مـأوى الـزهـور

حلقـه (42)

مــأوى الزهــور 🥀
بقـلـم يــاســة الحلقة (42)

نحنُ نلمع بشكل أستثنائي حول من نحب
وننطفئ لو كنا حول الشخص الخاطئ
أنتَ لست شخصاً واحداً أنتَ دائماً نتيجة
تفاعل مـا

....................................

  إمتنان :- لا تتشاقى عفيه

مثاب :- ما متشاقي وداعتج

حطيت إيدي على وجهي وبقيت ابچي تركني بچيت على راحتي وراها سحب ايدي من وجهي وگـال

--كافي بچي خلصت

-- شكرًا

-- شكرًا ناشفه ما اريد

-- صار مرتين تگول هذه الجمله يعني شكرًا ناشفه

-- هههههه اريد شكراً بيها طعم هيج ميعجبني

-- يعني

-- هههههههههه گومي نامي و ارتاحي حتى تگعدين نشيطه الصبح تستقبلين ابنج

گمت من الگاع وهو گام وياي دخلنا للغرفـه
لگينا عمه خلود جايبه فراش ابو النفرين وفارشته النا وحاطه بطانية وحده هو بسرعه شمر نفسه على الفراش وسحب البطانيه تغطه بيها

إمتنان :- هاي شلون هيج لعد اني وين انام

مثاب :- ما ادري رجاءً بدون صوت اريد انام بعد ما اگدر افتح عيوني

ما رديت عليه اعرف بسوالفه كلش زين مينعس اكبر لوتي بس يتقصد هيج يسوي اخذت تراك ورحت للحمام بدلت ملابسي ورجعت لان ما اگدر انام بالدشداشة بقيت گاعده وايدي على خدي حايرة بنفسي وين انام انوب حتى ماكو غطا اتغطى بيه وحدي
واستحي اروح اجيب من عمه وبنفس الوقت شنو العذر اللي اگـوله واحتمال
ما عندها فراش واحرجها

بقيت على گعدتي وصافنه بحالي رجعت شغلت التليفون و اخذتلي بيه ساعه تعبت من الگعده ونعست گمت على كيف سحبت الغطا من عنده و جبت ايدي قريب يم عيونه بقيت احركها مقابيله اريد اتأكد من عنده نايم لو گاعد

ماكو ما يرمش تقربت اكثر واحرك بيدي يمين ويسار نفس الشي ما حس تأكدت من عنده نايم گلت خل انام وعود اگعد من الصبح قبل لا يگعد ويشوفني

اجيت تمددت بصفه و غطيت نفسي
و محشوگه بالطرف و جسمي صاير خشبه من التوتر والخوف غمضت عيوني اريد انام ماكو الف فكرة خطرت على بالي كل شوية يروح بالي بشي وراها ما اعرف شلون اخذت عيوني النوم وغفيت ومن صحيت لگيت الوضع آمان الحمد لله بعده نايم واني صح نايمه قريب من عنده بس هو نايم ما يدري ولا طاخته ولا طاخني

بسرعه گمت من الفراش فتحت باب الغرفـه باوعت شفت عمه خلود تحط اكل للدجاج ابتسمت ورحت عليها

-- صباح الخير

-- هلا صباح العافيه

-- اليوم يجيبون أبني