تعانقنا و ضحكنا و نشطنا ودوزنا وقت ولا اروع حنا بربعة خواتات، مور العصر تجمعنا و بدينا تنلبسو، انا لبست الكسوة الزرقة ،فالزرق الغامق بالسميطات محلولة جيهت الصدر و معريا من الضهر و طويلة و فيها فتحة فالجنب ،لبست معاها صباط كحل بكعب و صاوباتلي سلمى مشيطة جاتني واعرة النص فشعري مجموع و من اللتحت مطلوق، و درت مكياج مناسب لهاد المناسبة ،سارة لبسات كسوة فالاخضر ملكي طويلة و سنسلة و حلقات ديال الذهب و ضفرات شعرها الأشقر فالجنب جات روعة، و سلمى لبسات كسوة كحلة تحت الركبة ايفازي بالكمام و طالون اسود و طلقات شعرها الطويل الكحل، كان غالب على اللوك ديالها اللون الأسود ولكن مع عينيها خضرين جات ساحرة ،و ندى لبسات لبسة من جوج قطع ،صاية حد الركبة فالرمادي و الفوقاني بيض بلا كمام و فيه شبكة جيهت الضهر، و كل وحدة فيهم دارت مكياج يجي مع اللبس ديالها و ملامحها، الصراحة جينا فنات وحدة تنسي فالاخرى،ماسالينا حتا عيطات علينا طاطا حياة نزلو، قلت ليهم يسبقوني حتا نلحق بيهم، مشيت لبيتي لقيت التيليفون عامر بليزابيل، يالاه انشوف شكون و هو يصوني عاود.
انا : آلو
علي : زينب لاباس
انا : لاباس كلشي بخير، كنت تنلبس لتحت دكشي باش مسمعتوش
علي : اه غير بغيت نقوليك راني وصلت هانا لتحت متعطليش
انا : واخا متخافش
علي : دغيا را توحشتك
انا : انا كثر
علي : و هي لمتعطلتيش كتر
انا : هههه واخا ،يالاه قطع شي واحد تيصوني لي
علي : مممم واخا
انا : الو سعد
سعد : خسارة متنعرفش نزغرت، عرفتي من فوقاش و انا تنصوني ليك
انا : اه عاد شفتهم سمحليا كنت مشغولة
سعد : نتي فبيتك هانا نجي لعندك
انا : لا لا متجيش
سعد : و علاش؟
أنا : نحشم تشوفني هاكا مزال مع الناس ماشي مشكل
سعد : شفتي دابا شوقتيني نشوفك
انا : انا شوية و نهبط
سعد : صافي متعطليش
انا : اوكي
هزيت تيليفوني فيدي و ضربت طليلة قدام المراية، و جلست تنتعوج قدامها و نخصر فوجهي، تنشوف كيفاش تنضحك و كيفاش تنهضر، بقيت تنضحك غا بوحدي ،و فحال كل مرة فاش تنكون بوحدي تنتقمص جميع الشخصيات و تنبدا نعيب فيهم، حتا تنسمع لباب تحل و شي واحد طايح فالأرض، تتبان ليا مروة شادة كرشها و تتغوت بالعاداو .
مروة : ههههههههه وا ديك المصيبة شفتي راسك وا لعاداااو هخههههخخههح وا ميمتي كرشي وا سطيتيني بالضحك .
انا نسيت دغيا را كنا مخاصمين و زدت تنضحك معاها ،هي تضحك و انا نضحك و حتا وحدة مبغات تحبس، حتا جا بابا و لقانا هاكاك و ضحك علينا و على هبالنا و قالينا نزلو ،درنا عقلنا و نزلنا بجوج، كانو الناس بزاف الأغلبية تيخدمو مع بابا ولا معارف ديالو، تقريبا كلهم تنعرفهم، غادية و تنسلم فحال شي واحد مشهور، بان ليا سعد ،كان لابس سروال كحل و قميجة زرقة، جا زوين بزاف و البنات كلهم تيشوفو فيه ،تم جاي قاصدنا.
سعد : اوووه محگلك قلتي متشوفنيش حتا نزل، جيتي واعرة
انا : شكرا أيها العشير
سعد : ما هذا الكلام يا أختاه
انا : انوض من الگلبة واش تتسناني نقوليك اوه ميغسي و نبدا نتعوج
سعد : اودي كوني كيفما نتي
انا : و هدشي اللي تندير أصلا
سعد : ههههه وااااع
انا : هاد وااااع انا اللي تنقولها معندكش الحق تستعملها وإلا فإنه غيتسما تزوير و لا گريساج بالدارجة المغربية
مروة : صافي ديرو شوية ديال الصواب الهضرة ديالنا فالزنقة خليوها تما
انا : عقلي على هاد الكلمة مزيان لمعقلتش عليك ذنوبك على راسك
مروة : صافي مشات ، هاتي كفك
انا : اتفقنا
سعد : تصالحتو؟
أنا : هاء اللي يسمعك يقول كنا مخاصمين
سعد : وا بااز
انا : اصلا هاد اليوماين بلا بيك دازو عليا فحال المرض
مروة : كون تشوفي انا
سعد : يالاه آجيو عنقوني
مروة : خاصك غا الفرصة
انا : خليه عليك، آجي عنقني أنا
مروة : تيليفونك هدا اللي تيصوني
انا :اه ،الو
علي : زينب تعطلتي
انا : اه سمحيليا غير مع الضياف راك عارف فينك انا نجي لعندك
علي : انا مع باباك
انا : اويلي على بابا، احم صافي شفتك هاني جاية
قطعت و بقيت تنتأملو من البعد و هو تيقلب عليا بعينيه، لابس زوين فحال كل مرة، تيبان زوين فحال أي وقت، شافني و جا قاصدني و ابتسامة صغيرة على شفتيه ،تنحس بقلبي تيضرب مع كل خطوة تيزيد يقرب، وصل لعندي و سلم عليا بالوجه، مركز الشوفة ديالو فعيني تماما، تداركت راسي دغيا و رحبت بيه .
انا : مرحبا بك فدارنا
علي : شكرا، غبرتي عليا توحشتك
انا : غير كنت عيانة هاد السيمانا و ممشيتش للرباط
علي : علاش مالكي شنو واقع
انا : لا والو عادي و صافي
علي : نتي مقلتيش ليا راكي عيانة فاش هضرنا فالتيليفون
انا : مبغيتش نشوشك على والو
علي : و دابا باش تتحسي ؟
أنا : فأحسن حال خصوصا و أننا تلاقينا دابا، يالاه جلس معانا لهيه
علي : واخا
أنت تقرأ
طفولة ضائعة
Short Storyقصة بالدارجة المغربية على حياة زينب ? اللي كانت مليئة بالأحداث و المغامرات، القصة فيها طابع حزين ? و لكن فيها حس المغامرة و كلها تشويق....القصة من تأليفي نتمنى تعجبكم الكاتبة : khullo #khullo ✌
