الـدخيل

بارت ٣

-

"تعرف تسوي كوكيز؟" يسأله مشعل و يطلع طلال المكونات اللي قاله عنها علي

"لا والله بس شكل علي يعرف" يقول له و يلتفت لهم علي و معاه الطحين و البيض بأيده الثانيه

"ليش في احد يعيش مع فهد و ولده و ما يعرف يسوي كوكيز؟" يسألهم، و عينه تروح لمشعل اللي يطالعهم و اهوا مبتسم

"بابا يحب الكوكيز و انا بعد!" يقول لهم بإبتسامه، و يبتسم له طلال

"نسوي لك احلى كوكيز الحين" يقول له طلال و يقعده على الطاوله

"بسوي معاكم!" يصرخ عليهم و يدخل فهد المطبخ لهم و يسند نفسه عالباب

"شفيك تصرخ بابا؟" يسأله فهد و يرفع طلال راسه و يطالع بفهد اللي كانت عينه على ولده

"طلال يقول ما تسوي معانا كوكيز ابي كوكيز انا ابي اسوي شوفه!" يعصب و اهوا يصرخ بدلع و تتسع عين طلال

"انا قلت لك ما تسوي؟ تبي تسوي تعال كيفك انت ما قلت لي انك بتسوي اصلاً!" يقول له بسرعه و علي التفت لهم و يطالع بمشعل

"مشعل لا تصير جاهل! الرجال ما قال لك ما تسوي تبي تسوي تعال" يقول له علي و يوقف مشعل من مكانه، و فهد عينه على طلال، اللي ما ارتاح من نظراته، و حس بتوتر بسبب حدة نظراته

"علي خل يطبخ معاكم و انا ابي بعد كوكيز بروح اشتري بيبسي من البقاله اللي جنبنا" يلتفت لعلي ببرود، و طلال حسّ بروحه تردّ بعد ما بعد عينه عنه، نظراته كانت تقتل!

"دقّ عليه يجيب لك ولا طرشّ البقر اللي بالصاله ما منهم نفعه و خاصةً خالد غاثني" يقول له علي و يتنهد فهد

"لا ابي اشم هوا و ادخن و ارجع" يقول له و يخزه علي بعصبيه

"مو على اساس بتتركها يا فهد! جاهل انت لازم امشي وراك و اسحبك عنها؟ لك خمس دقايق تنزل تجيبه و تجي" يقول له علي و يقلب عينه فهد

"علي ترى مالي خلق مادري ليش اناقشك و اقول لك اصلاً رايح انا سلام" يبعد عن باب المطبخ، و هالحوار كله صار جدام عين طلال، اللي ما بعد عينه عن ملامح فهد، كان فهد منتبه له بس متجاهله تماماً

"علي اروح اكلم بابا؟" يسأله مشعل و يلتفت علي له

"لا جب انت! ودي اصفق وجهك على هالجذب" يقول له علي بعصبيه و يلتفت طلال مكمل شغله اللي قاله له علي بهدوء

-

ينزل فهد من الشقه و يسلم على الحارس قبل لا يطلع، يروح البقاله و يشتري ثلاثه بيبسي، و باكيت زقاير، حاسبهم قبل ما يطلع

يقعد على الدرج و يحط الجيس جنبه و يفتح الباكيت و يطلع زقاره وحده، و يلتفت للمصري وراه