مشينا جلسنا مع مروة و سعد و مراد تنهضرو و نضحكو، حنا كلنا تنعرفو بعضياتنا يعني مكاينش إشكال، جاو وقفو علينا واحد جوج دراري كبار فالعشرينات تيعرفو مراد .
مروة : (فودني) ما هذا الذي تراه عيناي يا ترى؟
أنا : مزوينينش بزاف
مروة : كضحكي عليا
انا : لا هاضرة من نيتي، مقلناش خايبين و لكن داك اللول فيه غا العينين و الشعر و التاني فيه غا اللحية و الضحكة و العينين و الوقفة الطريقة كيفاش تيهضر .
مروة : آه صافي فيه غا هدشي، ايوا قولي بوكوس و هني الشعب .
انا : صافي بوكوس و لكن التاني ماشي الأول
مروة : متافقة معاك
البوكوس الأول : خويا مراد متعرفناش على الإخوة
مراد : بالطبع، هادي ختي مروة و صحبتها زينب بنت السي نورالدين
البوكوس الأول : تشرفنا ختي مروة و زينب انا سميتي عادل
انا و مروة : الشرف لينا
مراد : و هادا سعد صاحبي و تيقرا مع البنات و علي صاحبنا كاملين
عادل : متشرفين، و هذا صاحبي يونس
حنا (انا و مروة و سعد و علي) :متشرفين
يونس : شكرا
انا : شنو تديرو فحياتكم ؟
يونس :انا مهندس تنخدم فالشركة ديال السي نور الدين و عادل مكلف بدراسة المشاريع
انا : مزيان
كملت الهضرة مع علي، و مروة و سعد تيهضرو شادين النميمة فبنادم و مرة مرة تنبركك معاهم و علي تيضحك علينا، مراد و عادل و يونس تيهضرو بيناتهم و مرة مرة تنخطف الشوفة فيونس تنلقاه تيشوف فيا .
علي : زينب
انا : اه نعام
علي : واش عجبك ؟
أنا : شكون ؟
علي : السيهم يونس
انا : عادي علاش ؟
علي : من الصباح و نتي تتشوفي فيه
انا : ياء ايوا نشوف فيه انت مالك ؟
علي : بصح انا مالي اللي مدخل راسي فيك، و مشا و خلاني ندمانة على كلامي ربما نكون جرحتو ولكن مقصدتش ديما لساني سابقني و شحال من مرة تنجرح الواحد بلا قصد .
مروة : مال علي مشا ؟
أنا : يمكن قلقاتو هضرتي
مروة : علاش شنو قلتي ليه ؟
أنا : سولني واش عجبني يونس و انا درت فيه و يمكن تقلق .
مروة : وا بگرة نتيا، السيد سولك و نتي قمعتيه ماشي حشومة، و علي ماشي شي واحد براني علينا و لا لا ؟
أنا : وااايه عارفة، تفو حتا انا
مروة : سيري عتاذري منو قبل ما يفوت الفوت
انا : علاش مالي شنو درت ؟
مروة : لا مدرتي والو ،سمعي حطي راسك فبلاصتو و شوفي كيف غتحسي
انا : واقيلا عندك الصح، هاني مشيت
مشيت تنقلب عليه و كل مرة يوقفني شي واحد و يشدني بالهضرة و انا مزروبة، الناس بزاف و هو مبانش ليا، خفت غير ليكون مشا فحالو،بقا فيا الحال بزاف ، جاتني فكرة، صونيت عليه بالبريفي لعل و عسا يكون قريب و نعرفو، تنسمع الصونيت ديالو حدايا، دورت وجهي بان ليا جالس مع واحد البنت و تيهضرو، تيضحك معاها و هي تتشوف فيه بإعجاب، حسيت براسي مخنوقة، مكرهتش نمشي لعندها نقوليها بعدي منو شنو بينك و بينو، ولكن مقدرتش، رجعت و انا مفقوصة، مشيت تنزرب، شافني بابا و مبغيتش نوقف غيسولني مغنعرف منقولو ،دخلت للدار و مشيت تنجري فالدروج لبيتي، حليت الباب و ترميت فوق الناموسية و انا معصبة، وقفت قدام المراية، مسحت الماكياج اللي تخصر و حيدت الكسوة و بقيت بحوايج خفاف .
انا : تفو على بنادم كان خاصو غا السبة و لقاها، على مرض، و هي تتشوف فيه و عاجبها الحال، اوووف انا مالي أصلا، انا اللي خليتو يدير هاكاك، واااع سوقي انا يجمع حتا مع عشرة شنو دخل شطايطي ،و علاش تعصبت أصلا ضبر راسو يدير اللي بغا شغلو هاداك ،تنهضر مع راسي هاكا حتا قفزني الصوت ديال شي بنية صغيرة تتهضر.
البنت : عافاكي واخا تعطيني شريبة ؟
انا : بغيتي شريبة واخا هي اللولة ،آجي بعدا شنو سميتك ؟
البنت :سميتي آية
انا : و انا زينب
آية : فحال ماما
انا : ههه حتا ماماك سميتها زينب مزيان، قوليلي يا آية شحال فعمرك ؟
آية : 4 سنين
انا : مزيان و فيناهيا ماماك؟
آية : راها لتحت مع بابا
انا : واخا عطيني يديك نديك تشربي و نمشيو لعندها واخا
آية : واخا
انا : يالاه نهبطو لتحت
آية : واخا أ زينب
أنا : هاكي
آية : شكرا...........صافي شربت
انا : يالاه نديك دابا عند ماماك؟
آية : اه
أنا : اه ولا بلاتي خاصني نطلع نلبس حوايجي ميمكنش نخرج هاكا يالاهي معايا نلبسو دغيا و نرجعو واخا ؟
آية : اه واخا
انا : آجي نهزك، اوبلا
يونس : آية فين كنتي ماما من قبيلة و هي تتقلب عليك
انا درت و تيبان ليا يونس واقف قدامي و تيشوف فيا مافاهم والو
آية : بغيت نشرب و ختي زينب عطاتني شريبة
انا : إلى مكنتوش غادين دابا هايا آية معايا شوية و نهبطها ليك واخا ؟
يونس : ممم اه صافي واخا و سمحي ليا كنت غير تنهضر فالتيليفون مقصدتش نشوفك هاكا
أنت تقرأ
طفولة ضائعة
Historia Cortaقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
