طفولة ضائعة

الجزء 24

طلعت لبيتي لقيت ستة ديال ليزابيل جوج من مروة و ثلاثة من سعد و وحدة من علي، عيطت على سعد هو اللول حيت مروة كتشدني بالهضرة.
انا : الو سعد لاباس.
سعد : لاباس الحمد لله و نتي صافا؟
أنا : وي الحمد لله كلشي مزيان، كنت خليت التلفون فالبيت مسمعتوش.
سعد : اوكي ماشي مشكل .
سعد : (الصمت)
انا : مالك سكتي؟
سعد : تنتسناك تقولي ليا عيد ميلاد سعيد .
انا : آآآآه ويلي سمح ليا والله حتى نسيت غدا عيد ميلادك ياك، تفو عليا ،joyeux anniversaire عقبال 100 عام انشاء الله.
سعد : ندوزوها انا و ياك.
انا : إلا طوال العمر علاش لا.
سعد : اوا راكم غدا معروضين نتي و مروة مع 9 عنداك متجيش
انا : خويا سعد انت عارفني معنديش مع الجو ديال الحفلات و دكشي.
سعد : مسوقيش ضبري راسك و متنسايش الكادو.
انا : ولكن........ياه شوف قطع ولد الحرام اوووف وا وحلة هادي دابا، التيليفون تيصوني.
انا : آلو .
مروة : واش منقدرش شي نهار نصوني عليك و تجاوبي فالبلاصة ضروري تشحفيني عاد تجاوبي؟
أنا : را مسمعتوش اصحبتي.
مروة : اوكي معليش، غدا عيد ميلاد سعد.
انا : وي عاد قالها ليا دابا كنا هاضرين.
مروة : غتمشي بعدا، متقوليش لا ها العار والله حتا ندوزوها.
انا : اصلا هو مخلا ليا فين نزيد .
مروة : عبر عليك حتا نتي هدشي اللي يصلاح ليك، قوليلي شنو غتلبسي.
انا : وا والله منعرف باقا عاد تنفكر، شوفي غدا غدي دوزي عندي بكري نمشيو نشريو شي حوايج و نشريو ليه حتا الكادو.
مروة : صافي مشات، غدا لفقتي قبل مني فيقيني و انا كذلك.
انا : اوكي نكملو ميساجات
مروة : تلاحي.
انا : باي
هضرنا شوية و جاوبت على شي ميساجات و نعست حيت غدا انشاء الله ايكون عامر.
ليوم نهار جديد، فقت على صوت شي واحد تيفيقني ،انا باقي فيا النعاس لبارح سهرت حتال الجوج، اصلا الصيف هادا و التيليفون تيشد بنادم تتبقا من حاجة لحاجة حتا تيفوتك الحال ،أوف شكون طالق الموسيقى مجهدة حدا ودني، جريت الوسادة على راسي ،شوية تنسمع التقرقيب و شي واحد تيزدح المجورة، وا نهار باين غير من صباحو، هاديك اللي غنحيد الوسادة باش نشوف شكون تنلقا مروة هازة التصويرة ديال نوفل و المذكرة اللي كنت تنكتب فيها فاش كنت فالرباط.
مروة : ياه شكون هاد البوكوس اللي فالتصويرة.
انا : ماشي سوقك معامن تشاورتي تقلبيلي مجوراتي اصلا.
مروة : هاااء مالكي تقلقتي اصلا عادي ياك حتا نتي كتبقشيلي مجوراتي كاملين و متنقوليك والو.
انا : آري هادوك لهنا.
مروة : هاكي.
عطاتهملي و خرجات باينة معجبهاش الحال حيت غوت عليها و لكن انا مقصدتش، كانت هاديك ردة فعل لا إرادية صدرات مني فلحظة غضب، شفت فالصورة، كانت يدي كتبان مشابكة مع يدو و لكن انا مكنتش فالصورة، تنتفكر داك النهار تنضحك لا اراديا، كنا داك النهار تخاصمنا و بابا دار لينا عقوبة نبقاو مقابطين حتا نتصالحو، بقينا هاكاك تلت أيام تنعسو حدا بعض و تناكلو فطبسيل واحد و حنا مخاصمين، حتا طلب مني السماحة عاد تصالحنا واخا انا اللي كنت جبدتو اللولة ،اووف صافي ازينب نتي قوية مخصكش تبكي ،خديت نفس عميق و طليت فالمراية بالزربة و مشيت غسلت وجهي و بدلت حوايجي و هبطت تنقلب على مروة حتى تنسمع صوتها جاي من الكوزينة، طليت تنلقاها جالسة فوق الكرسي و تتلعب بالليمون اللي فالسلة، وجهها محطوط على يديها و تتسوط غا بوحدها .
انا : مممم دايرة فيها غضبانة زعمة.
مروة : صافي بعدي مني بالناقص منك جينا نديرو خير صدقتي مندمانا.
انا : وا صافي مطرا والو ديري فحالا ماماك اللي غوتات عليك و نسايها.
مروة : صافي بعدي مني.
انا : شفتك غادا و كضسري الالة متسمحيش ليا بالما و الشطابة حتال قاع البحر.
مروة : ههه والله يلعنك مكتحشميش، نوضي نوضي فطري دغيا و زيدي نخرجو نتقداو دكشي اللي خاصنا.
انا : اوكي، طاطا حياة كاين شي فطور؟
خالتي حياة : هاوا ابنيتي شنو تشربي القهوة ولا الحليب ولا شنو؟
أنا : ممم عطيني الحليب دافي و الحلوة اللي صايبتي البارح جات واعرة.
خالتي حياة : هاكي ابنيتي.
فطرنا و حنا تنتعاودو و لبست حوايجي و مشينا تقدينا دكشي اللي خاص و رجعنا، فالعشية دوشنا و صايبنا شعرنا انا صايبتو سامبل و مروة جمعاتو فالنص و اللور خلاتو مطلوق ،درنا ماكياج خفيف و انا لبست كسوة فالشيبي بارد سامبل فايتة الركبة بلا كمام و فيها سميطة فضية و سنسلة و صباط فضيين و صاك بيض و مروة لبسات كسوة بيضة طويلة و جاكيت كحلة و شي اكسسوارات فضيين حتا هي.