المهم خرجنا درنا على القيساريات كاملين و دزنا لماكدو تغدينا و دزنا للسينيما تفرجنا فواحد الفلم و هبطنا للهديم تسارينا حتا شبعنا و من بعد شرينا غزل البنات و جلسنا فواحد الكرسي تناكلو .
انا : اي رجلي ضروني بالمشي النهار كامل و حنا ندورو .
هي : هههه واييه بالحق مزيانة ، نااااري زينب شوفي شوفي على بوكوس .
انا : فين فين ؟
هي : هاداك مول الجاكيطة الكحلة .
انا : هههه فكرني غا بواحد البنت تنعرفها .
هي : شكون هادي .
انا : واحد البرهوشة كتلبس غا السراول و تدير الكاسكيطات فحال شي عزري خاصها غا الموسطاش .
هي : اوا صافي حتا نتي ملقيتي معامن تصاحبي .
انا : اصحبتي تبنتي شوية لبسي حتا نتي فحال البنات و حيدي عليك هاد الكاسكيطة خلينا نخضرو عويناتنا فيك .
هي : زينب غتفرقي مني ولا ميعجبك حال .
انا : اودي اللي فجهدك ديريه .
هي : واخا نتي اللي قلبتي عليها .
و شدات يديها ملصقين حطاتهم على وجهي و انا نغوت ، هي هربات و انا تابعاها و تنضحكو ، مسخوطة عندها واحد الجرية متشديهاش ، محبسات حتا حلفاتني منقيسها ، دوزنا النهار مفروح و تفارقنا رجعت للدار دوشت و نعست .
الغد عندي القراية ، فقت كالعادة بكري لبست و فطرت و وصلني السعيد قريت و رجعت ، و فالغدا قررت نقول لبابا يحولني من المدرسة .
انا : بابا بغيت نهضر معاك .
هو : آيه ابنتي قولي انا تنسمع .
انا : بغيت نتحول من المدرسة .
هو : وعلاش ؟
انا : مبقاتش عاجباني و صافي .
هو : صافي دابا ندوز عندهم و نقوليهم راك غتحولي .
انا : فين غتديني ؟
هو : شوفي شي إيكول بريفي تعجبك انا ندوز نشوفها و لاكانت مزيانة تمشي ليها .
انا : و شكون قاليك انا باغا نقرا فالبريفي .
هو : علا فين باغا تمشي ؟
انا : بغيت نتحول للكوليج اللي تتقرا فيه مروة .
هو : لا .
انا : و علاش ؟
هو : انا اللي عارف المشاكل اللي تيكونو تما تيدخل ليها اللي والا و القراية ماشي حتال لهيه تما و بعيدة مازال .
انا : البعد را كاين سعيد يوصلني و لاكانت على القراية را حتا تما الناس تيقراو على دوك العلماء الكبار و الشعراء قراو فالبريفي را كتلقاه حفظ القرآن فالجامع فاش كان صغير و دخل يقرا منو من الناس و فاللخر ولا شي حاجة .
هو : صافي قلت ليك لا هي لا .
انا معجبنيش الحال ، طلعت لبيتي جمعت ادواتي و خرجت فحالي ، فالعشية رجعت بدلت حوايجي و طلعت للسطح ، فالسطح كاينين واحد الدروج ديال الحديد مدورين تيطلعو للسطيحة ،كان هداك هو مكاني المفضل ، جلست تما و بقيت تنشوف فالشمس تتغرب و السما فيها تدرجات اللون الاحمر و الوردي، واشعة شمس الغروب تتخترق الغيوم فمنظر رائع ، كانت هديك هي الحاجة الوحيدة اللي متنملش نشوفها كل مرة ، معرفتش علاش بابا متيخلينيش نتاخد قراراتي بوحدي ، حتا انا باغا نكون مستقلة ،نتاخذ حتا انا قرار و نتحمل العواقب ،حتال امتا غيبقا حاسبني بنت صغيرة ، بصح انا فهاد المدرسة متنحسش براسي مرتاحة ، كاينين تما غير ولاد فلان و فلان تيعرفو غير اللباس و الفوحان و الفلوس ، معنديش صحاب ديال بصح تما ، و تنكون مضطرة نكون فحالهم باش منكونش مقصية ، انا الرئيسة ديال القسم ،و الرئيس تما خاصو يكون متسلط ، و انا ماشي من داك النوع ، رفضت ولكن مقبلوش القانون ديال المدرسة تيقول ان اللي جايب اول نقطة فالقسم خاصو يكون رئيس، كون ماشي بابا كون منقراش فمرا ، ولكن بابا تيفرح فاش تنجيبو معدلات مزيانة و تنقراو مزيان ، كنت نتمنا نكسر هاد الهاجس الخاوي اللي عندو و لكن مقدرتش ، عيني غرغرو و حسيت بالظلم و الوحدة ، كون كان نوفل كون حس بيا ، حتا انس كان حنين عليا ، بقيت شحال تنلومو حيت خلاني ومشا ، مفكرش انه عندو خوتو محتاجبن ليه و اب غيبقا ديما مشطون عليه ، تصرف بانانية باش يريح راسو ، تنسمع خالتي كنزة تتعيط عليا ، هبطت من السطح و مشيت عندها ، قالتلي باللي هي فاهماني و غتحاول تقنع بابا حتا هو خليني نبدل المدرسة ، بستها و مشيت دوشت و نعست .
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
