مـأوى الـزهـور

حلقـه (64)

مــــأوى الـــزهــور 🥀
بقـلـم يــاســة الحلقة (64)

عـدم مبادلة شخص ما نفس الشعور
لا يعنـــي أنــنـــي شخــص ســـيء
المشاعر لا تطلب ولا تمنح بمشيئة الإنسان
المشاعر حرة لا إرادية المشاعــر خــارج السُلطة

.......................................

إمتنان :- دخل ريان ويگول ماما مفاجأة فزيت من مكانـي ثواني لا مو ثواني اقل من الثانية وطفرت من الگاع هي طفره وهي وگفه وهي ركضه الباب الغرفه تلاگى وياي جاي يركض عليه

وگعت بالگاع وحظنته قوي و اعيط بكل صوتي يارب رحمتك يارب هذا  مو حلم يارب مو حلم حقيقة رجع ابني رجع دخيل اسمك يا الله

ضامته على گلبي و اعيط و هو حاظني
بـ اديه الصغار

رجعت رفعت راسه عليه و ابوس بوجهه بعيونه بخشمه بحلگه بـ اديه برجليه
حتى بطنه بستها وهو جاب اديه و حطهن على وجهي وباسني

هنا متت من العياط سحبت اديه و ابوس بيه بكل قوتي گاعده بالگاع و هو بحظني ودموعي تنزل بغزاره و اگول

-- يا گلب امك يا روح امك يا حياة امك فدوة الشكلك فدوة الصوتك ولك يوم متت بدونك متت حبيبي ماما روحي ماما اهلي
و ناسي وكل الدنيا انتَ فدوة الشكلك يوم
رجعت ضميته الصدري بكل قوتي وهو يگول

-- بابا دال مفاجأة الماما

-- فدوة الك و المفاجأتك فدوة الصوتك فدوة حتى البابا

بنفس اللحظه الحچيت بيها هيج اجاني صوت مثاب من وراي يتحمم بسرعة انتبهت على نفسي جفصت بس والله حچيتها بدون قصد كل قصدي عود شكراً الابوك بس جنت منفعله زيادة وطلعت من عندي بالغلط

رفعت راسي لگيت واگف يمنا قريب و اكيد شاف كل اللقاء وسمع كل الكلام مسحت دموعي بـ اديه سريع و اگوله

-- مثاب شفت رجع ابني رجع

أبتسم ابتسامة خفيفه يحاول يخفي انزاعجه من كلامي و رد

-- الحمدلله على سلامته

گمت من الگاع و شلته اريد امشي و اخطي ما اگدر اديه ترجف و احسه ثكيل عليه ما عندي قوة حتى اشيله

تقدم مثاب عليه واخذه من ايدي وباسه براسه وبخده و ضحك ويگول

مثاب :- حي الله ابو الرون البطل لك هلااا
بهالـصوت

ريان يباوعله ويرجع يباوعلي ويضحك خجلان
ومثاب ايد شايل بيها ريان والايد الثانية حظني من ظهري و مشاني بداخل الغرفـه

نزل ريان بالگاع وساعدني گعدت بفراشي
سحبت ريان و گعدته بحظني و ابوس بيه
مستحيل ما اصدگ ما استوعب يعني رجع
و هذا گدامي سالم يعني جاي اشوفه گبالي دخيلك يا الله شگد رحيم الحمدلله والشكر الف الحمدلله