طفولة ضائعة

الجزء 21

دخلنا للقسم كان عندنا الفرونسي ، جلسنا فالطبلة الثالتة انا و مروة و سعد مورانا .
الاستاذ : زينب راكي فالقسم حيدي الطربوش على راسك .
انا : استاذ غي خليه غنمرض .
الاستاذ : را القسم سخون و هاكاك متيبانو ليا حتا عينيك ، كيغنعرفك متبعة ولا لا .
انا :(بشوية) اوووف بقيت ليه غير انا يحضيني .
سعد جر ليا الطربوش على راسي و تيقوليا : قاليك الاستاذ حيدي الطر.......و ماجا فين يكملها حتا شاف شعري و بقا حال فمو ، دارت مروة شافتني بقات مصدومة شي جوج ثواني ،شوية هي تغوت .
مروة : آآآآويلييي واش قطعتي شعرك ألبقرة واش نتي تسطيتي ولا شنو مالكي .
القسم كلو دار تيشوف فيا مصدوم و الاستاذ براسو و انا معرفت مندير ،جاتني الضحكة ،فالاول تبسمت و من بعد غلباتني وانا نضحك ، و حلف الضحك لحبس ،مروة شافتني و بدات كضحك و سعد حتا هو و الاستاذ براسو ،شوية القسم كامل دخل هستيريا ديال الضحك و حتا واحد معارف علاش ،انا تنحبس و تنشوف فمروة تنزيد نضحك و هي كذلك ، حتا واحد مقدر يحبس ،اصلا انا ديما فوقما نضحك تيضحك الشخص اللي معايا ،تيقولو ليا ضحكتك تضحك، الاستاذ جمع ادواتو و قالينا ليوم مكاين قراية عندكم جوج سوايع اللي عندو شي نكتة ولا شي حاجة ينوض يديرها ، ناض واحد الدري بدا تيقلد لينا الاساتذة و كلشي تيضحك حيت تيعرف يمثل ، و واحد بقا تيقلد المعلقين ديال كورة ، كل واحد عاود شي موقف مضحك فايت جرا ليه ،و دازت ديك الحصة من اروع ما يكون ، و كنا خارجين مع العشرة .
مروة : هههه باقي شادني الضحك ديال قبيلا كون كان شي استاذ آخر كون هجرو لينا ، آجي نتي علاش قطعتي شعرك؟
انا : اصحبتي را كان معذبني و اصلا هاكا عجبني حسن .
سعد : حتا الشعر القصير را جا معاك اصلا نتي تيجي معاك كلشي .
مروة : هاي هاي هاي اوا باقي ليك غا تمشي تخطبها من دارهم .
سعد : علاش لا .
انا : غرتي غرتي ، اصلا عادي سعد راه خويا و حبيبي و عندو الذوق عليك .
مروة : ياك اشنيولة تحاميتو دابا .
انا : ههه زيدي زيدي الحمقة .
كانو هاكا ايامنا ،مرة نقراو مرة نضحكو ،الحاجة اللي مكانتش عاجباني هي شي وحدين فالمدرسة تيقولو انا ممزياناش تنمشي نقصر مع الدراري و خارجة الطريق، معرفتش مالهم معايا واخا عمري آذيت شي ، ضاحكة مع كلشي و اللي بغا مني شي حاجة تنعاونو فيها، بالحق خليهم تيديو غير الذنوب ، داز شهر على آخر ميساج لعلي حتا نسيتو ، واحد النهار تنحل الفيس لقيتو مسيفط ميساج على انه فكر و قرر نبداو من جديد و ميكون بيناتنا لاكذوب لا والو و بانه كان مفتاخر بالصداقة ديالنا و دكشي اللي درت خلا ثقتو فيا تزعزع ولكن غا بلاتي اسي علي راك باقي نتا كلك غتزعزع ، رجعنا تنهضرو و عرفتو عليا من جديد و مكذبتش ، غير مذكرتش ليه حس نوفل ،بقينا مرة مرة تنتلاقاو عادي تيجي عندي و عرفتو على مروة على انه صديق وهي براسها مقلت ليها والو على دكشي فاش تنفكر ، علي انسان رائع جدا من الاشخاص اللي عمرني نساهم فحياتي ،شخص ناضج فعقليتو و تفكيرو و عندو حس طفولي مميز ، شخصيتو قوية بزاف و عندو كلمة ديال الرجال ،مواعيدو دقيقة جدا ،شخص اللي ممكن تكون حداه على طبيعتك، خلينا من داكشي ديال الصواب و البروتوكول الخاوي، فاش تنتفروحو تندوزوها ، جا عندي واحد المرة لدارنا و عرفتو على ماما و بابا اللي فرحو بيه بزاف ، عرفتو على ختي ندى الحبيبة و تأقلمو دغيا مع بعضياتهم ، ولينا قراب لبعضنا بزاف و هدشي اللي انا بغيت .
دوزنا العام و نجحنا بتميز و حتا سعد جاب معدل مزيان حيت كنا محلفين عليه انا و مروة لمزيرش راسو فالقراية و جاب مزيان غنقلبو عليه ، طبعا حنا منقدروش نديروها ولكن غير باش يتقاد فقرايتو شوية و دكشي اللي بغيناه وصلنا ليه ،باباه شرا ليه سكوتر بهاد المناسبة و كنا تنخرجو مع علي نضورو ، هو تيركب مروة و علي تيركبني و تنمشيو نتساراو ،و كانت افضل بلاصة عندي هي زكوطة ، واحد البلاصة فطريق مولاي دريس فيها واحد العين و حداها غابة و الجبال تما وانا تيحمقوني هاد الاجواء ،وصل الصيف و رجعنا للقصارة فحال ديما.