انا : السلام .
علي : وعليكم السلام .
انا : واخا نجلس حداك لمكانش عندك شي مشكل .
علي : وي تفضلي غير راني مداير مع واحد البنت هايا شوية و تجي .
انا : (جريت الكرسي وجلست) مممم صحبتك؟
علي : لا غير صديقة و صافي اول مرة نتلاقاو .
انا : اه بون مزيان ، شنو سميتك ؟
علي : علي و نتي؟
انا : انا سميتني زينب .
علي : متشرفين .
انا : الشرف ليا .
علي : اوا الالة زينب حتا نتي كتسناي شي واحد .
كانت فيا واحد القاعدة هي ان شي واحد لنطق سميتي فحالي كينطقوها المغاربة كاملين تنتعصب تيخصو ينطقها مشكولة .
انا : سميتني زينب ماشي زينب بالفتحة فوق الزاي اوكي .
علي : نتي زينب .
انا : را قلتها ليك فالاول .
علي : لا زعما نتي زينب اللي كنت تنتسناك ،اول مرة هضرنا فالتيليفون قلتي الهضرة نفسها انا عاقل .
انا معرفت مندير و الهضرة وحلات ليا ،كنت تنتوقع الصراحة غيشوفني زوينة و حسن من البنت اللي مسيفطا ليه مغيقول والو و غيفرح ربما كثر ولكن طرا العكس و معجبوش الحال حيت كذبت عليه وقال ليا اللي يكذب مرة يكذب عشرة و مدام كلشي كذوب فسمحي ليا انا منقدرش نبقا مع وحدة كذابة و خلص و مشا فحالو ، انا جاتني فحال الصدمة مقدرتش نهضر و معرفت مندير كلامو صحيح 100% ولكن مكانش عليه يدير هاكاك، حسيت بشي احساس فشي شكل ، مخصنيش نتخلا عليه هو الوسيلة الوحيدة باش نوصل لختو ، مشيت للدار و شحال و انا نسيفط ليه فالميساجات و حدو رد عليا بميساج واحد 'ميمكنش ليا نجاوبك دابا خلي حتا نفكر على خاطري باش منتسرعش و ناخد القرار الصحيح و حتا نتي فكري مزيان' اوا صافي فكر ولا زمر انا مالي مسوقيش، دازت سيمانة غير الملل ، كنت تنمشي للسونطر تنقرا الفرونسي و لونغلي و تنمشي للاصال و واحد الجمعية تدير انشطة مكنتش تنمشي ليها ديما ولكن فاش تنمشي تنشطو مزيان .
غدا اتسالا العطلة و غنرجعو نقراو ،مروة حتال ليوم فالليل عاد جات مقدرناش نتلاقاو ،بالحق حسن خليها حتال الليسي و تشوف اللوك الجديد ديالي .
فقت مع الخمسة و نص ،دوشت و صايبت شعري سامبل و لبست تريكو فالبيض و الرمادي والكول ديالو طالع ، فوقو جاكيت ديال الكوير كحلة ، جينز زرق غامق و ليبوط تحت الركبة شوية بطالون قصير و سنسلة طويلة و طريبيش ديال الصوف فالبيض و درت ليكيت فودني و هزيت صاكي وخرجت ،كانت غير الضبابة و السما زرقة الشمس باقا مطلعات ، يالاه 7 قل ربع دابا ، حليت المظل و كانت الشتا خيط من السما تيحمقني هاد الجو ،الحوانت يالاه تيحلو ، الطريق باقا بعيدة خاصني تقريبا شي نص ساعة ،غادة حتا تنحس بشي واحد دار يدو على فمي و جارني لواحد الركنة ، وانا تنغوت و فمي سادو بيديه ،دموعي هبطو بالخلعة و فزكو يديه ،وصلني لواحد القنت و طلق مني ،تندور تنلقاه غير سعد .
انا : الزمر خلعتيني يسحابلي غا شي شفار ولا شي واحد يمشي يدير ليا شي حاجة .
سعد : ياء كنا غي تنضحكو ياك موالفين بهاد الضحك مالكي تعصبتي على والو .
انا : على والو و كون طرات ليا شي حاجة ،سمع اسعد متبقاش دير هاد ضحك البناية .
سعد :(مسح ليا دموعي بيديه) معمرني شفتك كتبكي و منبغيش نشوفك صافي سمحيليا مقصدت والو راكي عارفاني ، و زايدون مالكي خارجة فهاد الوقت را باقي الحال ، و مالكي غادة على رجليك على مكاين اللي يوصلك ؟
انا : لا انا اللي بغيت نتمشا شوية ، وانت شنو مخرجك دابا را حنا قاريين .
سعد : مشفتينيش هاز شكارتي انا تنخرج بكري و تنمشي نفطر عند با العربي نتي فطرتي ولا باقي ؟
انا : باقي .
سعد : اوا زيدي نمشيو نفطرو عندو بجوج ، و متبقايش تخرجي بوحدك فهاد الوقت را الدنيا خاوية و شحال من بنت غريساوها غير فهاد البلايص كتسمعي .
انا : اوكي اوكي غي تحرك نمشيو .
بقينا غاديين تنهضرو و نضحكو محسينا براسنا حتا وصلنا عند با العربي ، عندو محلبة صغيرة وزوينة ، فطرنا و جلسنا قدام الباب تنتسناو 8 تصوني ، بداو الدراري كيتجمعو و كتبان ليا مروة جايا كتجري من بعيد بلا مظل و كلها فازكة و كضحك ممسوقاش .
مروة : شفتكم مصبحين بكري مموالفاش ليكم .
انا : تلاقينا فالطريق و جينا بكري .
مروة : و متقولوهاش ليا يا الغدارة .
انا : هاء ، اوا نتي فين و حنا فين و اصلا تلاقينا غي صدفة...
سعد :اوكي، زيدو دخلو را الباب تحل .
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
