الـدخيل

بارت ٢٩

-

يسفط عند باب بيت اهله و يلتفت لورا ماخذ جنطة مشعل الصغيره، و يطالعه علي اللي راكب ورا مع خالد و طلال جدام "بينام عند اهلك؟" يسأل علي

"اي يلا مشعل" ينادي مشعل

ينزل مشعل من السياره و ينزل معاه فهد، و يروح لباب بيتهم و يطق الباب، ينزل راسه و يبتسم لمشعل اللي يطالعه و يرتب له شعره، ينفتح الباب و يلقى اخوه اللي اصغر منه بسنتين بأيده بنت صغيره واضح انها ما تعرف تمشي و يطالع فهد بصدمه

"هلا فهد يا هلا" يبتسم له ماد ايده و يسلم خد بخد و ينزل راسه لمشعل و تتسع ابتسامته  "اهلااً بحبيب عمه يا اهلاً!! ادخل داخل الصبيان ينطرونك"

مشعل يصرخ داخل مستانس بشوفة الصغار اللي بعمره و واضح انهم مستانسين اكثر بشوفته و قاموا يسحبونه يورونه الالعاب الجديده

يرتاح فهد من حس انهم متقبلين مشعل، و ابتسم للبنت الصغيره و مد ايده ياخذها من اخوه و يعطيه اياه بتوتر "حبيبتي!! تهبل بنت منو؟" يبتسم لاخوه يطالعه و يجعد حاجبه لما شاف التوتر بوجهه

"شفيك؟" يضحك بخفه على تعابير وجهه

"اسمها كادي.. بنتي انا" ينزل عينه و فهد تدريجياً تختفي الضحكه من على شفايفه و واضح الصدمه بوجهه

"لا عاد من صجي شنو بنتك؟ متى تزوجت انت؟" يسأله بجديه و البنت بايده قاعده تلعب باذن فهد، لكن فهد مو معاها، كل اللي يفكر فيه شلون بنته و اهوا ما يذكر ان اخوه متزوج

"متزوج من ثلاث سنين" يحط عينه بعين اخوه و يتنهد مكمل "ابوي ما رضى انك تدري عن الموضوع ولا احد يعزمك.. اسف فهد بس مو بايدي" يعتذر و فهد يمد البنت لابوها، و يهز راسه له

"تتربي بعزك" يبتسم له بخفه و يعطيه جنطة مشعل "فيها كل شي يحتاجه انا يمكن الصبح باجر امره دير بالك عليه تمام؟" يربت على جتفه و يروح للسياره، وواضحه الضيقه اللي صكته من بعد ما سمع الكلام من اخوه

"وش فيك؟" يهمس له طلال و يطالعه فهد و يبتسم هاز راسه للجهتين و يحرك بسرعه للوكيشن دزه له علي بتليفونه، علي و خالد مندمجين مع بعض ورا، يورون بعض اشياء بتليفوناتهم

"شفت ابوك؟" يسأله و يهز فهد راسه، و يسكت طلال مو عارفه شيقول

يوصلون للحفله و ينزلون علي و خالد "علي يا جلب انت و وياه" يناديهم فهد بسرعه و يلتفتون له مع بعض

"ها؟" يصرخ علي

"اسمعوني!! واحد منكم لا يسكر فاهمين؟؟ مو ملزوم اعابل فيكم اثنينكم و انتوا سكارى هذا انا حذرت" يحذرهم بصوت جدي و يهزون راسهم له و يسكرون الباب داخلين للشاليه

يبقى فهد و طلال بالسياره و فهد تفكيره بأهله، يدري ان كلهم يكرهونه، لكن امه وصتهم بأنهم يتعاملون معاه عادي ولا بتتبرى منهم كلهم ليوم الدين، ابوه مو معبره، ولا يدري عنه، اقل شي ممكن يسوونه حتى انهم يقولون له ان اخوك الصغير بيتزوج لو يحضر ساعتين بس، اكيد الناس بتقول لابوه انه يعرف يربي و قراره احسن قرار بأنه يتبرى من واحد ملحد خنيث مثلي..