مـأوى الـزهـور

حلقه (37)

مــأوى الــزهــور🥀
بقــلــم يــاســة الحلقة (37)

هناك حكمــة تقـــول
يأتي البعض لحياتك كـ نعمة
ويأتي البعض لحياتك  كـ درس
فحافظ على النعمـــة .. وتعلـم من الدرس

.................................................

إمتنان :- اعرف راح يأذيني بس أذية يوم ولا كل يوم رنا تعبت ما عافلي غير حل

-- زين ليش مثاب اذا نويتي تزوجين ليش ما وافقتي على مصطفى

-- مصطفى ما يستاهل الاذية وقاسم اذا يعرف مصطفى يريدني ما يتعب نفسه وياه يخلي طلقه براسة ويخلص منه لان يفكر طول الوقت احنا بعلاقة بعدين مصطفى يحبني واني ما اريد استغله والخاطر مصلحتي اوافق على الزواج واكسر گلبه

-- يعني عادي مثاب يتأذى وينكسر گلبه الولد حباب وممسوي شيء ليش تجازفين بيه

-- مثاب غير عن مصطفى مثاب اني وياه بيناتنا أتفاق يعني لا زواج ولا عائله ولا اي شيء من اللي تفكرين بيه وبعدين هو راح يرجع يسافر يعني قاسم ميلوحه

-- إتفاق ايش إمتنان شنو اللي جاي يصير وياج راح تغرگين

-- اكثر من هذا الغرگ ما اعتقد شوفي رنا ما عندي شيء اخسره بعد حتى ابني خسرته شنو يصير اكثر من هذا خل يصير

-- زين ليش رجعتي هنا على الاقل انتظري مهيب بين ميرجع

-- ما راح يتغير شيء برجعه مهيب

ما ردت بعد سكتت بقت گاعده يمي شوية وراها گامت الغرفتها بدلت ملابسي وسحبت بطانية ريان و حظنت و شبعت بچي گمت للتليفون اتصلت
بـ مَرح بسرعه ردت

مَرح :- هلاو إمتنان شلونج اخبارج شكو يمعودة وين رحتي وين جنتي شنو السالفه فهميني

إمتنان :- بس طمنيني على ريان بالاول

-- زين لا يظل بالج عليه

-- وينه هسه نايم گاعد

-- ما ادري شگولج بصراحه

-- شكو مَرح احچي فدوه

-- قاسم جابه يمي العصر وقبل ساعتين رجع عليه اخذه

--ليش انطيتي اله ليش ما عفتي يمج

-- ما قبل واصلاً صاير واحد ثاني مجنون رسمي ويريد بس يعرف شنو البينج وبين مثاب يگول خاطبها ما اعرف منو گايله هذا الحچي

عرفت صديقه اللي رحت عليه هو گايله لان مثاب عرف نفسه بصفته خطيبي ومن رجعنا تضاربوا واخذني وياه

مَرح :- شجاب مثاب عليج شو اني دخت

إمتنان :- اني ومثاب عقدنا

-- صخم الله وجهج على هاي الدگه

-- ليش صخم وجهي مو انتِ نفسج نصحتيني اتزوج