الـدخيل

بارت ٦٥

-

"ماليي دخل والله مالي دخل" يتكلم برعب و يصرخ عليه الضابط بأنه يرفع ايده لفوق، يرفعها لفوق راسه و يروح له يسكر ايده بالاصفاد و يسكرها و يطلعه برا الشقه، خالد دمعته بعينه، رجله مو قادره تشيله من الخوف و قلبه يحس انه بيطلع من نبضاته قاعد يسمع نبضاته من الخوف، و مو شايف عدل مو مستوعب انه انمسك

فهد ما قدر يسوي شي، ولا يقدر يتكلم لو تكلم بيبين انه يعرفه و بيحولون القضيه لمركز ثاني

صدمته ما كانت اقل من خالد، يعرف خالد، و هذه شقة تركي اكيد في سوء تفاهم، مستحيل خالد يكون يروج لهالسوالف معاهم، ممكن يكون صايع لكن مستحيل.. لكن حتى لو كان يروج ماراح يوضح ولا يقول لهم انه يروجها اصلاً! من متى كان معاهم؟ من متى يعرفهم؟

-

"انا بحقق" يقول له فهد و فيصل يطالعه

"انت مو المحقق! المحقق جاي على مسافة الطريج و بنعرف البذره اللي زرعتهم و نتخلص منهم" يقول له و فهد على اعصابه يبي يطلع خالد من هالمصيبه

"عندي كذا سؤال ابي اسألهم اذا تسمح" يقول له و فيصل استحى يرد فهد كونه ضابط ممتاز عنده، هز براسه و دخل لغرفة خالد بسرعه، فز خالد من مكانه لكن ما قدر يتحرك رابطين ايده على الطاوله و رجع قعد و عينه على فهد

"فهدد وربيي مالي دخل خلني اشرح لك والله العظيم مالي دخل والله" عينه تدمع من جديد بخوف و يقعد فهد جدامه "شنو راح يصير؟ شنو بيسوون فيني؟" يسأله و ايده ترجف

"بيطول تحقيقكم اتوقع بعدها بتتحولون للنيابه بعيد عن سيطرتنا" يقول له و تتسع عين خالد

"اتحول للنيابه ليش؟؟ انا شدخلني؟" يسأله بخوف

"مالك دخل بالموضوع؟" يسأله بشك

"مو مصدقني؟ شلون بيكون لي دخل؟ انت تعرف اني اخاف من هالسوالف مستحيل و حياتك مستحيل" يرد برجفه و عينه تترجى فهد يطلعه من هالمصيبه

"اسمعني عدل بيدخل عليك محقق بيكلمك اثبت له انك مالك دخل لا من قريب ولا من بعيد جاي تزور صديق اتوقع انها شقة تركي صح؟" يسأله و يهز خالد راسه "قول انك تزور صديقك و بس و ما تدري شسالفه و ليش انت هني اصلاً ان جبت طاري المخدرات رحت ورا الشمس لان بيكون واضح انك عارف السالفه اسأل اكثر من مره عن سبب وجودك و هم راح يسألون الافراد الثانين عن بعض علشان يوصلون لغيرهم اكيد بيقولون انهم ما يعرفونك افهم ولا تصير حمار انا مو بايدي الموضوع" يقول له محذره و خالد من الخوف بيطبق كل شي

"طيب طيبب فهد كلمهم طيب قول لهم اني مالي دخل" يقول له دمعته على خده

"لا لا لا و دير بالك من انك تجيب اسمي تفهم؟؟ لا تجيب طاريي خلك هادي و تكلم معه بهدوء لانك مو مسوي شي غلط" يقول له واقف من مكانه و يطلع برا تارك خالد بروحه بدوامه حاس الدنيا قلبت فوق راسه مو عارف شنو يسوي!