نعست ديك الليلة و تقول ما نعست حلف النعاس لاجاني من كثرة التفكير، فالصباح فيقاتني جدة نوض نفطر و دكشي اللي كان، فطرنا مجموعين و بغا علي يخرجني نضرب معاه دويرة عاد نمشي ساعا مبغيتش قلت ليه حتال مرة اخرى،سلمت على ماماه و جدة و وصلني علي للمحطة و تسنا حتى تحرك التران عاد مشا ،تنحس براسي مخربق و الشقيقة ضاراني، حاولت نعس ولكن مقدرتش، درت ليزيات فودني و غمضت عيني حتا تنسمع 《محطة مكناس الامير》 هزيت صاكي و نزلت ،جاتني الدوخة و ولات تتبان ليا غير الضبابة ،خديت طاكسي وصلني حتال الدار، دخلت مشيت نيشان لبيتي و نعست بحوايجي حتا من الصباط محيدتوش، حليت عيني تتبان ليا 8 فالماكانة، آو من الظهر و انا ناعسة ،لقيت راسي مغطية و لابسة البيجامة ديالي ،هادو غير فعايل بابا ، سمعت الدقان، حلات فدوة الباب هازة فيديها بلاطو فيه الماكلة ، حطاتو و انا مشيت غسلت وجهي و جمعت شعري و جلست ناكل، تيليفوني تيصوني.
انا : آلو
مروة : زينب كوصلتي لاباس ؟
أنا : اه الحمد لله
مروة : مال صوتك واش مريضة ؟
أنا : لا غا راسي تيضرني امكن بالشمس ولا بقلة النعاس
مروة : ياك ماشي شي حاجة اخرى بعدا
انا : لا لا غا فحال ديما راك عارفاني الشمس تدوخني
مروة : وي وي عارفة أزين،شوفي انا غدا ندوز عندك نشوفك اوكي ، و ها مراد و ماما تيسلمو عليك .
انا : صافي نتسناك تلاحي
مروة : باااي
ساليت الماكلة و هزيت البلاطو مهبطاه للكوزينة، انا هابطة فالدروج و ندى طالعة تتجري تزادحنا و طاحو المعان و تسمعات "طرااااخ"
انا : ندى ختي واش تقسحتي؟
ندى : لا صافي ماشي بزاف ،سمحيليا كنت مزروبة مشفتكش.
انا : ماشي مشكل ، آري بعدا يديك نوضي من الأرض .
بابا : شنو هاد الصداع هادا شنو تهرس.
انا : والو غا طيحت البلاطو كانو فيه لماعن.
بابا : ياك متجرحتيش بعدا آري يدك نشوف
انا : لا لا غير تهنا .
بابا : شفتك جيتي عيانة قبيلة مبغيتش نصدعك قلت بلا منفيقك .
انا : اه الطريق طويلة و عييت.
بابا : و دابا كبقيتي؟
أنا : عادي مزيان.
بابا : مالكي مقلقة؟
أنا : لا ممقلقا ما والو علاش مالي؟
بابا : اسيري انا اللي عارفك مغدوزيهاش بيا آجي عاوديلي.
قبط لي فيدي و هبطني للجردة، جلس فوق الكرسي و تقابل معايا.
بابا : يالاه عاودي لي أنا تنسمعك.
اوووف شنو غندير دابا، منقدرش نقوليه اللي كاين و متنبغيش نخبي عليه شي حاجة، نضت من الكرسي و تحنيت حطيت راسي فوق رجليه و عنقت ليه يديه، شفت فيه و هو تبسم ليا.
انا : بابا واخا تضفر ليا شعري.
بابا : ههه واش نتي خليتي شي شعر اللي يتضفر، آري ندير ليك كرينات.
انا : صافي بدلت رأيي انا اللي انلعب ليك فشعرك.
جلسني فوق ركابيه و انا بديت تنلعب ليه فشعرو مرة ندير ليه الكصة مرة نقبطو ليه بالمقيبطات و هو دايني على قد عقلي و مرة مرة نسرق منو بوسة، حتى جات ندى تتجري و تتغوت.
ندى : حبسي حبسي هداي.
انا : مالكي شنو واقع؟
ندى : باراكا من البوسان بغيتي تسالي ليا بابا.
انا : ويتك ويتك على المغيارة، هانا ألالة خليتو ليك ،نيت انا خصني نطلع لبيتي عندي ميدار.
بابا : و فاش نعيطو ليك آجي تعشاي.
انا : اوكي.
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
