مـأوى الـزهـور

حلقـة (24)

مــأوى الــزهــور 🥀
بقــلــم يــاســة الحلقة (24)

القلوب كثيرة ولكن لا قلب كـ قلب الأم
................................................
علاج حجايـة أمك من تحاچيك
وخصوصاً من تگلك يمـه يمـه
وحلك أمك كنـز من يحچي وياك
والكنـز ما بيه خسارة شمـى تضمـه

.........................................

إمتنان :-اخذت الحجيه من ايدها ومشيت على الشارع وهي دموعها تجري أجرت تكسي وگعدت بصفها طول الطريق مغطيه وجهها بالشيلـه  وتبچي بدون صوت  تقربت عليه وبستها برأسها
واگـول

-- كافي يوم دموعج غاليـة وبيهن حوبـه وبخت يم الرب كافي بچي حبيبتي

بهيـة :- ما سويتله شي حتى يسوي بيه هيج جبتها تعبانـه وياهم من هذاك اليوم الهذا اليوم ربيتهم بدموع عيني بعت حتى هدومي بس كون ياكلون ويشربون وخص هذا چبيري وكحل عيوني زوجته واني اتاني يوم يوم اشوف بزرته ومن صاروا ربيتهم على گلبي تالي يشمرني بالشارع وما يگول امي هاي

-- ما يستاهل دموعج والله ما يستاهل دمعه من دموعج حتى لو ابنج لا تبچين عليه هو الخسران انتِ ما خسرتي شي

-- لا اني الخسرانه اني الخسرت عمري وشبابي وصحتي وراحت بالي و نومتي وگعدتي وهاي هسه شوفت عينج خسرت كبرتي واحترمي

-- احترامج محفوظ وما عاش اللي يقلل من احترامج كافي يوم فدوة الگلبج كافي بچي ضغطج صعد

سكتت بعد ما حچت بس بقت كل شوية ومسحت وجهها من البچي لحد ما وصلنا للبيت نزلنا وهي مثل الطفل الضايع وما يعرف احد خايفه وحايرة وعيونها تحچي على حجم القهر والخذلان اللي جاي تعيشـه دخلنا للبيت سمعتها تگـول

-- بسم الله الرحمن الرحيم اللهم صلِ على محمد وال محمد يا الله

فتنا للصالـه عمو رحيم متمدد على القنفه بس شافنا فز من مكانـه ويگـول

-- هلا يابـة هلا إمتنان

إمتنان :- هلاو يابـة شلونك

-- بخير ونعمـة

-- هاي خالتي الحلوة اجت وجايبه البركة كلها وياها

-- هلا وكل الهلا بيها هلا ومرحبـه

بهيـة :- هلا بيك يسلمك الله

-- أگعدي خالـه ارتاحي

گعدت وتباوع علينا مقهورة وخجلانـه طلعت خاله فاطمـة من غرفتها على صوتنا سلمت وگعدت يمنا واجـى وراها عمو كـريم نفس الوضع سلم وگعد

إمتنان :- هذول بيت عمو كريم زوجين عاشقين عايشين قصة حُب تخبل

بهـية :- الله يحفظهم ويسعدكم

إمتنان :- اي خالـه حبيبتي هذا بيتج واني بنتج وهذول اخوانج وكلنا اهلج وناسج شنو تردين شنو تحتاجين بس أأمـري وعيوني الاثنين الج