مــأوى الــزهــور 🥀
بقــلــم يــاســة الحلقة (13)
توجــد فــي حيــاة الإنســان لحظــة غريبـة
لا يعرف كيـف يفسـرهـا ولا يـدرك سرهـا ابــداً
لكنهـا تصنـع كـل شـيء فـي حيـاتـة القـادمــة
..............................................
إمتنان :- حاولت اسكت عن الموضوع واتركـة ينزل من عندي بدون ما احد يحس عليه بس الالم موتني وبنفس الوقت الخوف اگل گلبي اكل ساعة وحدة وبعد ما تحملت تمشيت على خالة ودگيت باب غرفتها فتحت الباب والنعاس بعيونها جانت نايمة
أماني :- سلامات يوم بيج شيء
إمتنان :- بطني تأذيني .. حچيتها وبچيت
طلعت من الغرفة ولزمتني مشت بيه گعدتني بالصالة وتسأل شبيج ومنين توجعج وصار شگد توجعج وصفت الها مكان الالم وحچيت الها على الدم بسرعـة ركضت العمو گعدته و صاحت على جوزيف نزل من غرفته واخذوني للمستشفى طول الطريق ابچي من الخوف ومن الوجع ومن تأنيب الضمير لحد ما وصلنا للمستشفى دنيا لليل وسونار ماكو ودكتور الخفر ما اجت بقيت بـ إيد الممرضات يجيبوني منا ويرجعوني منا علگولي مغذي وانطوني مثبت
بقيت لحد الصبح بالمستشفى وجوزيف وعمو رجعوا للبيت بس خالة بقت يمي والصبح من اجت الدكتورة الاستشارية حولتني للسونار وطلبت تحاليل رحنا على غرفة السونار سووالي ورجعنا للمختبر سوينا التحاليل وراها رجعنا للدكتورة
الدكتورة :- الطفل تعبان ونبضه جدًا ضعيف والمشيمة نازلة ومفطورة لازم تنامين على ظهرج
وما تتحركين من مكانج درج ماكو رجال ماكو هذا علاج كتبته الج استمري عليه عشر ايام ورجعي اشوفج
اخذنا الراجيته وطلعنا من المستشفى بعدنا باب المستشفى وتلاگه ويانا جاي علينا يريد يدخل للمستشفى رجعت ليوره خايفة وهو وگف بمكانه ويباوعلي وراها باوع الخاله وگال
قاسم :- خير إن شآء الله شگالوا الكم خو ماكو شيء خطر
أماني :- الطفل تعبان والمشيمة نازلة تحتاج راح
رجع باوع إلي وحچى بهدوء
قاسم :- الحمدلله على سلامتج
درت وجهي ما رديت وكملت طريقي امشي اجوا يمشون وراي اسمع خالة تگول اله هذا العلاج الدكتورة كتبته الها وهو يرد انتظروني ثواني بس اجيبه من الصيدلية بس حسيت عليه راح درت الخالة
--ليش اتصلوا بيه خالة على شنو ناوين
--مو اني يجوز عمج انطى خبر بعدين لازم يعرف اذا صار شيء لا سامح الله راح يلومنا ويحملنا السبب
ما جاوبتها تركتها واگفة ومشيت الظاهر ناوين يرجعوني اله وكل هذا الكلام تمهيد للموضوع
حقهم يسون هيج ما مجبورين بيه وبـمسؤوليتي وين اروح وين اعيش وين امشي تعبت بعد تعبت احس رجليه ترجف وگلبي يأذيني والالم بكل مكان بجسمي ما تحملت اوگف على رجليـه اكثر گعدت گعدة على الرصيف وضميت راسي بين رجليه وبچيت فاقدة اخر قوة واخر صبر واخر امل عندي
YOU ARE READING
مـأوى الـزهـور
Random(يا إيها الناس أتقو الله بالنساء اوصيكم بالنساء خيراً) لم يستوصوا بنا خيراً يا رسول الله لقد كسرو القوارير والافئدة
