مـأوى الـزهـور🥀
بقلم يـاسـة الحلقـة (6)
من هذا السواد البيـة لا تــخاف
تجارب تخلق أبن أدم مثـلها
ترى أصعب خسارة من الخســارات
التنسيك الخسارات القبلـها
..................................
يوم جديد يختلف عن اليوم اللي قبلة بهذا اليوم راح نودع وحدة من البنات راح يفرغ سريرها وينشال أسمها من جدول التنظيف ويروح صوتها من داخل القاعـة كل وحدة من البنات الها ذكرى والها لمسة والها موقف اخوات وصديقات گعدة وحدة اكله وحدة ومصيرنا جان مصير واحد كل احنا عشنا الظلم والقهر وجربنا شعور اليتم والحرمان
بيومها اجت حنان من الصبح عليها هي وسلامة اخذوها سبحت ورجعت انجمعنا يمها وسلامة لازمة شسوار وتشسور بشعرها وهي الفرحة ما شايلتها فرحانه بشعرها و بجسمها و بحواجبها فرحانة بزواجها حالها حال كل بنية
ساعة تقريباً سلامة ترتب بشعرها وراها بدلوا الها گلبية جديدة وشال جديد والبنات فرحانات بيها شلون لابسة ملابس جديدة وگفت اني على جهة واباوع لهم احس روحي جاي تتگطع عليهم ابسط موقف يفرحهم وهم يستاهلون كل الفرح والسعادة
لبست صايتها وحجابها وافترت علينا وحدة وحدة تودعنا وبـ المقابل احنا نتمنى لها السعادة والاستقرار طلعت من القاعة وكل احنا نمشي وراها نصفك وحنان تهلهل وتهوس بكلمات الهسه تتردد بــ إذاني ( طلعت يالزهرة تلگيها )
طلعت خارج المأوى وسط دموع البنات وفرحتهم بيها وهلاهل حنان وسلامة وهوساتهم لها
انسد الباب علينا مودعين اخت وصديقة وراها رجعنا ندخل وحدة بعد وحدة واني امشي ادعيها من كل گلبي .. الرب يسعدها ويحميها الرب يكتب لهاا السعادة الابدية ويررزقها بـ الاطفال اللي يعوضونها عن كل الفقدان اللي عاشتة بحياتها
كل وحدة راحت بمكانها والوضع كأيب والمكان عبالك وحشه صار علينا محد بينا الها خلگ كل وحدة من عندنا ماخذه صفنه لوحدها لحد ما انفتح الباب ودخلت علينا زكيــة وياها مره جبيرة بـالعمر تمشي على عكازة وياها ثنين نسوان وبنية شابة النسوان يطلعون وحدة بعمر زكية تقريباً والثانية اصغر بشوية والبنية بـعمر رنا وطفل غير يطلع بعمر سما
زكيــة :- اهلاً وسهلاً حجيه زارتنا البركة تفضلوا تفضلوا تعالوا يا بنات سلموا على أم مُهيب
كمنا من مكانتنا تقدمنا عليهم سلمنا عليهم ورجعنا انجمعنا بجهة وحدة متفاجأين منو هذول
معقولة مؤوسسة لو جهة من الدولة جايين يشوفونا بس شكلهم ناس عادين مو مال مسؤولين ولا شخصيات مهمه
دخلوا بترحيب حار من زكية و شيماء بـ إيدها كرسي حطته بـ الگاع گعدت عليه الحجية والباقيات گعدن بـ الگاع حتى بدون فراش ما قبلن يگعدن
زكيــة :- ميصير تگعدون بـ الگاع عاد هذا فراش گعدوا عليه
ام حسام :- لا تعبون نفسكم ماكو احسن من گاع الله مرتاحين بيها اصلاً
YOU ARE READING
مـأوى الـزهـور
Random(يا إيها الناس أتقو الله بالنساء اوصيكم بالنساء خيراً) لم يستوصوا بنا خيراً يا رسول الله لقد كسرو القوارير والافئدة
