فقت على صوت التيليفون اللي مبغاش يسكت من الصباح، لقيت الميساجات فالفيس و الواتساب و ليزابيل التلفون علاين يطرطق ، و ورقة حدا راسي مكتوب فيها "عيد ميلاد سعيد زينب الغباء" احح عليك امروة ، فطرنا و مشينا نقراو الحصة كلها و انا تنجاوب الناس اللي تيباركو ليا عيد ميلادي، خرجنا تغدينا و العشية قرينا و خرجنا مع 4، مشينا للدار و جاني الملل آو آش هاد الزمر زعما ليوم كان المفروض زعما يكون النشاط و الحيحة و كذا، مروة حانية على تيليفونها .
انا : اوووف جاني الملل يالاه نديرو شي حاجة
مروة : بحالاش ؟
أنا : نخرجو؟
مروة : كل نهار تنخرجو عييت
انا : يالاه نتفرجو فشي حاجة؟
مروة : مفيااش والله
انا : و تنهضر معاك شوفي فيا بعدا
مروة : اووف صدعتيني
انا : صافي بناقص منك انا نعيط على علي هو اللي متيخصرش ليا
مروة : عيطي
انا : آلو علي لاباس
علي : لاباس joyeux anniversaire عقبال 100 سنة
انا : ميغسي ميغسي
علي : ايوا
انا : شنو تدير؟
علي : غير خدام على واحد البروجي
انا : هي ممساليش
علي : اممم شوية علاش؟
أنا : صافي غير قلت نتلاقاو ولكن معليش
تنهضر معاه شوية سمعت شي بنت تتقول : كيجاك هذا زوين اعمري؟ هو قاليا بالزربة : عرفتي بلاتي شوية و نعيط ليك ،
مجيت فين نجاوبو حتا قطع فوجهي و أنا طلع ليا الدم شكون تكون هاديك و شنو تيديرو اوووف، مشيت لبست حوايجي سروال كحل و قميجة دجينز و طربوش بالكاشكول ديالو قهويين و مونطو قصير فالازرق غامق و ليبوط قهوي حد الركبة، هزيت المظل ديالي و خرجت، كانت الشتا خيط من السما، فبحال هاد الجو هادي شي ست سنين تنعقل واحد النهار كنت راجعة مع الستة فالظلام، كان فعمري 12 عام، وصلت للدار تندق على ماما و والو حتا حد متيجاوب، بقيت فداك البرد و الشتا تطيح عليا و الكلاب تينبحو حتال الربعة ديال الصباح عاد جات ماما مدوخا حلات ليا الباب و قالت ليا دخلي و مشات تنعس، بدلت حوايجي و نعست تنترعد، و مدة و انا مريضة بالحلاقم و السخانة و حتا حد ممسوق ليا ،تفكرت داك الاحساس و تقلبو عليا المواجيع تاني، عيني غرغرو بالدموع، جلست فواحد الجريدة و بقيت تنشم ريحة التراب فازگ و تنسمع صوت العصافير و الشتا، تنحس بخاطري مزير عليا، حياتي كلها دوزتها و انا تنحاول نتناسا دكشي باش منتألمش و منمرضش عوتاني، عيطت على بابا هضرت معاه مدة، شحال و حنا تنهضرو، هضرت مع ندى حتا هي، من بعد جا جلس حدايا شي واحد، كان ولد يكون عندو شي 15 عام، شديت معاه الحديث، مسولتوش حتا على سميتو ولكن هضرنا على كلشيء تقريبا، على الكورة على القراية على المجتمع حتا طاح الظلام، شوية حسيت بشي يد تحطات على فمي و داك الدري تيشوف فهاداك اللي ورايا و قاليه سالينا الشيف و انا ترخيت بين يديه، حليت عيني، كنت مربوطة مع كرسي فشي بيت مظلم، شداتني الخلعة من صبعي الصغير، حسيت بشي واحد حط يدو على راسي و قال : الليلة ليلتي، شوية سمعت الصداع و الهضرة و شعل الضو و تنسمعهم تيغنيو : سنة حلوة يا جميل، سنة حلوة يا جميل، سنة حلوة يا زينب ،سنة حلوة يا جميل ، و كلشي بدا تيصفق و انا عاد فهمت كلشي، دابا مروة اللي مبغاتش تخرج معايا و علي اللي عصبني و الولد اللي شدني بالهضرة كلشي غير باش يخليوها ليا مفاجأة، جات مروة عنقاتني و بقات تضحك و سعد سلم عليا و علي باسني .
مروة : هاهاها درناها بيك
انا : ههه الصراحة اه واخا عليكم
علي : الليلة عاد اتبدا
انا : كيفاش
علي : هاحنا خليناك مع صحبتك من هنا جوج سوايع نلقاوكم واجدين
مروة : ولا عليك
خرجو و مشينا دوشنا و صيبنا شعرنا و لبسنا، انا كسوة سليم بيضة حد الركبة بالكول طالع و كويرة كحلة و طالون و حلقات كوحل و شعري بوكلي طلقتو ولا تيوصل حتال خصري و مروة كسوة سليم فالاخضر ملكي حد الركبة و طالون و مونطو فالقهوي و طلقات شعرها اللي قد شعري فالطول، وصل علي بطونوبيلتو الكحلة و كسيرا حتا وصلنا قدام واحد البواط +18 هاهاها اول أمنية ليوم اتحقق ،دخلنا كانو كاع صحابي و صحاباتي تما الموسيقى مطلوقة و كلشي فرحان ، نضت تنشطح و قلبي طاير بالفرحة، تمنيت أمنية و طفيت الشمع ،كلينا الكيكة و عطاوني الكادويات حتا مبقيتش قادرة نهزهم، سالينا الحفلة و رجعنا للطونوبيل .
انا : علي شكرا بزاف تنحماق عليكم
علي : واخا دكشي قليل فحقك
انا : لا بالعكس متصورش شحال فرحتوني
علي : يالاهي نمشيو
انا : بلاتي نتسناو مروة
علي : مروة مشات مع سعد
انا : و حنا فين غاديين هادي ماشي طريق الدار
علي : باقي معطيتكش الكادو ديالي
انا : ههه اه بصح
علي : هاحنا وصلنا
انا : شنو انديرو حدا الكورنيش؟
علي : شوفي لهيه، تيبان ليك داك المطعم
انا : اه ديال الحوت تنحماق عليه
علي : انمشيو ليه
أنت تقرأ
طفولة ضائعة
Kısa Hikayeقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
