طفولة ضائعة

الجزء 19

واحد النهار كنت مكونيكطيا حتا بان ليا واحد البخوفيل فاقتراحات الصداقة ، و مصدقتش عيني فاش شفت التصويرة ،كانت التصويرة لنفس الولد اللي فيها ايمان اللي كذبات على خويا نوفل ،كان كبر من الشخص فالصورة بزاف و لكن متأكدة انه نفس الشخص، دغيا فتحتو و سيفت ليه انفيتاسيون و بقيت العشية كاملة تنتسنات يقبل ، حتال الليل فاش فتحت لقيتو فاتح و اون لين ، سيفط ليا سلام و بدينا تنهضرو ، سيفطات ليا مروة ميساج و كانت هاديك اول مرة مغنجاوبهاش ، درت اوغ لين و كملت معاه ، سيفطت ليه تصويرة اخرى و كذبت عليه فكلشي الا الاسم و العمر ، شحال و حنا تنهضرو ، هو كبر مني بعامين ، سولتو على خوتو قاليا عندي اخت وحدة صغر مني ، من بعد مشا ينعس و انا حلف النعاس فالليلا جاني من كثرة التفكير ، فاللخر قلت غنبقا نهضر معاه حتا نعرف فيو هيا ديك ختنا و نسد عليه معندو منين يجبدني .
من بعد شهر ديال السفر و الدوران من هنا لهيه جا نهار انرجع فيه جمعت حوايجي ، رجعنا للدار ، نعست مزيان مع العيا و فالغد جات عندي مروة و كانت مقلقة مني حيت مجاوبتهاش هادي شحال ،شحال و انا نقوليها را غير العيا و مكنتش تنسالي عاد باش قتانعات ، انا ممعاودة ليها والو على الموضوع ديال نوفل ،كنت قايلة ليها غير كان عندي خويا كبر مني و مات فكسيدة و صافي، بدينا القراية و طلعنا لليسي و انا باقة تنهضر مع خو هاديك ، هو سميتو علي ،وشحال من مرة تيشك فكلامي حيت تنكون قلت ليه شي حاجة و تنسى حتا تنقول ليه حاجة اخرى ،ولكن مركزة على قرايتي ، و انا و مروة فحال ديما مرة نضحكو مرة نقراو و ديما تنخرجو و مراد خوها مفروح فحالها ولا تيجي جوج مرات فالاسبوع ديما مفوج علينا ، و سعد حتا هو جا معانا د هاداك اللي عمتو تتصايب حلوة بنينة لعقلتو عليه ، المهم هو تيعرف مروة من هادي شحال و قرا معانا فالتاسعة و حتا دابا هاوا معانا ،كان فشي شكل داك الدري البنات تيحماقو عليه ، ناهيك على انه بوقوص كانت عندو واحد الشخصية واعرة و تيعرف يتعامل ، هو ذكي بزاف ولكن متيبغيش يقرا تيتفلا ، هو مدخل لاول ابتدائي حتال دار سبع سنين و ساقط عام ،ولينا حنا الثلاتي المشهور : سعد و مروة و زينب ، و ولينا تنخدمو مجموعين ،تنقراو مجموعين، تنخرجو مجموعين و كلشي ، و تصاحب هو و مراد ولينا تنخرجو بربعة بينا ، و دوزنا الفروض جبنا مزيان و سالا الاسدس الاول و شدينا العطلة ، مروة سافرات لعند جداتها فآسفي شحال مشافتها و سعد مشا لسلا فين خدام باباه ، وانا بقيت مبين 4 حيوطة ، قررت ندير شي حاجة جديدة ، الغد مشيت لعند الكوافورة قطعت شعري اللي كان طويل حتال ظهري ، ولا تيوصل غير لكتافي ، بدلني بزاف ، عجبني شعري هاكا نيت كان معدبني فالمشيط و فالغسيل وولا تيطيح المهم البنات اللي شعرهم طويل غيفهموني ، كان تيجيب غير التحنزيز بنادم متيقول حتا تبارك الله ،رجعت للدار واول واحد شافني هي غيثة ، تصدمات و شحال و هي تخاصم عليا ، طلعت لبيتي دوشت و بدلت ، صايبت شعري و جاني واعر مكنتش متوقعة يعجبني حتال هاد الدرجة ، حليت الفيس لقيت علي مسيفطلي ميساج جاوبتو و سديت ، لقيت راسي ممستافدة من الهضرة معاه حتا حاجة من دكشي اللي بغيت، ايه هو عندو بزاف ميتقال و الهضرة معاه زوينة و تنتفاهمو و لكن انا مباغاش اللي ندوز معاه الوقت باغا اللي نوصل بيه لديك البنت ، و هو ولا تيشك فهضرتي بزاف ، عاقلة نهار سولتو كيف تنجيك كان قاليا ، نتي قلبك زوين بزاف و عقليتك واعرة و شخصيتك مدايراش متيهمنيش تكوني زوينة ولا لا حيت متأكد ان جمالك الداخلي تينعكس حتا على وجهك دكشي باش نتي زوينة ،شحال من مرة بغا نتلاقاو ولكن مبغيتش حيت غي ايشوفني ايعرفني كذبت عليه و اول حاجة هي التصويرة ديال البنت اللي كنت سيفط ليه فاللول لا علاقة بيا ، بقينا هاكا حتا نهار قاليا يا نتلاقاو يا منبقاوش نهضرو، قلتليه منهضروش و دكشي اللي كان ، داز النهار اللول الثاني صافي مقدرتش و فتحت قلتليه نتلاقاو غدا ، و دكشي اللي كان ، لبست و قاديت و خرجت ، هو تيسكن فالرباط و جا حتال هنا على قبلي ، مشيت حدا لاكار بقيت تنبركك حتا بان ليا خارج ، كان حسن من التصاور ، و باينة فين واثق من راسو بزاف ، بقا غادي و انا تابعاه ، كنا دايرين نتلاقاو فواحد القهوة ، مشا ليها ، دخل دور وجهو هنا و لهيه مبنتش ليه ومشا جلس ، انا مشيت جلست فطبلة اخرى مقابلة معاه ، تيبان هادئ ، كان زوين ، طويل و عندو لحيو خفيفة وداير نضاضر كحلين ،دوموندا قهوة كحلة وانا خديت عصير ،شوية جبد كتاب وجلس تيقراه ،انا فديك اللحظة عجبني بزاف تيعجلني الشخص اللي تيعطي اهمية للوقت و تيستغلو فحاجة تنفعو، تشجعت و مشيت وقفت عليه .