت جوى وكل ضني يلعب بالطرمة مثل كل يوم ومن صحت عليه وما رد طلعت ادوره لگيت باب الشارع مفتوح و بايسكله باقي وحده دورت الشارع كله و رحت للأسواق و دگيت بيوت الجيران بيت بيت محد شافـه و من أيست من عنده اتصلت عليج و على قاسم

-- وين راح يعني وووووين

-- بس گومي جوى هسه ابوه يطلعه من جوى الگاع لا تخافين عليه گومي جوى

گومتني من الگاع و اخذتني جوى بالصاله
عيوني ما بطلت بچي و التليفون ما وگع من ايدي اتصل بـ قاسم و ارجع ليورة بس ماكو ما يرد

ساعه ساعتين ثلاث ساعات وهو ماكو
جنيت فقدت على الأخير طلعت افتر ادور بالشارع ادري بيه يم جماعة قاسم بس جاي اكذب على نفسي و تأمل احصله ويرجع الحظني مره ثانيه جنت ادعي واگول يارب يطلع تايهه بالمنطقة وهسه اشوفه وارجعه وياي