مـأوى الـزهـور

حلقـة (18)

بارت هديـة الرضاوي وعيون رضاوي بمناسبة عيد ميلادة كل عام والسيد الحلو بالف خير يارب انشوفـة بـ اعلـى المراتب ( مو تدلل ختام و أبنها)

مــأوى الــزهــور 🥀
بقـلـم يــاســة حلقـة (18)

إذا حــل لطف الله انقلبت النقم نعماً
وتحولت المحن منحاً وصار العسر يسـرا

...........................................

مَـرح :- بس راحت إمتنان ومصطفى رجعت للغرفـة مالتنا وگعدت بمكاني انتظر البنات ينامون حتى افتح التليفون گلت ما اتصل عليه بس افتحـه واشوفه يتصل لو لا مو بـ إيدي احس گـلبي هو يقودني ويتحكم بيه خلصت الوقت كله گاعدة واكل بـ أظافيري حتى عشاء ما تعشيت لحد ما ناموا البنات گمت تاكدت منهم الكل نايم والوضع تمام طلعت الموبايل وشغلته دقيقة واشتغلت الرسائل داگ عليه كومـة يمكن بالالف مكالمة ومن غير الرسائل

حيان :- الو وينج حبيبتي

-- ليش هيج وياي والله العظيم ما مجذب عليج بـكلمة وحده

-- الو وينج يعمري بس ردي

-- حبيبتي والقران تعبان ومشتاقلج وما جاي تطلعين حتى اشوفج ولا جاي تفتحين التليفون حتى احچي وياج

رسائل شكال والوان على طول الايام اللي ما حچيت وياه بيهم ومن بين الرسائل وحده كاتب بيها

-- مَرح والله العظيم مريض وجنت نايم مستشفى
وسويت عمليتين خلال هاي الشهرين بس ردي
و وعد بس اگوم على رجليه اجي اخطبج

احس گلبي انخمش عمليات اثنين مسوي اسم الله عليه شبيه ليش شنو السبب اريد اتصل بس ما اگدر وبنفس الوقت ما اگدر ابقى هيج احس انتهيت من القلق والخوف عليه نص ساعة تقريبًا واتصل هو حرت ارد لو لا گلبي يگول ردي وانطيه فرصة وعقلي يگول لا تردين عوفيه لحد ما يجيب اهله ويجي انتهى الاتصال ورجع مرة ثانية يتصل والقرار النهائي صار من نصيب گلبي وغصب عني رديت عليه ما حچيت بس فتحت خط واسمعه صوته جان تعبان وگوه يحچي مبين مريض فد مرة

حيان :- الــو

-- حبيبتي تسمعيني

-- الو مو احچي وياج تسمعيني لو لا

-- مَرح عمري وياي

مَـرح :- اي وياك

حيان :- اروح فدوة الصوتج مشتاقلج والله

-- لا تروح فدوة ولا هاي السوالف التعبانة اللي مالها نهايـة

-- مشتاقلج و روح أمي

-- الله يرحمها جابتكم و روطت المجتمع بيكم

ضحك بصوت عالي وراها گح ويـگول

-- لج ما اگدر اضحك عمليتي تأذيني

-- عملية شنو

-- اول شيء وگعت ميت من الالم طلعت المرارة ملتهبة ودخلوني عمليات وشالوها 15 يوم ورجع عندي الالم بس هاي المرة گمت انگز ما اعرف اگعد بالگاع رجعت للمستشفى بقيت ثلاث ايام ميقبلون اطلع وباقي على المغذيات لحد ما تأكدوا  عندي زائدة ورجعت فتت عمليات من جديد وهاي باقي نايم وانتِ ما ترحمين بحالي صايرة انتِ وعافيتي عليه