جارتنا سميتها نعيمة ،كانت حنينة بزاف و كانت تتعتابرني فحال بنتها اصلا هي كانت حنينة مع كلشي و كنت ديما تنقول انه لكان عندها شي وليد و لا بنية كان غيكون اسعد طفل فالعالم بأم بحالها و لكن الله كان باقي ممكتب ليها الولاد ،بقات شحال و هي تتسولني مالي و لكن مقدرتش نجاوبها و قلت ليها باللي مجبتش مزيان فالامتحان و بابا غيخاصم عليا ، تيقاتني و بقيت معاها حتا و صل الوقت اللي ايخصني نكون فالدار ، رجعت و انا محاملاش نشوفها ، دقيت و حلات ليا غيثة و هضرات معايا ولكن مجاوبتهاش ، حطيت حوايجي و بقيت تنفكر "دابا الى بابا عرف غيوقع مشكل كبير و الى معرفش غيبقا عايش مع وحدة خانتو ،ولكن حتى هو من حقو يعرف........"بقيت تنتخبط فافكاري حتى جا نوفل تيدق عليا .
نوفل : زينب هانا جيت ،حلي نهضر معاك .
انا : سير مبغيتش نهضر معاك .
نوفل : مالكي واش قلقتك فشي حاجة ؟
أنا : لا و لكن بغيت نبقا بوحدي .
نوفل : حتا انا انبقا هنا حتا تحلي و نعرف مالكي .
بقينا هو يقوليا حلي و انا نقولو لا حتا صدعني فراسي و مشيت حليت ليه .
نوفل : شفتي قلت ليك راكي اتحلي ليا فاللخر.
انا غير شفتو تلاحيت عليه و طلقت العنان لدموعي ،هو تصدم فاش شافني هاكاك حيت لبكيت تنبكي غير فشوش و صافي اما دابا انا عارفة و هو عارف انني تنبكي من قلبي ،عنقني و بقا تيربت بحنان على شعري انا غا متنزيد فيه ،فاش تهدنت مسحليا دموعي بيديه و غسل ليا وجهي و بدا تيسولني ،
نوفل : زينب ختي مالكي ياكما طرات ليك شي حاجة و لا قلقك شي واحد ، واش تضرك شي حاجة ؟
أنا : لا ماماليش غير بغيت نبكي و صافي .
نوفل : (شد وجهي بيديه بجوج و بنظرة كلها حنان)معرفتش علامن تتكذبي واش عليا ولا علا راسك ياك انا خوك ، واش تخبي على خوك شي حاجة ماشي حشومة؟
أنا : صافي مبغيت نهضر معا حتا واحد بغيت نبقا بوحدي عافاك.
شاف فيا بانكسار و قاليا .
نوفل : واخا شوفي غير نتي شنو اللي يريحك و لا بغيتي تهضري معايا وتعاودي ليا شنو مالك راني ديما موجود.
انا : شكرا .
و خرج و انا بقيت بوحدي تنفكر و الغد مشيت نساحبت من المسرحية و الاغنية واخا حتا واحد مبغا و لكن الا بقيت را غير انخصرها و صافي مبقا عندي الراس ديال شي انشطة ولا حفاضة، دازو يومين و مبقيتش تنهضر معا ماما و الشهية ديالي مبقاتش و بابا باقي مسافر كلشي لاحظ التغير ديالي و انا غير ساهية تنفكر شنو ندير منين يجي بابا ، النهار الثالث رجع بابا من السفر و كنت فرحانا برجوعو و خايفة من اللي جاي هبطنا كلنا لعندو و مشات ماما سلمات عليه و باستو فحال الى مدارت والو و انا كرهتها و كرهت داك النفاق ديالها ، سلمنا عليه كاملين و انا فاش كنت انبوسو هزني فيديه لفوق "توحشتك أزين ديال باباه" تبسمت ليه و مشيت تنجري لبيتي و بقيت تنبكي حتا سمعتو تيعيطلي من ورا الباب ، درت يدي على راسي و درت بحالا ناعسة ، هو دخل و جلس حدايا و حسيت بيه تيشوف فيا بحنان ، كحزني باش ننعس مزيان و لقا الوسادة فازكة بالدموع ،و فديك اللحظة دخل نوفل و قاليه .
نوفل : من نهار مشيتي و هي كل ليلة هاكا .
بابا : ولكن هادي ماشي اول مرة انسافر فيها.
نوفل : بنتك عندها شي حاجة مخبعاها و مباغاش تقولها.
بابا : واش طرات شي حاجة فاش كنت مسافر ؟
نوفل :الا كانت شي حاجة انا مسايقش ليها لخبار منعرف اما را مطاري والو فالدار
بابا : المهم انت سير نعس انا انحل هاد المشكل كون هاني .
نوفل : واخا أبابا تصبح على خير
باسني بابا و مشا
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
