بدا العرس و جات ختي حبيبتي تتحمق، شطحت شوية و علي كان غادي ياكلني حيت كلشي بقا تيشوف فيا ،ضحكنا نشطنا تصورنا كلينا دوزنا وقت زوين بزاف، انا عييت و خرجت نشم الهوا على برا حتا تنسمع شي صوت ورايا
هو : السلام
انا ضرت تيبان ليا ولد سمر طويل حجبانو ملاقيين و حروفو كحلين الملامح ديالو عموما زوينين
انا : و عليكم السلام
هو : ممكن نوقف حداك
انا : وقف
هو : سميتي غسان و انت؟
أنا : زينب
غسان : متشرفين سمية زوينة بحال مولاتها
انا : اه شكرا
غسان : شفتك قبيلة فاش كنتي لداخل و عجبتيني قلت نتعرف عليك
انا : لا سمحليا انا مخطوبة
غسان :كلكم تتقولو هاكا
انا : مسوقكش
غسان : احح قاصحة مع راساتك
انا : و انت مالك؟
غسان : قلتي مخطوبة ياك
انا : اه
غسان : و فين هو الخاتم
انا : واش غتبقا تحقق معايا بدل الساعة بأخرى يالاه هاني مشيت
غسان : لا مغتمشيش (شدني من يدي)
انا : اي قسحتيني رخي مني
غسان : عطيني غير نمرتك و نطلقك
انا : وا بعد مني
غسان : لا مغنطلقش منك
علي : مغطلقش منها ايوا هاك (ضربوا لوجهو)
غسان : مديتي عليا يديك دابا
انا : علي متديهاش فيه عافاك
علي : زينب واش مسمعتيهش مشفتيش شنو دار ليك
انا : عافاك مبغيتش تدابزو دابا عافاك
علي : صافي على خاطرك و صافي
غسان : هادي هي الرجلة مخبع ورا صحبتك
علي : انا انوريك الرجلة كيدايرة
انا : لا عافاك هو را تيبغي غير يستفزك متديهاش فيه
غسان : خليك مخبع تما
علي : لا زدتي فيه بزاف
طلق مني علي و مشا لعندو بقاو تيهضرو ،انا خفت ليدابزو مشيت تنجرو و هو متيسمعش ليا
انا : علي هدا عافاك ماشي دابا
علي : زينب را هو تيقلب عليا
انا : عافاك والله حتا حتا علي عافاك را متنحسش براسي مزيانة
علي : مالكي اش تيضرك خديتي دواك
غسان : تيبانليا صحبتك عيانة شوية انا خليتك على وجهها ولكن را باقي نتلاقاو
علي : صافي سمحيليا احياتي هو عصبني بزاف مقدرتش نتحكم فراسي منقدرش نتحمل شي واحد يقرب ليك ولا يقيس شعرة منك فهميني ،باش تتحسي شربتي الدوا ديالك بعدا؟
انا : اه صافي نسا يالاه ندخلو
علي : يالاه
سالا العرس و مروة قبطات البوكي ديال الورد شحال و حنا شادين فيها ،ختي مشات مع راجلها دوزو شهر العسل و من بعد استقرت معاه فالخارج، قررنا انا و مروة و سعد نديرو ل BTS بحيت غادي يمكن لينا نقراو عامين و من بعد ندفعو لشي مدرسة ولا نكملو الدراسة ديالنا فالخارج ،خدينا شقة فآگدال (الرباط) و جهزناها و قادينا أمورنا و كلشي ولا موجود كنا طايرين بالفرحة، درنا برنامج أسبوعي نوازنو فيه ما بين القراية و المراجعة و الخروج باش يكون وقتنا منظم ،النهار الأول مشينا تعرفنا على التلاميذ غير القرايين باينا عليهم غا من وجوههم ،الليسي زوين و كلشي منظم، داز الاسبوع الاول و بدينا القراية ديال المعقول، فالدار انا و مروة ديما مدابزين كالعادة، ولكن واخا هاكاك مفاهمين هههه الحماق و صافي.
