الـدخيل

بارت ٣٩

-

اليوم الثالث

يفتح عيونه و يلقى فهد مستلقى على السرير مثل ما اهوا، يوقف و يسكر الستاره بسرعه ضوء الشمس قوي عليهم، يروح لفهد و يطالعه، واضح انه ما قعد

"صباح الخير فهد انا قعدت" يبتسم له و يروح للحمام

يطلع و يتنهد، يبي يتصل على علي يجيب له ملابس لكن ما معاه تليفونه، و جوعان ما معاه محفظته للكافتيريا، يتنهد قاعد على الكرسي جنب فهد بعد ما شغل التلفزيون و مسك ايد فهد

"قاعد اشوف ام بي سي تو الحين في فلم مدري اذا حلو ولا لا بس رعب.. شكله اعاده من امس بليل منو يحط رعب الصبح؟" يتحلطم و يسولف لفهد، لانه يسمعه، و يحس ان فهد حاس بملل لذا يسولف له عن اللي يصير له

"شوف شوف ذي الغبيه بتدخل للبيت وربي ما تصير مثل خلق الله و تبعد عن البيت يعني يا حيوانه!" يتحلطم عالفلم، و داش جو عالاخر، طلال مثل الاطفال اللي من نوعه يندمح بالفلم بسرعه

"الحين يتسكر الباب وراها فجاءه تحسب انها بتلف و تطلع بسرعه؟ لا هذه اهيا صعدت فوق و بعدها تصرخ و تركض للباب" يكمل حلطمته، و ينطق باب الغرفه، و يترك ايد فهد بسرعه

و يقصر على صوت الفلم من الريمونت، يبتسم له الدكتور و يفتح الليتات مقرب له "صباح الخير"

"صباح النور دكتور" يبتسم له

"شلون صحتك؟" يسأله و يهز طلال راسه

"بخير ما علي" يرفع جتفه

"جيت اعطيك الجدول هذا لازم تستمر فيه علشان يقوي العظم ولا ايدك بتاخذ وقت اطول علشان تتعافى لا تهمل صحتك" يحذره و يهز طلال راسه ماخذ منه الجدول، و السستر تدخل للغرفه معاها المغذي و يطالعهم، و الدكتور يشيك على الاجهزه و يحط ايده على نبض ايد فهد

"وش السالفه؟" يسألهم بخوف و قلق و عينه تنتقل بينهم و اهما يشتغلون، و السستر تبدل المغذي لايد فهد

"ابد روتيني هذا يصير لحد ما يصحى ان شالله" يبتسم له دكتور عبدالعزيز يطمنه

"طيب يعني... مافي شي غريب صح؟ وضعه طبيعي تمام؟" يسأله

"لا مو طبيعي الرجال بغيبوبه.. حالته تتغير طبعاً لكن تأكد ان نبذل قصارى جهدنا و الباقي على الله" يقول له، و لسبب طلال تذكر ان فهد ملحد ما يؤمن بالله

"و النعم بالله بس طبيعي لشخص بغيبوبه؟" يسأله و حاس قلبه تعب

"نبضاته تمام ما عليه لا تحاتي" يبتسم من جديد، و طلال يقعد على الطاوله اللي وراه و يطالعهم يشتغلون عليه

يخلصون، و يطلعون، يقرب منه طلال و يمسك بايده "حطت لك مغذي ذاك خلص و الدكتور مدري شسوا فالجهاز تعبث و طلع بس يقول هذا طبيعي و روتيني" يشرح له و عينه على عين فهد المغمضه