مـأوى الـزهـور

حلقه (58)

مــأوى الــزهــور🥀
بقــلــم يــاســة الحلقة (58)

من بناء لنا في الروح مقاماً
بنينا لـه فـي القلـب جنـــة
أطمـئن فـفي غيابك حقوق
الحـــب محفـــوظــة

.....................................

الحجيه :- يمه بعدج صغيرة و حليوه
و فاهمة ومرتبة حرامات العمر هيج يضيع منج خلي أحمد يطلگج من عنده و يصدق طلاگج بالمحكمة و شوفي دربج قابل تبقين كل طول عمرج هيج

صفنت بيها ما مستوعبه اللي جاي تگوله  وراها أبتسمت بقهر و رديت

إمتنان :- صدگ تحجين خالة ترديني اتطلگ من مثاب اللي ضَحى بعمره وبــ شبابه
و بــ صحته الخاطري ترديني اخذله من بعد كل اللي صارله بسببي اذا انتظرت سنه وسنتين وعشر وعمر كامل اني ما راح اوفي جزء من اللي سواه اللي راح يصير سنتين وهو بالسجن يتعاملون وياه معاملة المجرمين و يضربوا بدون رحمة وهو كل شي ما مسوي كل اللي سواه حبني
و تزوجني

خالة زوجي خسر امه بسببي و خسر صحته و سمعته اللي تلطخت بالسجون ومن طلع يسموا خريج سجون وخسر سنتين من عمره والله اعلم شگد بعد راح يبقى بالسجن الخاطري وتــالي اروح اتطلگ من عنده لو اعرف يموتني وارجع اعيش ويموتوني مرة ثانيـة و ارجع اعيش ما راح اسويها ولا افكر بيها بيوم من الأيام

بقت ساكته و الكل ساكت ويستمع بعدين ردت

-- والله مالي قصد بيها بس شفتج صغيرة وحلوة والدنيا بعدهي گدامج وهيج باقية متعوبه ومتبهذله و الف من يتمناج وما هان عليه تبقين بهذا الحال

-- ما دام ما طلعت من الطريق ولا سويت الغلط حالي يبقى افضل حال و ضعي افضل وضع و هذا اختبار من ربي الله والحمد لله على كل حال

-- الله يوفقج و يسعدج و يفك شدة رجلج ويطلع بسلامة آمين يا رب العالمين

سيد أحمد :- گلتي زوجج بسجن (...) مو

-- اي صح

-- تگدرين تنطيني اسمه الثلاثي و معلومات كاملة عنه بلكي اگدر احصل خبر لو اشوف احد من معارفي يسأل عليه

-- ياريت و الله تسويلي فضل شكبره

-- استغفر الله هذا فضل الله مو فضل بني آدم

-- شوكت تسأل عليه

-- باچر إذا الله سهل واذا حصلت نتيجة انطيج خبر اكيد

-- يارب

بقينا يمهم شوية بعدها استأذنا و رجعنا للبيت اني فرشت ونمت بالصاله و ام زهراء فاتت للغرفة نامت

وثاني يوم مثل كل يوم اروح للعتبة اخلص شغلي وارجع لليل و اجانا سيد أحمد ما دخل بالباب و حچى وياي

-- اتصلت بمعارفي و انطيتهم اسمة
و القضية اللي متهم بيها و إن شآء الله راح يشوفون الموضوع وإذا يگدرون عليه يساعدونا بيه