الـدخيل

بارت ٣١

-

"شفيك بسم الله!" يطالعه فهد مو فاهم ليش طلع من الشقه و طلال مصدوم يخزه

"هذا انا؟" يسأله مأشر على نفسه و يضحك فهد ماسك ايده و يدخله وياه للشقه، و يسكر الباب وراه، و طلال يقرب للوحه و يطالعها بصدمه، بعين مفتوحه عالاخر و حلج مفتوح من اللي يشوفه، خطواته بطيئه و يتأمل بكل جزء فيها

"اسف اذا كانت بعض الاجزء غلط مو لهالدرجه محترف انا" يقرب له فهد قاعده على الكرسي، اللي قضى فيه الساعه اللي طافت كلها يكمل اللوحه و يحاول يخلصها لطلال

"الايام اللي فاتت لما ادخل لشقتك ما انتبهت لها ليش؟" يسأله طلال بهدوء، و الفرحه مو سايعته، قلبه يرفرف من داخل و مو قادر يخفي ابتسامته، و عينه مو قادر يشيلها من اللوحه

"لاني كنت اغطيها بكل مره اخلص منها" يرد فهد بنبره هاديه، و يلتفت له طلال و الابتسامه واسعه بشفايفه

"باللوحه مطلعني احلى" يقول له بخجل مقرب لفهد و يرفع فهد جتفه

"مو مطلعك احلى ولا شي هذا اهوا انت" يبتسم له فهد، و عينه على عين طلال اللي تتأمل اللوحه و خدوده صارت حمر، ينزل عينه لايد طلال اللي شابك اصابعه ببعضها و يلعب باظافره و اهوا مندمج بتفاصيل اللوحه

يتردد بأنه يمد ايده، و مد ايده علشان يمسك بايد طلال لكن التفت طلال و رجع فهد ايده بهدوء، "علمني كيف ترسم بالله! ابي اشوفك يعني كذا على يوم ترسم ابي اعرف كيف تدمج الالوان و التفاصيل لان مررررهههه مرره حبيت احس ودي اقضي اليوم كله اشوف تفاصيلها" يقول له بجديه و عينه على عين فهد اللي طبعاً ولا كأن له خيار ثاني غير انه يوافق

"من عيوني جم طلال عندي انا؟" يرفع حاجبه و يضحك طلال بخفه و يرجع عينه للرسمه

"مشكور" بهدوء يرجع عينه لفهد و يوقف فهد من مكانه و يحظن طلال بأيد وحده و الثانيه تعبث بشعره

"ما بيننا!" يربت على ظهره و يبعد عنه

"خلها تنشف يبي لها تقريباً اسبوع و بعدها ازيتها و تكون لك" يقول له و يطالعه طلال

"و ليش وريتني اللوحه دحين؟ دام ان بتجهز بعد اسبوع؟" يسأله و يضحك فهد مشبك ايده لصدره

"اشوف انه مو عاجبك! و بصراحه تحمست حيل ما قدرت انطر لبعد اسبوع" يرفع جتفه و يرمش ببراءه

"لا عاجبتني مره بس ابغى اعرف وش المناسبه؟" يسأله طلال بابتسامه جانبيه

'لاني احبك' كانت على طرف لسان فهد لكن حاس بأن الوقت غلط و المكان غلط لذا تنهد "بدون مناسبه بس جذي"

"والله مدري كيف اشكرك فهد لان جد واضح تعبت عليها! مشكور مره احلى فنان" يمدحه و يضحك فهد و يعدل بشعر طلال لانه نكشه قبل شوي