الشخص :واش كاين شي واحد هنا من غيرنا؟
العساس : لا ماكاين حتى واحد .
الشخص : ميمكنش إلا شافنا شي واحد را مشينا فيها زيد نشوفو ،و تمو جايين جيهتي و انا نضربها بجرية شافوني و بقاو تابعيني تابعيني حتى لقيت قدامي حيط طويل و لكن راشي كلو و فيه واحد البلاصة رايبة ، تشجعت و دخلت منها و انا نطيح فوق الشوك كلي تجرحت،و تنسمع داك الراجل تيقول للعساس دوز من اللور را باينة غانلقاوه تما، انا طلقت العنان لرجليا و بقيت تنجري تنجري غير الظلام و الشوك و الدنيا تتصفر ،بقيت تنجري حتى بديت تنسمع الصوت ديال الطونوبيلات ،كملت حتى وصلت للشانطي و جلست تنستاراح، مبقيتش عرفت حتى شحال فالساعة و تيليفوني مهزيتوش فاش خرجت و حالتي حالة كورا دارنا مخلوعين عليا دابا،بقيت جالسة حتا وقفات ليا واحد الطونوبيل فيها امرأة و راجل .
المرأة :مالكي ابنتي جالسة هنا بحدك ياكما تعدا عليك شي واحد .
الرجل : سكتي متقوليش ليها هاكاك ، بنتي زيدي طلعي معانا حنا نوصلوك .
انا متسنيتش هضرة خرا طلعت و سديت الباب و بداو تيسولوني.
الرجل:فين تتسكني؟
انا : فمكناس نيت .
الرجل:ابنتي نتي باينة فيك بنت داركم معرفتش شنو وصلك لهنا راحنا دابا فالخرجة ديال المدينة تتكون خاوية تيكونو فيها غير الشماكرية و الحماق ،هانتي هاحنا انوصلوك معانا للدار تستاراحي و نشوفو شنو نديرو من بعد.
انا بقيت غير ساكتة معرفت منقول ولا باش نجاوب حدي طلبت منو التليفون نعيط على بابا كورا قلبو سكت بالخلعة.
انا : الو بابا .
بابا : ابنتي فينك النهار كلو و انا تنقلب عليك مخليت عندمن مشيت فين كنتي ندى را قالت ليا كلشي اللي طرا.
انا : بابا شوف ديك الهضرة مكتقالش هنايا خلي حتا نتلاقاو و نهضرو فيها ، و قطعت.
و صلوني دوك الناس لدارهم و حلات ليهم واحد البنت تكون قدي فالسن، كانو الملامح ديالها زوينين و باينة فيها ضريفة.
البنت : مرحبا بيكم تعطلتو شوية و لكن ماشي مشكل ، و شافت فيا و قالت : بابا شكون هادي ؟
الاب: ابنتي هادي البنت لقيناها فالطريق و هزيناها معانا ، سيري نتي عطيها شي حاجة ديالك تبدل عليها و نجلسو كاملين نشوفو مالها.
البنت :واخا بابا هي اللولة.
داتني معاها كانت دارهم زوينة و بلدية عطاتني البنت شي حوايجها ، كانت ضريفة ، و مشينا حطو العشا تعشيت معاهم و جلسنا مجموعين و كلهم باغين يعرفو شنو طرا معايا.
الأم : بنتي ياكما خاصاك شي حاجة نعطيهاليك؟
أنا : لا اخالتي ربي يخليك ،المهم انا عارفاكم باغين تعرفو شنو طرا ، را متكرفص عليا حتى واحد . و عاودت ليهم القصة ديالي من اللول حتى لقاوني و فاش ساليت كاع داك البكا اللي مبكيتوش تجمع عليا ديك الساعة محسيت براسي حتى بديت تنبكي و نتنخصص .
فاش تهدنت طلعاتني ديك البنت اللي كانت سميتها مروة معاها للبيت ديالها و بقات تتهضر معايا عرفت انها عندها خوها كبر منها سميتو مراد خدام و تيجي كل سبت و حد و هي تتقرا فالتاسعة غير هي فمدرسة اخرى شحال و حنا تنهضرو قتلاتني غا بالضحك و نساتني فاللي طرا ليا حتى دانا نعاس .
طلعت الشمس و تسللت خيوطها الذهبية من الشرجم تتقول ليا نوضي را ليوما نهار جديد، لقيت مروة باقا ناعسة هبطت مشيت للكوزينة، شحال هادي مطيبت ولفت نلقا الماكلة موجودة ناكل و نوض ،و لكن فكرت انا نصايب ليهم الفطور مساكن هما تهلاو فيا بحال بنتهم على الأقل ندير شي حاجة، سخنت الحليب و القهوة و حطيت الكيسان و المعالق، حتا خرجات ليا مروة بحال الجن طيراتها مني خلعة ، جات عاوناتني وجدنا الطبلة و فيقات والديها و فرحو فاش شافونا هاكاك و جات ماماها باستنا حسيت بشي حاجة فشي شكل معرفتباش نفسرها ديك الساعة ، المهم كلينا و سلينا و جا الوقت باش نمشي لدارنا و نرجع للواقع ديالي عطاتني مروة نمرتها و تواعدنا نبقاو ديما نتلاقاو، سلمت عليهم و داني باباها للدار .
وصلنا ،دقيت و حلات لينا فدوة الباب دخلنا و جا بابا تيجري عنقني محسيت براسي حتا دفعتو و طلعت لبيتي تنجري و خليتو مع عمي حسن بابات مروة .
أنت تقرأ
طفولة ضائعة
Historia Cortaقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
