الـدخيل

بارت ٤

-

يطلع من الغرفه و يشوفه جدامه يمشي للمطبخ، ببدلته الكحليه، و تليفونه مع علبة الزقاير، و نظارات شمسيه على راسه، بدلته متناسقه مع جسمه، مطلعه عضلات أيده و صدره، مبين طوله فيها، و شكله وسيم فيها و جديّ حيل.. اهوا جدي طول الوقت لكن البدله اظهرته بشكل أجمل...

يدخل للمطبخ وراه و يلاقون خالد و علي يتريقون "ليش قاعدين هالحزه؟" يسألهم و يلتفت له علي و يشوف وراه طلال

"يا هلا! صباح الخير" يبتسم لهم، و يبتسم طلال له، و يقعد جنبه أما فهد فخذا موزه و طلع عصير من الثلاجه

"ورانا جامعه بنروح ناخد جداولنا" يقول له علي و يقعد جدام طلال منزل راسه و ياكل موزته

"توقعت دوامك عالساعه وحده الظهر الساعه الحين ثمان شعندك؟" يسأله خالد و فهد ليلحين ما رفع عينه عن موزته

"خذيت الشفت الصبح" يقوله و يرفع حاجبه علي

"متى كلمتهم؟ ماشالله الخرا ذاك وافق على طول؟" يسأله علي باستغراب و فهد يرفع عينه له باستغراب

"دايماً امسك شفتّ الصبح يوم الاحد مو شي جديد شفيك!" يقول له و يرفع علي جتفه

"اول مره اشوفك قاعد الصبح الاحد" يقول له يشك و واضح من وجهه فهد انه عصب

" قاعد اجذب يعني؟ لانك تنام صبح الاحد!" يصرخ عليه و ياخذ مفتاح سيارته، و ما كمل موزته و عصيره حتى و طلع من الشقه و سكر الباب وراه بقوه

يلتفت لهم طلال بضيق، و خز علي "يعني ضروري تضايقه؟" يسأله و يوقف من مكانه بسرعه

"شفيك وين رايح؟" يسأله خالد و يطالعه

"مابيه يبتدي يومه و هو معصب و بروح للجامعه مره وحده" يجاوبه، و يطلع بسرعه من الشقه و يشوف فهد توه دخل المصعد، يركض بسرعه يلحق للمصعد

"فهد وقفه" يصرخ و فهد يحط ايده بسرعه يمسكه و ينفتح الباب لطلال، يوقف جدام للمصعد و يتنهد ياخذ نفس على الركض اللي ركضه بالممر الطويل

يدخل معاه و يوقف جنبه ، يضغط فهد على رقم واحد و يتسكر الباب ، يلتفت طلال لفهد اللي نزل نظاراته لعينه

"اذا تضايقت او تنرفزت من علي ما عليك منه اتوقع انت تعرفه اكثر مني و اهوا شكاك و يحب يثرثر و يسولف-" يقاطعه طلال بأنه يقول

"اوكي" بس، و يتنهد طلال

"يعني مب متضايق؟" يسأله و يهز راسه طلال بالنفي "اكيد؟" يسأله و يقلب عينه و يلتفت له بعصبيه

"حلاو اهوا؟ قلت لك لا!" يصرخ عليه و ينفتح باب المصعد و يطلع فهد بسرعه و طلال وراه

"انت الحين معصب!" يقول له طلال و فهد يطنشه رايح لسيارته

"اوكي.. سيدي الضابط اعتذر" يصرخ له علشان يسمعه و يروح يقعد على الدرج ينطر التاكسي ، أما فهد فركي سيارته و حرك على طول