البنت : الو .
انا : اه مروة سمحليا كنت فالسطح و مسمعتش التيليفون .
مروة : ياك زينب هادي .
انا : لا معاك الحاج عبد القادر مول المعصرة دالزيت .
مروة : ههه خليتيني حتا قلت صافي البنت غي مشات قلبات وجها مرة وحدة .
انا : ياك بعدا وا معندي ميسالك دغيا بديتي تنويها خايبة بالحق معليش دور دور و ترجع ليك .
مروة :لا لا غير تنضحك ، المهم نسيت مسولتك فين تتقراي ؟
انا : تنقرا فالتاسعة .
مروة : لا زعما انا مدرسة .
انا : واخا نقوليك سميتها مغتعرفيهاش المهم هي جات غير حدانا ولكن علاش تتسولي ؟
مروة : بغيت زعمة نقوليك نتي بعيدة عليا علاش متحوليش لكوليج ديالنا نبقاو نتلاقاو تما و نخدمو بجوج غيكون حسن ولا لا ؟
انا : واش ديال الدولة .
مروة : ختي حنا غا ولاد الشعب فين باغانا نقراو .
انا : كون كانت مني انا را هانية و لكن بابا مستحيل يخليني نقرا تما ،من صغري و انا تنقرا فالبريفي غادا بواحد النيفو ميمكنش نجي و نبدل .
مروة : و فاش كنتي فالرباط فاش كنتي تتقراي .
انا : هاديك حاجة و هادي الحاجة .
مروة : المهم انا اقترحت عليك بغيتي هي هاديك مبغيتيش شغلك هاداك .
انا : اوكي يكون خير .
بقينا شادين فالهضرة حتا عيطات عليها ماماها تسخر و مشات .
نعست ديك الليل و الهضرة ديالها كدور ليا فراسي ، مروة بنت ضريفة و هبيلة و باينة غنتفاهم معاها و لكن هي بعيدة عليا ، يعني لكنا تنقراو بجوج فنفس المدرسة غنكونو كنتلاقاو دايمن ، كاين حل خور و هو انها هي اللي تحول عندي و لكن مستحيل تبغي هي ماشي من النوع اللي يتفاهم مع دوك النمادج غيجريو عليها من النهار اللول ، ياه شو سبحان الله غي نهار باش تعارفنا و فحالا عشرة سنين ، دغيا قدرت نعرف شنو تبغي و شنو متبغيش، مروة بنت ساهل تكسبها ، اجتماعية و ضحوكية و عندها مع بنادم ، دغيا تدخل للخاطر ،و مكتسكتش من الهضرة دغيا تتسرسب، اللي فقلبها على لسانها و تتجي لبنادم فاص معندهاش مع الكريتيك و الصباغة ، عندها واحد الشعر يا سلام ، كحل و رطب مسبسب ، مطويلش بزاف تيوصل لنص ضهرها ، و لكن تيجي معاها ، عينيها قهويين و رموشها طالعين طبيعيين ،حجبانها مقادين من عند الله و خفاف ، بشرتها بيضة ، و ضحكتها زوينة ، و رقيقة ، اما انا كان شعري طويل حتال لخر ضهري و رطب و فيه دي بوكل كبار اللي شافو تيحمقو، كان لونو قهوي و لكن مع الضو ولا الشمش تيبان زعر ،و عيني خوضر مايلين للصفر و فالجناب فيهم الرمادي كبار و تيلفتو الانظار بنادم مقزدر تيبقا يحنزز متيهبطش عينو و متيقول حتا تبارك الله ،لوني بيض ولكن دغيا تتشد فيا الشمش تنولي سمرة شوية ماشي بزاف ، نيفي و فمي صغار ، و عندي الغمازات ، و فاش تنضحك تيبان واحد الناب صغير هو اللي تيميز ضحكتي ، ودني معمرني تقبتهم ، المهم هادي هي انا ، بقيت تنفكر فالهضرة ديال مروة و قررت نتحول عندها واخا يكون اللي كان .
فقت الصباح ، كان الحد مكاينة قراية ، فطرت بوحدي حيت بابا ليوم تيفطر بكري و تيخرج و خواتاتي حتى هما و مشيت لبيتي نبلاني شنو ندير ليوم ، عيطت على مروة باش نشوف لماكان عندها والو نخرجو نتساراو و دكشي اللي كان ، لبست صاية باج حد الركبة و ليباا موس شفافة و قميجة بيضة بلا كمام فالبيض و سنسلة فضية، صنيديلة كحلة بلا و هزيت صاكي والفلوس ودرت طربوش ربيعي باج فيه بابيون و ضفرت شعري سبولة جنب و خرجت ، وصلني السعيد بالطونوبيل لعند مروة لقيتها باقا مكملات ، سلمت على ماماها و مشيت عندها للبيت ، لقيتها مخشية فالماريو ديالها تتقبش فيه .
انا : هادي جوج سوايع باش قلت ليك هانا جاية و نتي باقا موجدتي راسك ، معندك كلمة اصحبتي .
هي : (باقا مخشية فالماريو) غتسكتي ولا نجي نوريك الكلمة كيف دايرة سحابليك انا فحالك عندي الخداما تنلقا كلشي موجود ، را من الصباح و انا نغسل فدوك الماعن حلفو لتسالاو تال دابا عاد ساليت .
انا : اوا منين تسالاو طلقينا شنو باقا تديري تما .
هي :(بالغوات) هاياااا واخيرا لقيتها بنت الحرام حمقاتني من قبيلة و انا نقلب عليها و تقول واش بغات تبان .
انا : هدشي كامل على كاسكيطة مكتمركيش اصحبتي .
هي : سكتي سكتي هادي را جابها ليا الحب ديالي .
انا : هاي هاي هاي مقلتيهاش ليا العفريتة شكون هاد تعيس الحظ ؟
هي : اويلي الله ينجيني مالنا على فالك را غا خويا اللي جابها ليا لبارح عارفني تنحماق على الكيبيات، شوفي ماشي زوينة عارف بعدا دوقي .
انا : علاش خوك جا ؟ قلتي ليا سميتو مراد ياك .
هي : اه تيجي كل سبت و حد ، المهم زيدي را تعطلنا .
انا : يالاه .
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
