أسقطتني سقيما في فتون عيناها

Ch. 25

أسقطتني سقيما فــي فُتونِ عيناهـا ♡

ELYAAKOUBI Ikrame .. ✍︎

الفصل 2 : ✧ اغْدَقَتْنِـي صَبْــوَةً ✧

وشافها كي معذبة حط تيليفون وداير Haut parleur و هزها عليها حطها فوق الطبلة وهي كتبرغم :" واش هادي هضرة ولا سحور، ويلـي !"

و كتحط ليه القهوة حداه فوق البيرو وهو واقف وراها كينطق اخر كلماتو فالمكالمة.. شافت واحد ورقة جراتها حيت مهووسة بالوراق وستيلو والحروف ولكن مكتعرف ليهم والو:" واو كتبة واعرة حسن من ديال خالتي اسية !"

تبعاتو بعينيها بنص شوفة مكتشوفش فيه ولكن متبعة ظلو حتى خرج عاد تنفسات و كتجمع الوراق لي مكمشين كترميهم فزبل و كتشوف فوق المكتب عوالم من الكتب الكبيرة وسميكة الحجم تمنات حتى هي تدخل وسط منهم وتقرا بين سطورهم شافت فيهم بحسرة.. كانو كلهم كتب قانونية "codice commerciale e codice penale " - قانون الايطالي  التجاري وقانون العقوبات -

هي مكانت فاهمة والو ولكن عجبها.. حطات المنديل باش كتمسح من يديها.. وجلسات فوق كرسي ديالو كضور بيه فرحانة وكتبتاسم و هازة واحد الملف بان ليها قدامها وكتغلض صوتها:" جيبي ليا قهوتي !"

كتقلد نبرة صوتو:" واش نتي ممسالياش"

وكضحك:" ميقيسك حتى واحد من غيري"
وهازة ستيلو وكتنطق بكلمات غير مفهومة فمحاولة تقليد لغتو الايطالية لي مفاهمة فيها والو:" بوركيي بوكري.."

و ناضت كتتمشى وكتشوف جهة الباب واش كاين شي اثر ديالو و مدات يديها لجبانية الشكلاط خدات منها واحدة، كتاكل وتتبنن غمضات عويناتها وكتخرج لسانها كتمررو فوق شنايفها بتلذذ:" مممم... "

حلات عبنبها فاش اختفى المذاق وعبسات ملامحها حتى دلات قنوفتها لتحت بحزن:" تسالات، وشنو فيها زدت غير وحدة ؟"
هزات كتافها بعدم مبالاة و رجعات خدات قطعة شكلاطة ثانية محساتش براسها وهي كتزيد تاكل منهم :" علاش مكيبيعوش لينا فسوق الخديم فحال هاد شكلاط.."

فاش سمعات خطوات قاصدين الجناح ترعبات وكتجمع فالزبل ديال شكلاط فجيبها بزربة هو دخل وفيديه شي ورقة.. مشغول ومنغامس وسط هادوك الوراق..

شار لهاديك جبانية ديال شكلاط:" حيدي عليا هاديك من تم"

هي مشافتش فين كيشير هزات راسها جهتو:" نعام ا سيدي شنو نحيد ؟"

شاف فوجها و حجبانو مبقاوش معقودين تفكات عقدتهم فاش شاف اثر الشكلاط على جنب فمها سايح و هبط راسو من جديد للورقة كيبتاسم:" اجي هنا !"