مـأوى الـزهـور

حلقة (11)

مــأوى الــزهــور 🥀
بقـلـم يــاســة حلقة (11)

الــزواج نصيــب والطـلاق قـرار
الحزن نصيب والفرح قــرار
وجود شخص في حياتك نصيـب
والأحتفاظ بـه او تــركه قــرار
كلنا لا نمتلك النصيب ولكن نمتلك القــرار
بيدك انتَ المصير امـا أن تكون ضحيـه النصيب
او تــكون ســيد القــرار...

..................................

راحـوا العمو وإني گلبي راح وياهم مستحيل اتحمل منا لحد ما يرجعون احس روحي طلعت من جسدي وراحت قبلهم الخوف موتني والقلق والتفكير ما بقوا عندي قوة .. يا تري راح يگدرون يقنعونه يوگف وياي راح يصير سندي الي ولو ساعه وحده لو راح ابقى هيج طول عمري

گاعدة مقابيل الساعـة واحسب بيها ثانية ثانية احس الميل ما يمشي ودگاتها ادگ بگلبي كل صوت يطلع من عدها يدخل بنص گلبي احس صوته يسوي تقلص بمعدتي وبــ بطني ساعـة ساعتين ثلاث ساعـات وهم بعدهم ما راجعين خاله أماني و كاثرين باقيات يمي بس يطمنن بيه ويهدني واني ماكو كلام يگدر يبرد روحي لحد ما انفتح الباب ودخلوا گمت من مكاني وركضت عليهم بكل سرعتي بس شافوني جايـة الهم ابتسموا على منظري شلون اركض

إمتنان :- بشرني عمو فدوة برد گلبي

داود :- تعالي جوى نحچي

حط ايده على كتفي ودخلني بداخل الصالـه وجوزيف وخاله أماني و كاثرين دخلوا ورانا

إمتنان :- احچي عمو والرب بعد ما اگدر اوگف على رجليـة

داود :- اول شيء رحنا على بطرس ودزينا على أسماعيل و وباقي الولد هم دزينا عليهم اجوا بيت بطرس وحچيت الهم كل الموضوع من اول يوم اخذج يحيى بــبيته لحد ما شمرج بالمأوى و ما اسولف الكم على صدمتهم وهم يسمعون باللي صار وراها حچيت الهم على عيشتج بالمأوى وشلون جبروج تزوج وشلون خلصوها وياج ضرب و اهانه وراها رحتي عشتي بيته وكل اوضاعج الصعبة حچيتها الهم بس ما جبت طاري الابنية اللي انتحرت ولا جبت طاري للكلام العصب اللي حچيته النه فقط سولفت على التجاوز والضرب وعن داومج وهذا هو وهسه همّ كلهم وياج وكلهم ضد يحيى يعني توقعي الفرع من اوله الى اخرة وياج والكل راح عليه من اول ما دخلنا وهو حار شلون يستقبلنا ويرحب بينا و وجه باقي ينطي الوان ما يعرف شلون ينهزم

حچينا وياه ورزلنا هذيج الرزاله بحيث لو يضم نفسه بقوطبه ما يخلص من الفشلة بقى يجذب ويطلع سوالف ما الها اي ربط الى ان الكل صار ضده والكل ماخذ موقف واحد هو يروح ويانا
وغصباً عليه من بعد اخذ وعطاء وموقفنا جان موقف حاسم وياه انجبر يوافق يروح ويانا والتفقنا باجر العصر نروح عليهم

خليت إيدي على گلبي ونزلت دموعي اذا هذا حلم ما اريد اصحى من عنده اريد ابقى احلم بيه احلم اني مخلصه من عنده وايامي السود ويا خلصت