طفولة ضائعة

الجزء 29

مراد : نارييي الغولة عاقت بينا علقي
ماجا فين يكمل هضرتو حتا ضربها بواحد الزلقة فاعلة تاركة
مروة : هاهاهاهاهاهاها غا ذنوبي هادوك هاوما خرجو فيك
مراد : آح والله حتا تقسحت بزاف
مروة : تستاهل، ماماتي بابا صباح الخير
خالتي و عمي : صباح النور ابنتي
مروة : زنوبتي اش فيقك فهاد الصباح
خالتي : جلسوا تفطرو و هضرو على خاطركم
انا : واخا خالتي، فكرت بما انه باقي شهر تقريبا و تسالي العطلة علاش منديروش شي حاجة مفيدة، نمشيو لدار العجزة مثلا ولا ميتم، حيت ماشي كل الناس محظوظين فحالنا عندهم عائلاتهم و متمتعين بالحق الأسري، علاش منمشيوش نزوروهم نجلسو معاهم، هوما ماكاين اللي يسمع ليهم ولا يهضر معاهم، نديرو خير و نديو الأجر و الحسنات شنو بان ليك؟
مروة : فكرة زوينة
عمي :حتا انا متافق معاكم و كلامك كلو معقول
خالتي : حتا انا نفس الشيء
مراد : و انا معاكم فجميع القرارات فحال ديما
انا : صافي اتفقنا
سالينا فطورنا و بدينا تنخططو، اتفقنا نمشيو لدار العجزة، هضرنا مع شي دراري و بنات تنعرفوهوم و حتا هوما بغاو يمشيو، وجدنا كلشي و نعسنا بكري، الغد مع 9 كان كلشي مجموع كلشي واجد، كنا شي 15 واحد، جمعنا مبلغ كبير ديال الفلوس و كاين اللي شرا بطانيات كل واحد شنو دار، مشينا لدار العجزة و استقبلونا، اتبرعنا بالفلوس و جلسنا معاهم هضرنا ضحكنا كلينا و تتفرح فاش تتحس انك قدرتي دخل الفرحة فقلب انسان حزين،كاينين أمهات تخلاو عليهم ولادهم بعدما كبروهم و قراوهم و تعذبو على قبلهم و فالاخير لاحوهم و نكرو الخير ديالهم،كاينين اللي بقاو بوحدهم فهاد الدنيا لا حنين لا رحيم و جابوهوم لتما، كاينة واحد المرأة القصة ديالها اترات فيا بزاف، كانت زوينة بزاف و من عائلة ميسورة، تزوجات و هي صغيرة بواحد حتا هو عندو الفلوس و كبر منها بربعة و عشرين عام و واخا هاكاك كان حنين عليها و كلشي، ماتو واليديها فالفيضانات و خوتها كل واحد فين مشا مبقاتش عرفاتهم فين هوما، دازت مدة ولدات 3 ديال البنات و 2 ولاد، من بعد مدة راجلها مات و عائلتو نكروها هي وولادها فالورث، دوزات الفقر و الجوع و بنتها الصغيرة ماتت بالبرد و الولد الكبير خرج الطريق و بعد مدة تشد فالحبس حيت قتل واحد و بقات هي تتخدم عليهم حتا كبراتهم و تزوجو كاملين و سمحو فيها للأسف، طاح الظلام و ودعناهم و شحال سمعنا دعاوي ديال الخير، كانت هاديك أول زيارة ولكن ماشي الأخيرة، داز شهر بالزربة و طلعنا للسيزيام، انا و مروة و سعد دفنعا إقتصاد و تجمعنا فقسم واحد فعمري دابا 16 عام، مروة كبر مني بشهر، سعد عندو 18 ،بدات القراية، القسم اللي جينا فيه زوين، لا من ناحية التلاميذ ولا من ناحية الأساتذة، تسجلنا فسونطر ديال اللغات فالرباط و كنا تنمشيو كل سبت، وليت كل اسبوع تنتلاقا بعلي فالرباط ،تنجلسو فشي بلاصة نهضرو ،تنمشي عندو للدار نتلاقا بماماه و جدة ،علاقتنا ولات متينة،ولينا قراب بزاف ،عاودت ليه على حياتي و على ما طرا ليا فطفولتي ،تأثر بزاف، واعدني ديما يكون ليا نعم الصديق و الأخ، واخا معجباتنيش بزاف ديك اخ ولكن فرحت لكونو قريب ليا هاكا ،كنا حنا 7 اللي تنمشيو للسونطر ،انا و مروة و سعد و ياسمين و عائشة و زهير و مهدي، كنا تنخرجو مع 12 و تنشدو القطار مع 12 و نص تنمشيو نقراو و تنخرجو ندورو و تنشدو التران ديال 8 تنرجعو حتال الليل، كنا ديما تنديو معانا الالات ديالنا ،انا و سعد و زهير الجيتار و مروة و ياسمين الكمان و عائشة و مهدي تيغنيو معانا ،فاش تيتعطل التران تنجلسو نغنيو فالمحطة و الناس تيتفرجو فينا، كانو من أسعد أيام حياتي، ذكريات متتنساش، نتمنا غير دقيقة فداك الوقت ندوزها معاهم دابا و ملقيتهاش، نتمنى نرجعو كيف كنا، كيفاش كنا تنخلقو السعادة من لا شيء، ولكن فكلشي خير، كنا تنتلاقاو فقما تكون فرصة، ندوزو الوقت مع بعض .
مروة : عرفتي انت أكثر شخص عندي معاه ذكريات
انا : حتا نتي
مروة : عرفتي شحال دوزنا من حاجة مع بعض، مكاينش شي حاجة مدرناهاش ،ولكن أفضل الأيام هي اللي دوزنا فالصيف، البحر و العومان، فاش مشا معانا سعد و علي، و فاش لعبنا حكيم فالبحر
انا : هههه عقلتي فاش حكمتو عليا نمشي عند داك الولد نقوليه عجبتيني قدام صحبتو هههههه
مروة : هههه آه كون خليناها عليك كانت غتنتفك تما
انا : و عقلتي نهار مشينا لعرس صحبتك
مروة : ههههه لا هاديك مكتنساش فاش جراتني العروسة قالت ليا غتقولي لصحبتك تمشي ولا نوريك
انا : اويييلي حتا هي مزوجا شماتة واش الراجل نهار عرسو و حال فيا فمو
مروة : ايوا الله يهدي ما خلق
انا : اووف تنبغيك ألويلة
مروة : ليزبيان لخرى
انا : ويلي سكتي غيسمعونا
مروة : هههه باز لوجهك ،اه فراسك بابا و ماما بقات ليهم يومين و يمشيو
انا : للحج؟
مروة : اه و ناخد الحرية المطلقة يا سلاااام
انا : حتا انا فرحانة بزاف