طفولة ضائعة

الجزء 30

مروة : وييي نوضي نقزو بجوج
انا : هاهاها أوف صافي حبسي عييت
مروة : مفراسكش راكي كتعياي دغيا و ماشي غير دابا را من هادي شحال
انا : ايوا هانتي قلتيها بلسانك ماشي غير دابا يعني الأمر عادي جدا
مروة : لا ماعاديش المهم ضبري راسك غير نهار تطرا ليك شي حاجة ذنوبك على راسك
انا : فال الله ولا فالك
سافروا واليدين مروة و لقينا الحرية التامة نخرجو فقما بغينا و نديرو مبغينا شحال سافرنا و مشينا للقصارة، مشينا للحفلات للعراسات لكلشي ولكن القراية اللي عمرنا نفرطو فيها تنقراو مزيان و تنحفضو و تنتبعو فالقسم، فالحفلات اللي مشينا ليهم تيكون الشراب و الگارو و الشطيح و كلشي، مكانتش هاديك أول مرة ندوق فيها الشراب حيت حتا حنا فالدار عندنا، ولكن معمرني شربت حتا سكرت، ولكن فداك الشهر شربت حتا نسيت راسي، و كميت و تما فين تبليت، بابا حتا هوا كان سافر على قبل شي خدمة، فامكاين اللي يهضر معايا ،مروة مكانتش فحالي، كانت تتشرب و تقيس ،مراد كان راخف ليها الحزام حيت تيتيق فينا، و سعد تيكون معانا فأغلب المرات ، علي حس بالتغير اللي وقع ليا، شحال من مرة هضر معايا و نصحني ولكن انا اللي فراسي متبدلش، دازت 15 يوم دوزنا فيها العجب، واحد النهار كنا لاعبين السبور، لاعبين الباسكيت و انا تيحمقني ، تنجري و لاعبة مزيان حتال واحد الوقت جيت نرمي الكرة فالسلة و يدي فحالا تشلات، تنحس بالدوخة و تتبانلي غير الضبابة، آخر حاجة سمعتها كان الصوت ديال مروة معقلتش حتا شنو قالت .
حليت عيني كانت الرؤية ماواضحاش فمرة ،متتبانلي حتا حاجة، تنسمع الهضرة بزاف، واحد الصوت غالب على الأصوات الأخرى، كان باين باللي را الطبيب اللي تيهضر .
الطبيب :منقدروش نعرفو السبب باش سخفات، يقدر يكون غير الطونسيو، يقدر يكون الإرهاق و تقدر تكون شي حاجة أخرى و لكن حنا ضروري نتأكدو، هايا تفيق و نشوفها كيف بقات عاد نقدر نقوليك شنو نقدرو نديرو.
مروة : واخا شكرا
انا : هاء على انا باقا مفقت راني فايقة و صحة و سلام غير يالاه نمشيو
الطبيب : على سلامتك ابنتي، سايني هايا الفرملية اتعطيك شي وراق تعمريهم و راني هضرت مع ختك و قلت ليها شنو ديري
انا : اه واخا صافي
ساليت السيروم و خرجنا انا و مروة
انا : كون غير عطاونا شوية ديال السيروم قاليك تيرطب الشعر
مروة : اه ونتي شعرك فحال الجيكس و خاصكي السيروم ،اسيري يا البهلة الناس فاش و نتي فاش ،سمعي قالي الطبيب را خصك طلعي للسويسي فالرباط ضروري ديري شي تحاليل و شي تخربيق
انا : اوووف حتا هوما شحال تيزيدو فيه، صافي غيكون غا طاحلي الطونسيو حيت الصباح مفطرتش، شتي نتي السباب كون عطيتيني ديك طوفيطة الصباح كون كاعما نطيح
مروة : اويلي واش الحلوة عام و هي فالجيب لقيتها بالصدفة و تبعيني عليها حتا هي
أنا: لاء ممسامحاليكش فيها لا دنيا لا آخرة
مروة : ويلي خلعتيني ،احمباك لاما سمحيليا
انا : صافي و آخر مرة تعاودي نصلبك
مروة : اتفقنا، هاتي كفك
انا : باقا عاقلة على هاد هاتي كفك، من يامات التاسعة فاش كنا تنتافقو على شي حاجة و تتصدق
مروة : ضروري شكون ينسا، يالاه هاني وصلتك حتال داركم شكون فحالك
انا : اللي يسمعك يقول جيتي هازاني على ضهرك، رانا جينا فالطاكسي و زايدون انا اللي خلصت
مروة : و انا خلصت آخر مرة
انا : بزعط يالاه تلاحي
مروة : تهلاي
دخلت للدار و مشيت نيشان لفراشي، تلاحيت و بقيت تنفكر، عارفة علاش طحت ليوم، و عارفة را مخصنيش نبقا هاكا، و عارفة را غيسيق بابا لخبار سوا ليوم سوا غدا، مي منقدرش نقولها لشي واحد، كرهت راسي ليوم ،أعدى حاجة عندي هي يشوف فيا شي واحد بشفقة، شي واحد يقول هاديك البنت مسكينة، احتمال ان شي واحد قال فحال هاكا ليوم تيخليني نتعصب بزاف، تنتفكر فاش كنت عايشة فالرباط، كان كلشي تيشوفني بنظرة شفقة، انا هي ديك البنت المسكينة اللي ماماها معديا عليها و عايشة الظلم و الفقر و الحگرة ،انا هي ديك الطفلة اللي تغتصبات فصغرها و عانات من هدشي لمدة و باقي لحد لآن ، انا اللي مسكينة كانو عندي جوج خوتي واحد مات و الآخر هرب، انا البنت المظلومة المسكينة اللي تعذبات و عانات، احتمال واحد يفكر فحال هاكا تيصيبني بالجنون، هدشي اللي خلاني منقول لحتا واحد راني مريضة باش منسمعش :مسكينة مريضة أو بقات فيا مسكينة، هدشي خلا عندي كبرياء تيفوق الحد، انا تنفكر فهدشي و انا تنزيد نتعصب، جبدت من صاكي گارو و شعلتو،بعد ما كميتو تهدنت شويا، عارفة هادا ماشي حل و لكن مقدرتش نتراجع صافي تبليت ،نظرة المجتمع للبنت اللي تتكمي انها منحرفة و بنت الزنقة و متتسواش، مهمنيش شنو يقول بنادم، هامني غير راسي دابا، صافي متسوقتش،ليوم مهضرت مع حتا واحد، لا علي لا سعد لا مروة، كل ليل على الأقل نبقا فالتيليفون شي جوج سوايع، تيليفوني ديما متيحبسش، ولكن دابا معندي خاطر لبنادم، سديت البالكون و مشيت نعس.