طفولة ضائعة

الجزء 10

الغد فقت دوشت و نشفت شعري و لبست كسوة زرقة بالسميطات عراض تحت الركبة و سندالة بلا فالبيض ،و ضفرت شعري فالجنب صراحة جيت زوينة شحال موقفت قدام المراية و عجبني راسي، حليت الباب و انا نلقى ندى حتى هي خارجة تبدلات بزاف ولات تهيا كتلبس و تقاد جابتليا الضحكة كانت كملات 8 سنين تقريبا بستها و هبطنا بجوجنا و مشينا للجردة لقينا بابا و مرتو تما سلمنا عليهم و فطرنا مجموعين حتى كسر بابا الصمت :
بابا : كصبحتي ابنتي.
انا : مزيان.
بابا : تقلقتي لبارح ؟
أنا : لا اصلا صافي غير نسا حياتك هديك منقدر نقوليك حتا حاجة .
بابا: زينب سمعيني ،حنا رانا اسرة و كل فرد فيها حياتو متعلقة بحياة الافراد لخرين ، و ماشي من حق حتا واحد يتصرف على هواه بلا ميراعي مسؤولياتو تجاهنا ،الزواج ديالي من كنزة كان بالموافقة ديالنا كاملين و انا متاكد غادي تفاهمو مع بعضكم .
انا : حتا انا هاكا فكرت .
بابا ناض عندي عنقني و باسني و انا استغليت الفرصة سولتو .
انا : بعدا مع الروينة نسيت مسولتك فيناهوما أنس و نوفل مشفتهمش فمرا؟
بابا: اممم اه خوتك أنس و نوفل راهم مشاو .
انا : فين مشاو ؟
بابا : را مشاو غير يكملو قرايتهم فالخاريج .
انا :و فوقاش ايجيو؟
بابا : ميقدرو يجيو حتال الصيف .
انا : اه واخا ، حقا فكرتيني خاصك تجيب ليا الانتقال من المدرسة .
بابا : واخا غدا نمشي نجيبو لبنتي غا عطيني سميتها.
انا :اوكي .
مبغيتش نعاود ليه على المرض ديالي نبقى مشوشاه ،كملنا خرجت معا خواتاتي حنا بربعة بينا و الحضية كثر من التقدية الله يحضر السلامة تسارينا شحال ضحكنا و فرحنا ، و دازو الأيام بنفس الروتين و جابليا بابا الانتقال و سجلني فمدرسة خاصة و كنت من الأوائل و دازت القراية و نجحت و كلشي كان فرحان و دوزنا الصيف معتبر مشينا لتركيا عند جدي و جداتي كانو ساكنين تما و دوزناها غير تبحار و دوران و فوجنا و خالتي كنزة كانت ضريفة معانا بزاف و كتعاملنا بحال بناتها .
سالات العطلة و بدات القراية و كملت 14 عام و طلعت للتاسعة وليت تنعيا بزاف كنت تنطلع فالدروج تنهج تنسد عليا و نجلس نتساراح، و لكن عادي مكنتش مهتمة بزاف ، اللي كان شاغل بالي هو خوتي مجاو لا فعطلة متيعيطو ما والو و فقما تنسولهم تيبدلو الموضوع و لا تيعطيوني أجوبة غير مقنعة (را غير متيساليوش،را معا القراية و البريباراسيون متيلقاوش الوقت....) وانا تندير معلاباليش خلي نوصلو الكذاب حتال باب الدار.
واحد النهار مبغاش يديني فيه النعاس فالليل و فقت معا 3 كنت هابطة نجلس فالجردة شوية و ديت معايا كتاب نقراه شوية وانا نسمع بابا تيهضر معا خالتي كنزة فالبيت، عارفة حرام نتجسس و لكن فاش سمعتو قال أنس و نوفل و تجمدت بلاصتي.
بابا : را بصح خصها تعرف و لكن را صعيب عليها كون تشوفي فاش مشيت فين لقيتها ساكنة ،خليها حتا تنسا شوية داك الشي اللي دوزات و نقولها ليها .
كنزة : خصك تقولها ليها فاقرب وقت ، البنت مسكينة تيسحاب ليها خوتها غادي يرجعو را كل نهار تتسول فيهم و باينة بدات تتشك ، واش عارف انها لعرفات من شي واحد اخر مغتبقاش تيق فيك .
بابا : واايه راني عارف تنتسنى غير الوقت ، و انشاء لله يكون خير .
انا معرفت مندير ،يعني بصح كاينة شي حاجة مخبعينها عليا ،بقات زوبعة ديال الافكار تدور لي فدماغي، هبطت جلست حدا لابيسين و حليت الكتاب و فبالي غير خوتي و قررت غدا نسول ندى هي اللي غتعاوني أما بابا فغير غنسولو غيبدا يكذب عوتاني عليا.