طفولة ضائعة

الجزء 49

دخلنا ليه اش غادي نقول ليكم، شي حاجة مكتوصفش، ريسطو كلاص، أضواء هادئة و موسيقى خفيفة و الشمع، طلعنا للطابق الفوقاني و خدينا طبلة، كنا فجناح غير بوحدنا، جا الجرسون طلبنا دكشي اللي بغينا و بقينا تنتسناوه
علي : عيد ميلاد سعيد مرة أخرى
انا : شكرا
علي : عرفتي فاش تتحشمي كيف تتولي
انا : نتوما اللي حشمتوني بزاف و الله
علي : عرفتي نعطيك واحد المعلومة
انا : وي
علي : انا هو الرجل الأكثر حظا في العالم
أنا : اممم علاش يا ترى؟
علي : واش اللي عطاه ربي شي وحدة فحالك عاد باقي يطلب شي حاجة اخرى
انا : هههه عارفة عارفة
علي : ههه شريرة
جاب لينا الماكلة، كلينا مابين الضحك و الهضرة، فاش سالينا علي تقاد فالجلسة و بان ليا ايقول شي حاجة ديال المعقول
علي : دابا عاد انقوليك علاش جينا لهنا بالضبط
انا : واخا قول
علي : انا هادي مدة و انا تنعرفك، معمرني شفت منك شي حاجة ديال العيب، أخلاقك و تصرفاتك شخصيتك و ضحكتك عقليتك و الحماق ديالك فاش تضحكي فاش تتقلقي فجميع حالاتك انا تنحماق عليك تنتسطا عليك تنموت فيك، منقدرش نتصور شي نهار يدوز بلا بيك، شي نهار نتفرق عليك، منقدرش نتخيلك مع شي راجل آخر، بغيت نتوجو حبنا، واش تقبلي تكوني معايا حتال آخر نهار فعمري؟ تقبلي تكوني معايا فكل صباح و كل عشية؟
أنا فديك اللحظة بقيت غير تنشوف، هو تيهضر و انا تنشوف، مع كل كلمة تقولها قلبي تيضرب ليها، جبد بواطة من جيبو و حلها، تيبان ليا الخاتم تيلمع، الضحكة ديالي توسعات ، و هضر قلبي : اه قابلة ،قابلة احياتي، قابلة نعطيك عمري كلو، وقف و جا لعندي عنقني و دموع الفرحة فعينيه ، غرقنا فقبلة طويلة ،ركب ليا الخاتم و قلبي طاير بالفرحة، فرحة مكتوصفش، رجعني للدار لقيت مروة نعسات، الليل كلو مدانيش النعاس، الغد غير فقت عاودت لمروة كلشي .
مروة : الصراحة مكنتش متوقعة هدشي كامل صدق معاك راجل ديال بصح
انا : وا عرفتي كون كانو عندي الجناوح كون طرت من الفرحة
مروة : فرحت ليك اختي بزاف
نهار السبت هبطنا لمكناس، لقيت عرام ديال الكادويات من صحاباتي و العائلة و خواتاتي و بابا و ماما، عاودت لبابا كلشي اللي طرا و فرح ليا بزاااف، و ندى كل مرة تتقوليا تزوجو دغيا بغيت نشطح هههه، دوزت دوك اليومين معاهم و رجعنا دوزنا امتحانات نصف الدورة و شدينا العطلة، جات جدة و جدي اللي فتركيا بقاو معانا العطلة كلها، مرة تتبات معايا مروة مرة انا معاها، سعد تبدل عليا فالآونة الأخيرة معرفتش مالو، سالات العطلة و رجعنا نقراو، دوزت البيرمي انا و مروة و شرا ليا بابا ميرسيديس فالرمادي ارتاحينا من الترومواي و الطريق الطويلة، و حققت 2 من امنياتي، دازو الأيام دغيا و دوزنا امتحانات نهاية العام و تهنينا أخيرا جا رمضان فالأول ديال العطلة يعني كان خصنا حتا يسالي عاد نقدرو نسافرو، انا مكنتش تنصوم ديما على حساب الدوا متيخصنيش نفوتو صمت غير النص فيه، كنت أغلب الأحيان تنفطر مع مروة فدارهم تنعاونو خالتي مليكة فتوجاد الفطور و الليل تنخرجو يوميا و تنبقاو سهرانين الليل و الغد تنصبحو ناعسين هههه ،فات رمضان و بدينا تنجمعو الحوايج باش نحقق أمنية أخرى، نزور أكثر من 5 دول، و هاد المرة ممشيناش فالطيارة ككل مرة لا مشينا فالباطو الباخرة زعما هههه، الرحلة مكانتش طويلة 14 كلم ماشي شي حاجة، تلاقتنا ختي فالميناء توحشتها بزاف، و مشينا لمدريد فين ساكنة، وصلنا وراتني فين ساكنة دارها زوينة بزاف و عندها جردة واسعة، علي و سعد قالو بغاو يمشيو لأوطيل ولكن مخلاتهمش، دوزنا تما شي 10 أيام و واخا مسخاتش بينا ولكن مشينا شدينا الطريق لفرنسا، وصلنا مشينا لأوطيل و ارتاحينا شوية و فالليل خرجنا نشوفو مدينة الأنوار، مكذبوش فاش قالو أكثر مدينة رومانسية فالعالم، تعشينا مجموعين فواحد المطعم و رجعنا باش نعسو بكري، الغد مشينا لبرج إيفل تصورنا حداه أكيد شبعنا سيلفيات و مشينا لبزاف ديال البلايص تلاقينا بمغاربة تما و درنا صداقات مع الگور ،دوزنا خمس أيام فباريس ،و مشينا لألمانيا و إيطاليا و بالضبط ميلانو و مشينا للبندقية بقينا فيهم شي 2 أسابيع تقريبا، و مشينا للجزائر بقينا شي أسبوع و رجعنا، نقدر نقول كانت هاديك هي أفضل عطلة ندوزها فحياتي ،رجعنا موحشين عائلاتنا و صحابنا و بلادنا عموما، بقينا شي يامات رتاحينا فيهم و رجعنا للرباط حيت القراية غتبدا، عندنا العام التاني فال BTS و هو العام اللخر خصنا نجمعو راسنا، دخلنا مجهدين من البدية تنخدمو مزيان و منضمين وقتنا، النهار تنقراو و من 6 و نص ل 8 عندنا السونطر و الجمعة فالعشية عندي المعهد و الاثنين و الأربعاء و السبت تنمشي انا و مروة و علي للاصال و الأحد تنهبطو لمكناس ،سعد تبدل عليا بزاف، البلاصة اللي نكون فيها تيحاول يخويها، تنهضر معاه تيجاوبني ببرود، تنحاول نعرف شنو اللي يخليه يولي هاكدا و لكن موصل لحتا نتيجة .