مـأوى الـزهـور

حلقة (12)

مـأوى الـزهـور🥀
بقلـم يــاســة حلقة (12)

بيا محطـة تريدني أنزل وأني عايفني القطار
لا تعاتب طيــر غــادر بيتـهم وبعيـد طــار

........................................

إمتنان :- كلمة طالق ما جانت كلمة عاديـة بالنسبة الي لا هاي الكلمـة هي الرحمـة والبُشرى والخلاص وكل شيء حلو ممكن يحس بيه الانسان بس نطقها وإذاني سمعتها گلبي دگ فرح وسعادة وأمان

طلع من الأستقبال و اني أيدي على گلبي واتنفس بهدوء اريد احس بكل نفس اخذه من بعد ما خلصت من عنده اريد اعرف هل النفس شگد مريح من بعد ما راح وراحت وياه كل أيامي السودة مهيب تقدم عليه ومد إيده بجيبه وطلع فلوس مشدودات بلاستيكه مالت فلوس وگال

مهيب :- هذا حقج وياريت تبرينا الذمة

إمتنان :- ما اريد منكم شيء كفيتوا وفيتوا

مهيب :- هذا الشيء من حقج أمام الله وأمام المجتمع هذول الغايب مالتج

إمتنان :- ما اذكر حط لي غايب بالعقد

-- ما اعرف شگد جان حاط بوقت العقد بس گال هذا حقها انطيه الها واني بدوري اسلمه الج

عمو داود تقدم على مهيب واخذ الفلوس من عنده ورد عليه

داود :- مشكور ابو فيروز غايبها هذا حتى لو ما تحب تاخذ من عنده شيء ضروري تاخذه لان هذا حقها

مهيب سكت ما رد شيء تقدم يريد يطلع صحت عليه

-- بس سؤال قبل لا تروح

-- تفضلي

-- البنات وين وديتوهم وشلونه وضعهم

-- البنات بخير والحمد لله وطمني بالج المكان اللي بيه حاليًا مكان محترم

-- اريد عنوانهم

وصف الي العنوان مالتهم وراها أستأذن وطلع والسيد نفس الشيء استأذن وطلع وراه وعمو وجوزيف تبعوهم للباب واني  اول ما طلعوا
و فرغت الاستقبال گعدت گعدة وحطيت إيديه على وجهي وبچيت ، بچيت على ايامي وشبابي واحلامي بچيت على كل ساعة راحت من عمري وكل يوم سيء عشته بچيت على دلالي و كرامتي وأهلي بچيت حزن على الايام المرت وبنفس الوقت بچيت فرح على الايام اللي راح تچي واني بعيدة عنه وعن عصابته

أماني :- كافي بچي حبيبتي كافي بچيتي بما في الكفاية هسه صار لازم تگومين على رجليج وترجعين مثل قبل إمتنان الحلوة الحبابة الهادئ يلا امي حبيبتي مسحي دموعي وگومي وياي

مسحت عيوني وگمت من الاستقبال للصالة بس دخلنا دخل ورانا عمو داود بـ إيده الفلوس

داود :- هاج بابا هذول فلوسج

إمتنان :- ليش اخذتهم عمو ما اريد اي شيء منهم

-- هذا حقج لا عيب ولا حرام ولا منية يعتبر غايب من بعد الطلاق ضميهم يجي يوم وتحتاحينهم