مـأوى الـزهـور

حلقة (32)

مــأوى الــزهــور 🥀
بقــلــم يــاســة الحلقة (32)

ان الروح إذا التقــت بمن يشبهها
ترممــت وتعافــت و أكتملــت

..............................

مـرح :- هاي فد يوم من الايام حطيت راسي على المخدة وعيوني صارت على السگف بقيت تقريباً دقيقة كامله ساكته بدون صوت و بدون حركة فاقدة كل الاحساس بهاي اللحظة حسيت بنفسي ميته وما احس بشي لا شعور ولا اي إحساس يمر بيه صرت شبه ميته عدا الوقت عليه واني هذا حالـي ومن بعد الصمت الطويل غمضت عيوني ويا ما طبگت جفن بجفن وگعت مني دمعـه وحده وهاي الدمعه حسيت بحرورتها  نزلت بگلبي

وراها سألت نفسي يا ترى راح ابقى بهذه المأوى
وحيده بدون أهل و بدون سند بدون مستقبل
و بدون أمان يا ترى شلون راح يگون المستقبل وشنو راح اشوف بيه يا ترى راح تنكتبلي السعادة والأمان والأستقرار لو ابقى بهذا القدر قدر مشوه مابيه اي شي جميل ولا بيه أي أمل ولا بيه روح

إني منو وشنو حياتي وشنو عيشتي ليش انولدت من الاصل إذا مكتوب عليه العذاب معقوله انولد بس حتى اتعذب وانهان معقوله نولدت بس حتى انظرب

رجعت وراها أبتسمت بقهر و رديت على نفسي ليش أني اسأل وليش اتعب نفسي واني مخلوق بس  تكملة عدد بهذه الحياة ليش اسأل واني حتى السؤال مو من حقي اسأله ولا من حقي أتأمل وأحلم مثل باقي الناس

من يومها بعد ما هميت المصيري ولا فكرت
بــ مستقبلي غمضت عيوني واني تاركـة عمري
يواجه المجهول وحدة بدون اي تفكير واي خطط ومن طلعت الشمس عليه و انزاح الظلام فتحت عيوني و شفتك گبالي ومن اول ما شفتك شفت بيك حياة جديدة وعمر جديد وامل جبير راح تگول تبالغين بكلامج بس لا بالله أنتِ بالنسبة الي عمري الفات والجاي صوتك أمان ضحكتك أمل
و قربك سعادة ما اگـدر اوصف شعوري واني بين إديك حالياً ما اگـدر اعبر عن إحساسي واني بـ بيتك وتحت جناحك حيان أنتَ بالنسبة الي اكتمال العمري الضايع  و من دخلت بحياتي يلا حسيت بنفسي انسان اله الحق يعيش عيشة كريمة اله الحق يحب وينحب اله الحق يشارك وينطي رأيـه اله الحق يحترم ويتقدر حيان أحبك اني كلش احبك عوضي انتَ حتى لو اجيت متأخر بس متأكدة اجمل عوض

خلصت كلامي وعيوني بعيونه جان و هو يستمع بكل هدوء ومركز ويا كلامي كلمة كلمة وحرف حرف تركني اكمل كل كلامي بدون ما يقاطعني وراها ضمني بحظنــه قوي لمني بين إديه كـأني حاجه ثمينه عنده يخاف عليها من الخدش والكسر
وراها گــال

حيان :- ما اعرف شنو اگـول ولا اعرف  شلون اعبر عن اللي بداخلي لا هسه ولا بعدين كل اللي اعرفـه واعرف اگوله واعبر عنـه اني احبج واتمنى اشعل روحي في سبيل يضوي طريقج وتنور حياتج
بشوفتج صارت للحياة الالوان وبــ ضحكتج الحلوة و گلبج الأبيض شفت الدنيا حلوة وحبيت اعيشها
مرح الحلوة ام ضحكة الحلوة خلص من اليوم هي زوجتي وأم بيتي وحبيبتي وصديقتي وجزء لا يتجزء مني مرح الحلوة لازم تنسى كل شي وتبدي ويا حبيبها من جديد كل شي حلو لان الحلو يستاهل الحياة الحلوة