من بعد داز اسبوع ما بين المدرسة و معهد الرقص ،و المعهد الموسيقي ، كنت تنعزف على الكيتار من بعد ما كملت 8 سنين ديال البيانو ، كنت جالسة فبيتي حالة الفيس تندور فيه حتا تنسمع الدقان فالبيت .
انا : شكون .
كنزة : واخا ندخل ازينب بغيت نهضر معاك .
انا : واخا دخلي .
كنزة : هاد السيمانة كلها و انا تنهضر معا باباك باش يحولك ، شحال عاد باش قتانع ولكن قال ليا تحمل مسؤوليتها و متكاسلش فقرايتها .
انا كنت غنطير بالفرحة نقزت عليها عنقتها و بقيت تنبوسها .
انا : شكرا اماما بزاف والله تفرحت .
كنزة : عاودي عاودي شنو قلتي .
انا : شنو قلت ؟
كنزو : قلتي ليا ماما ياك انا سمعتها .
انا : سمحي ليا غي خرجات بلا منقصد .
كنزة : علاش انسمحليك ، عرفتي شحال فرحتيني منين تتحسبيني فبلاصت ماماك واخا ميمكنش نكون فبلاصتها و لكن متيهمش .
انا : تكوني فبلاصت عشرة منها اصلا على الاقل دابا تنحس باللي عندي ام تتبغيني و تهز ليا الهم ماشي فحال هاديك .
كنزة : المهم انت مديريش فبالك و نساي دكشي ، عيطي على صاحبتك قوليها ليها و متسهريش انا غادية نعس دابا تصبحي على خير .
انا : تصبحي على خير .
انا : اووف مال هادي واش نعسات جاوبي دغيا .
مروة : زينب مالكي واش ضربك حمار الليل را التناش هادي و غدا عندي التمنية .
انا : وعليكم السلام ، كدرتي لاباس توحشتك وا غبرا هادي شحال مشفناك .
مروة : باغا ديري فيها مصوابة را كلنا كنعرفو نزوقو فالهضرة طلقيتا خلاص مالكي مصدعانا فهاد الليل .
انا : مروة بابا بغا غادي نتحول .
مروة : اويلي حلفي .
انا : والله .
مروة : ياااااي يويويويوييي وا خبار زينة هادي نتي غير اجي و تشوفي القراية كيف دايرة .
انا : وا صمكتيني غا بشوية عليك ، المهم خلي حتا يجيب ليا بابا انتقال و يحن الله جاب الله حنا تنبداو قبل منكم اما كورا فاتوني الدروس نتوما باقين كتمشيو غا تفلاو و تجيو .
مروة : اسيري شمن تنتفلاو را تندخلو تنقيدو الادوات و تنتعرفو على الاستاذ ، تنديرو دكشي اللي متديروهش نتوما ، ماما غطيني بابا طفي الضو وااااع سيري أكيليميني ، و قطعات عليا بنت الحرام مخلات ليا فين نعطيها بالحق الدنيا كدور و البزيم كيتقلب دابا تجي نوبتك .
فالغد مشى جاب ليا بابا انتقال و دفعو فالمدرسة الجديدة و انا كنت غنطير بالفرحة و مبقيتش مقلقا منو حيت خبا عليا دكشي ديال انس و نوفل ، عطاتني مروة لا ليست ديال الادوات شريتهم و جا الاتنين و انا متشوقة نشوف المدرسة كيف دايرة ، فقت مع 6 دوشت و صايبت شعري و جمعتو من القدام بمقيبط فيه بابيون سامبل فالزيتي و من اللور خليتو مطلوق و لبست سروال كحل و قميجة زيتية دخلتها فيه و صندالة كحلة و سنسلة فضية و طابليتي و المحفظة الكحلة و مشيت ، غير وقف السعيد قدام الباب كلشي بقا تيشوف فالطونوبيل ميرسيديس كحلة ، نزلت و بقاو تيشوفو فيا معرفت مندير حتا تنسمع مروة تتعيط ليا .
مروة : عرفتي والله حتى فرحت غيدوز ناضي هاد العام انا و ياك .
انا : اصاحبتي فين كنتي معرفت فين نمشي و كلشي تيحنزز .
مروة : اوا را عادي كلشي يحنزز ، سمعي ديك النية اللي فيك را مكتصلاحش هنا خاصك تحيديها و تقزدري ولا غيضسرو عليك تتسمعي ، و جبداتلي حنكي .
انا : متعرفيش تهضري بفمك و تجمعي يديك .
مروة : وا زيدي تحركي قبل متصدقي معطلة من النهار اللول .
انا : اوكي يالاه .
دخلنا انا و ياها و هي كل مرة تسلم على شي واحد كتعرف المدرسة كاملة و بنادم فيه التبركيك بزاف تيدير شي شوفات فشي شكل .
مروة : شفتي هاداك اللي لابس البيض را هو ولد المدير البنات كاملين تابعينو .
انا : اوا ماشي حتا شي بوكوس .
مروة : مبقاتش فالتبوكيسة .
انا : و فاش بقات ؟
مروة : فالشخصية و التعامل و لاخلاق أ ساطا فهمتي .
انا : ايه راني عارفة و لكن اووف صافي بدينا بالنميمة من دابا .
مروة : و شفتي داك الصلع اللي لابس طابلية بيضة ، هاداك هو مول الفيزيك .
انا : لاواه مول الحمص قادي هضرتك و نتي كي الزوفري .
مروة : غا قولي ليا واش مسيفطك شي واحد ليا فوقما نقول شي كلمة كومونطي عليها و بااز .
انا : هه زيدي و سكتي وريني القاعة فين جات .
دخلنا كان عندنا الفرونسي واحد الاستاذ سمر و شعرو بيض و لكن تيبانلي ضريف ، جلست حدا مروة و دار الاستاذ لابيل و عرفني على التلاميذ و الدراري و البنات تيوشوشو بيناتهم ، بدينا القراية و انا دكشي جاني فحال اللعب قريتو فلابتدائي ، و مع البريفي تيحكرو بزاف على الفرونسي و لونجلي كنت طيارة فيهم ،الاستاذ تيشرح و انا تنجاوب كلشي بقا تيتعجب و شي وحدي محاملينيش غا من شوفاتهم فيا باينة ، و الاستاذ باينة عجباتو خدمتي و انا فرحت ، سالات الساعة دغيا و خرجنا .
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
