أسقطتني سقيما فــي فُتونِ عيناهـا ♡
ELYAAKOUBI Ikrame .. ✍︎
الفصل 1 : ✧ أنقاضُ الهَوىٰ ✧
رزان:" انا اعطيتك كبدتي باش تفرقي بينها وبين ولادك ولا حيت صافي ولدتي لولاد!"
جويرية:" فين فرقت ؟ قرا فاحسن مدرسة والحاجة قبل ميحل عليها فمو تحضر، بيتو كاين بين ولادي"
وتلفتات كتعطيها نظرات فحال السهم:" لي بغا الماء يقصد العوينة لاعندك متقولي جيني تيشان "
رزان :"لا.."
وقبل متنطق قاطعاتها من جديد:" الى عينك على الورث راه غتصوري منو غير الريح"
وكتأكد:" عاصي ولدي هو لي غيحكم هاد الخير كامل"
وهي تخشا بلاصتها وخدات منها تيزان :"خرجي عليا بغيت نبقا بوحدي"
رزان:" جويرية ختي ياكما تقلقتي عليا"
دارت ليها اڜارة بلا:" بغيت نبقا بوحدي"
ورزان خرجات كتبرغم تحت سنانها:" عاصي ميوصل كيان حتى لظفرو صغير"
• كلوب Mystère •
مفاقت حتى سمعات رنين الهاتف طولات يديها وهي مغمضة عينيها كتطفيه وهما معمشين شافت الساعة كانت 9:00 صباح ناضت طافجة كتجري ونسات بلس ماشي فبيتها مولفة على ناموسية كينغ سايز عريضة وطويلة.. دابا غير تلفتات طاحت وشدات فظهرها:" الخراا"
وقفات كتتوجع لبسات عليها بزربة نفس الكسوة لي كانت لابسة بارح :" تعطلت تعطلت"
وخرجات كتجري ركبات فطمموبيلتها ووقفات عند اقرب محل شرات حوايج لي جاو قدامها اول مرة مديرش بحساب الماركة حيت هي مهووسة بالماركات الغالية والفاخرة جميع حقائبها و صبابطها من ماركةت عالمية وكاينين نسخ وحيدة لي عندها..
وطارت للشركة بلاما دوز للدار... كتصوني على فلوغا:" البارح "
فلوغا كضحك:" نشطتي ؟"
كريمة معاطياهاش وقت:" الى لقبت الخبار عند شي صحفي نعرفك غير نتي!"
فلوغا:" كوني هانيا لكلوب سيكوريزي"
وقطعات عليها مركزة فالسياقة ابتاسمات... راضية على ليلة البارح ولكن عكر مزاجها صورة عائلة "بن جلُّون" حيت هما كيقدسو الشرف والعرض وهادو قوانين واعراف توارتوها وبناتهم مكيختاروش عرسانهم.. عرسانهم كيكونو مقررين قبل ولادتهم على مبدئ العائلات الغنية والاتحاد الاقتصادي وبناء علاقات... والبنت كيفض بكرتها واحد هو هاداك لي مقررين يتزوجها من مورا توقيع عقد الزواج
• داخل اسوار بن جلون •
العائله مجموعة على مائدة الافطار تترأس المائدة جويرية وبالترتيب جالسين كلشي مجموع الا عاصي.. ورزان جالسة فمؤخرة المائدة وحداها ولدها "سليم" طفل معاق ولكن ماشي خلقي... تزاد صحيح معافا ولكن الاقدار اثر حادثة فعائلة بن جلون هي لي وصلاتو لهاد الحال.. عاش وكبر بين اولاد بن جلون مابينو وبين امير وشريف الا سنين قليلة ومكيحملش اسم بن جلون... 23, سنة...
بداو فطورهم عاد شافوه هابط لابس كيطمة عكس البقية حسب البروتوكول لابسين زيهم الرسمي أنيقين.. هو هابط بسروال كيطمة و تيشورت و معلق فوطة فشعرو كينشفو وكيرش الماء فالارض من راسو وكيشوف فجويرية لي كتشوف فطبقها متجنبة تشوفو حيت غيطرطقها بالفقصة...
ومجلسش فالكرسي المقرر ليه، بكل جرأة جلس فرأس المائدة من جهة لاخرة لي حتى باه مكيجلس فيه ملي شافت فيه، قرن حجبانو:" ماشي لي بغيتيني نورث ؟"
ابتاسمات بزز:" شنو بغيتي يوجدو ليك"
حرك راسو بملل كيستفزها:" شي حاجة ميدمة"
كيستفزها جميع حركاتو وكلامو عكس تيار بن جلون..
ضحك كيان باغي يلطف الجو:" شي مقيلة بالخليع مغربية "
والخدامة تحركات وقفات عاوتاني سمعات صوتو الخشين:" قهوة قاصحة"
- "واخا ا سيدي"
دخلات الطلبية للمطبخ...
-" فتون واحد اكسبريسو كي كيبغيها سيدي"
فتون طارت للماكينة كتقاد القهوة و ناشطة طلعات القهوة وهي كتشم ريحتها كانت كتشهي...
فتون:" نذوق واش خاصها حلاوة !"
شافت فجنابها كان كلشي منزل راسو على خدمتو خشات غير لسانها وبعدات فالحال:" يييععع باسلة "
هزات سكر سنيدة:" غتجيه باسلة ويحيحو عليا"
زادت ملعقة وداقت كان مسوس وباقي قاصحة وهي تزيد الثانية والثالتة ونصصيص
فتون فرحانة:" ودابا اه !"
فالمائدة جابو ليه جنبو واحد الصينية صغيرة واحد الحبة وكاس الماء هز عينو فجويرية
جويرية :" مغتاكلش دواك؟ ومدايرش ريجيم كتشرب متعقل السكر غيقت&لك، انا من اليوم غنقاد سيسطيم ماكلتك مع طبيب وغتحبس الشراب و الحشيش "
كتوبخو هو مجاوبهاش متفاعلش معاها جر واحد الطبسيل قدام رزان ديال تشيز كيك و خشا قطعة منها ففمو ببرود وكيمضغ بمهل وبشوية كيجننها
رزان كتطمن جويرية:" مافيهاش سكر كناكلها على ريجيم"
جويرية كتحاول تتحاور بعقل:" عاصي اخر مرة خديتي سكر مشيتي تمو&ت "
سكتات فاش شافت الخدم مدخلين فطورو قهوة مع طبق من البيض مع الخليع وخبز قمح كامل مبريسي محمر مزيان كانت كمية قليلة اول ما دار خدا كاس القهوة...
أنت تقرأ
أسقطتني سقيما في فتون عيناها
Romansكانت اكبر مخاوفها ان تقع في حب سيدها ولكن ماذا لو وقع سيدها في شباك عشقها ؟ وهو مصاب بلعنة الكِبر..أسيحبها ام سيطفؤها؟ #أسقطتني_سقيمـأ_فِــي_فُتُون_عيناهـَا ✨🫀 Written by : ELYAAKOUBI Ikrame ✍🏻