مروة : واااا زينب وا فينك
انا : غير بشوية مالكي تتبرحي؟
مروة : سيري غسلي الماعن
انا : مالي خدامة عند باك؟
مروة : وا را نوبتك انا غسلتهم البارح
انا : انا متنرونش بزاف انت اللي كل مرة هازة حاجة
مروة : مسوقيش
انا : حتا انا
مروة : اوووف هانتي غتشوفي من اليوم شربة الما هي التالية مغتوصلكش من عندي
انا : عارفة احبيبة ههههه
مروة : تتعصبيني هاكا
انا : اي قلبي تعصبتي ولا ياكما كتسنايني نجي نحزرك ولا
مروة : ايلا قبطتك غنوريك خيزو و محلاه
انا : هاهاها
مروة : الا مفرجتش فيك الرباط كاملة منتسماش مروة
أنا: و شنو نسميوك بوطبسيل حميد مثلا هاهاها
مروة : تتجبديني دابا
انا : لسميتك مرا و مزغرتة عليك مك قبطيني نياهاهاها
مروة : هانا نايضة ليك
انا هاربة منها و هي تابعاني مشفتش الطبلة و انا نضهس فيها و طحت على كمارتي و هي بدلا متعاوني تفرشات حدايا و شدات كرشها بالضحك، هاكدا ايامنا تدوز، كنت مصاحبة مع ولاد الباك و السيزيام اللي مفهمش شي حاجة تيجي لعندي نشرحها ليه، فاش تيكون عندنا شي امتحان تنوجدو ليه حنا بثلاثة، سعد كان تيسكن قريب لينا تيجي لعندنا بزاف و تيقصر معانا، السبت و الأحد تنهبطو لمكناس، و كل ليلة تتعيط لي ندى تتعاودلي على نهارها و على كل حاجة تطرى معاها و انا كذلك ،تندوز عند علي مرة مرة للدار تنجلس مع ماماه و جداه تندوزو وقت زوين، واحد النهار قاليا نمشي لعندو كيف العادة، دخلت كانت الدار خاوية .
انا : فينها ماماك و جداك؟
علي : مشاو عند خالتي حتال بعد غدا عاد ايجيو
انا : اه صافي انبقاو بوحدنا؟
علي : واش خايفة مني ولا شنو؟
أنا : لا ماشي هاكاك ولكن
علي : ولكن شنو
انا : معرفتش
علي : شنو معرفتيش ؟
أنا : معرفتش و صافي
علي : لمكنتيش مرتاحة نقدرو نخرجو
انا : لا غير خلينا
علي : اممم شنو نديرو دابا؟
أنا : نلعبو
علي : شنو نلعبو؟
أنا : نلعبو بالبلاي اوكي
علي : و نتخاطرو
انا : انا نتخاطرو اللي ربح يطلب مبغا
علي : صافي مشات
خدمنا البلاي و بدينا تنلعبو، كل واحد تيحاول يربح و كل مرة تنتعادلو ،طاح الظلام و باقي مخسر حتا واحد، شوية تتبان ليا مروة تتصوني، قطعت باش منخسرش و عاودات صونات
انا : الو نعام
مروة : احبيبتي فينك النهار كامل و انت غابرة
انا : انا مع علي فالدار
مروة : يا را الليل هادا ماناوياش ترجعي ولا شنو؟
أنا : خليني نلعب رانا مخاطرين واش باغاني نخسر ولا شنو؟
مروة : و متعطليش را......
انا : وااااع بغيت ليك مصيبة خسرتيني صافي تهنيتي دابا على خاطرك ؟
مروة : تجي لعدويا و اللي ميبغيني بغيتها ليك نيت انت دكشي اللي يصلاح ليك
انا : تلاحي انبقا نتفقص معاك فابور
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
