مـأوى الـزهـور

حلقـه (71)

مــأوى الــزهــور 🥀
بقــلــم يــاســة الحلقة (71 والأخير)

گلوله لا يعتذر رد التركته بجرح يضحك ويتعافى
گلوله راح القبل حطيت من التعب راسك
على اجتافه
شو راجع ومبتسم والضحكة بشفافه
گلوله المن يجي لا هلا بجيته بعد
لا عاش من شافه

.........................................

إمتنان :- من سمعت النطق بالحكم اختل توازني اريد اوگف على رجليه ما اگدر
براءة حتى مو كفاله براءة وخلاصت وين البراءة وهي ظلمتني و أذتني و ضربتني
و باعتني و هتكت ستري و سلبت صحتي وين العدل وين الانصاف

اريد اوگف اريد اسيطر على جسمي ما اگدر
الدنيا ظلمت بعيني و ما گمت اسمع احد ولا اشوف احد عيوني بقت متركزة على زكيـة
و ضحكت النصر المرسومة على شايفها

جانت تباوعلي بنظرات كلها حقد و غل
و ياهن ضحكة حقيرة ضحكة مستفزة اكثر من استفزاز الحكم نفسه

سحبني مصطفى و طلع بيه من الغرفة كلها
جان لازمني من ايدي و يسحب بيه واني بلا شعور امشي حتى ما اسمعه شيگول

طول الطريق هو يحچي وياي و ياخذ من خاطري و يحچيلي عل عدالة رب العالمين بالأخرة و انتقامة من الظلم و نصر المظلوم
وإني ساكته ما احچي حرف واحد ما نطقت

لحد ما وصلت للبيت دخلت و قفلت الباب وراي حتى ريان ما جبته من بيت رنـا من الصدمة

بوجهي للحمام دخلت جوى الدوش
و سبحت بمي بارد و الدنيا جانت تگص گص ما احس بشي لا برد و لا حر ولا أأذية ولا اي شعور فقدت الأحساس انتهيت

مده و اني بالحمام والمي البارد يصب فوگاي وراها طلعت و گعدت بدون ما اشغل هيتر ولا صوبه شعري يصب ماي والبيت ثلج والشباك مفتوح و اني بدون أحساس مجرده من كل شعور

خسرت القضية و طلعت زكية منها مثل الشعره من العجين خسرت أبني و تحملت كلام ابو اللي چان سجاجين بداخل گلبي خسرت نفسي خسرت حياتي كلها

زين إذا ماكو عداله ليش درست وتعبت ليش دخلت قانون من الاساس كل هذا سويته بس حتى اخذ حقي منها

بقيت ساعه گاعدة وصافنه بدون اي ردت فعل سمعت الباب يندگ و صوت رنا و ريان
گمت فتحت الهم اول ما شافتني رنا شهگت و تگول

-- يااا عزاا إمتنان تنگطين مي و لبسج هذا الخفيف بهذا البرد صدگ چذب

نصيت على ريان شلته و دخلت بيه بداخل البيت ضميته الصدري و بچيت بيومها بچيت بچي روحي احسها طلعت

ما استاهل كل هذا طفولتي ضاعت مراهقتي ضاعت تعبي ضاع جبت عمري كله تعبانة ومظلومة و مكسورة ومذلوله بعمري ما ارتاحيت ايامي العشتها الحيوان ما يگدر يتحملها

حتى البنات ما عاشن العشته ولا مرن باللي مريت بيه كل اللي عاشنه يتيمات بدار ايتام زكية تعيط عليهن و مرات تضرب مرح
عكسي اني عشت شغلات مستحيل احد يتحملها شغلتني بنت ليل و ضربتتي ضرب جسمي يتطبع إذا رفضت اروح للدعـ ارة مالتها بتالي الليل